YEREMIA 51 - Bibilia Kui Mdedie fo Kimochi

¹ Mndumii-Ruwa nahamba adi: “Njechisuwia otanu lo orumatso lucheye Babeli na wandu wose wekekaa Kalidayo.

² Njechidika walya wekeela ipfo Babeli, nawo wameