YEREMIA 52 - Bibilia Kui Mdedie fo Kimochi

Orumatso lo Yerusalemu

¹ Sedekia nawewode maka makumi hawi na fumu (21) lilya mandi alewooka wuitoṟi. Naleitoṟia maka ikumi na fumu (11) ipfo Yerusalemu. Mae oke nawekelaho Hamutali mana o kika o Yeremia, menyi o mṟi fo Liba.

² Nalewuta mawicho oshangunyi lo Mndumii-Ruwa cha mawuto halya hose ha Yehoyakimu.

³ Mndumii-Ruwa kasukio mnu kya wandu wa Yeremia na Yuda itane awawingia wakae kuleshe nao. Sedekia kalekana na mangi ya Babeli.

⁴ Kikawa kiidi kya mfiri fo ikumi fo meri fo ikumi maka fo kenda fo wuitoṟi wo Sedekia, Nebukadneza mangi o Babeli, naleshika na ichekeṟo lyake lyose kundu nache isaṟikia Yerusalemu, wakatengetia mṟi fo na ifuringichia riti.

⁵ Mṟi fukatengetio na iṟingichio itane maka fo ikumi na limu fo wuitoṟi wo Sedekia.

⁶ Mkonu fo kenda fo meri fo kana, kukawada njaa njiwawo mnu ikang'ana mṟinyi kuwewode kando pfo.

⁷ Kyasia omombo lo mṟi lukawunduyo na Waasikari wakadicha wohenda nja ya mṟi kiheri kya kio, wakaidia njia ya kichumi makidi hawi ha njomombo tsiwi, demenyi lya mangi wakadichia ora lo Araba, ma chando Wakalidayo waweṟingichie mṟi fose. Waisraeli wakadicha wechihenda pichinyi lya Yordani.

⁸ Kyaindi ichekeṟo lya Wakalidayo waleosha mangi wakambadia kiidi kya rendewele tsa Yeriko, wandu wake wose wakarahanyika wakamda.

⁹ Nahong'u Wakalidayo wakambada mpfungo wakamduo ko mangi o Babeli, ipfo Ribla, oruka lo Hamathi, nao kamwaanduya.

¹⁰ Ipfo Ribla mangi o Babeli kawaha wana wa Sedekia mesonyi ha ndeawo. Kawewaha wanene wose wa Yuda.

¹¹ Kiidima kakuṟuo meso ha Sedekia kampfunga na mshe kamduo Babeli kamshingia mba mṟasa ipfa lyake.

Inyamaṟo lya hekalu

¹² Mkonu fo ikumi fo meri fo katanu maka fo ikumi na kenda fo wuitoṟi wo Nebukadneza, mangi o Babeli, Nebuzaradani mnene o waringi wa Mangi ichu aleṟundia mangi o Babeli, naleida na Yerusalemu.

¹³ Nalekoṟa modo mba ya Mndumii-Ruwa, mba tsose tsa Yerusalemu hamu na mba ya mangi; orio mba iweng'anyi ilekoṟo na modo.

¹⁴ Maaskari wose wa Wakaldayo walya wawei na mnene ulya o waringi, walewunduo njomombo tsose tsiweṟingichie mṟi fo Yerusalemu.

¹⁵ Nebukazaradani mnene o waringi wa mangi kaduo osamiṟonyi wandu walya wawetsuhee mṟinyi na walya walekudambika ko mangi o Babeli hamu na waaria.

¹⁶ Indi Nebuzaradni mnene o waringi wa mangi kada wandu maata wawei wakiwa kiidi kya oruka wawe weambuya madema ha msabibu na wademi.

¹⁷ Wakalidayo wakafunjafunja ngo tsa aṟeṟa njiiwu tsiwei kiidi kya mba ya Mndumii-Ruwa hamu na mrihiyo ya nungu ing'anyi ya aṟeṟa njiiwu iwei mbenyi ya Mndumii-Ruwa wakaduo aṟeṟa iya njiiwu yose mṟasa Babeli.

¹⁸ Wakaweduo shinungu, makumbi, makasi, makaṟai, njoliko tsing'anyi na shihia shose sha aṟeṟa njiiwu na shihia shiwekeṟundia hekalunyi.

¹⁹ Mnene chu o waringi kaweduo mboṟiko, shitela, makaṟai, nungu, shinaṟa sha taa, njoliko tsing'anyi na shitela sha mwaano ya shenyo, shihia shose shiwei sha sahabu ang'u fesa.

²⁰ Kwi shindo Solomoni alesungusia, ngo tsiwi, nungu ing'anyi imu na sanamu tsa mapung'a ikumi na hawi ha aṟeṟa njiiwu shiwei wanda ya nungu yo kimu na mrihiyo, aṟeṟa njiiwu ya shindo shi shose shiwei shilemeri mnu nakamu.

²¹ Orio ngo imu ya itso tsiwi iwewode wuleshe wo mita nyanya (mt. 8) iwei mbiṟi kotengeta mita (5:25), na wushimbi (mt. 75), ipfo kyamba kuwei mṟeṟe.

²² Huya orio ngo kuwewode mdo fo aṟeṟa njiiwu wuleshe wo orio mdo (mita 2) na (sentimita 20)! Orio mdo fuwei mwoṟowie na ndusu njioke maraushi cha makomamanga, tsose tsa aṟeṟa njiiwu.

²³ Kuwewode makomamanga (96) owari lu lo ngo tso; kosanza makomamanga hose hashikie (100) na shindo sheshela mbai koho.

Wandu wa Yuda wadao Babeli

²⁴ Kiidima Nebuzaradani mnene o waringi wa mangi kaduo mpfungo Seraya mkohanyi ang'anyi, na Sefania mkohanyi o kawi, hamu na waringi waṟaṟu wa mongo,

²⁵ na kuwuka mṟinyi naleduo mnene umu ekesongoya wandu wa mbahanyi wa shida, na wandu mfungade wawei wanjama wa mangi alewakoya mṟinyi. Kaweduo na mṟehi o msongoru ang'anyi o shida, akeṟehia mbonyi tsa shida na wandu wang'anyi makumi haṟandaṟu (60) alewakoya mṟinyi fo Yerusalemu.

²⁶ Nebuzaradani mnene o waringi wa mangi kaduo wandu wo mṟasa ko mangi o Babeli ipfo Ribla.

²⁷ Mangi Nebukadneza o Babeli nalekapa wandu wo kawawahia ipfo Ribla orukenyi lo Hamathi. Kyasia wandu wa Yuda walehenda osamiṟonyi nja ya oruka lowo.

²⁸ Kyaosha iya nyi wandu walya Nebukadneza alewaduo osamiṟonyi maka fo mfungade fo wuitoṟi woke, naleduo Wayuda shiku shiṟaṟu na makumi hawi na waṟaṟu (3,023).

²⁹ Maka fo ikumi na nyanya (18) fo wuitoṟi woke, kaduo wandu wapfungo Yerusalemu mahana nyanya makumi haṟaṟu na wawi (832).

³⁰ Maka fo makumi hawi na kaṟaṟu (23) fo wuitoṟi wo Nebukadneza, Nebuzaradani mnene o waringi wa mangi kaduo wapfungo Wayuda mahana mfungade makumi hana na watanu (745). Wose waledao wapfungonyi nyi shiku shina na mahana haṟandaṟu (4,600).

³¹ Kushikie maka fo (37) wokya Yehoyakini mangi ya Yuda adao osamiṟonyi, mkonu fo (25) meeri fo (12), Evilmerodaki mangi ya Babeli, maka fulya fulya alewa mangi nalehoṟia Yehoyakini mangi ya Yuda, kammbuta kipfungonyi.

³² Nalededa nao necha kamnenga mwanya fo kiṟumi kota wamangi wengi wawei kimu nao osamiṟonyi ipfo Babeli.

³³ Naho Yehoyakini naleilacha maṟao hake ha wupfungo kawa mokuliia kando kiheri kyose mesenyi ko mangi.

³⁴ Kiheri kyose nawekeinengo kando nyi mangi o Babeli na kilya kyose awehuṟi mkonu yose, itane ipfa lyake.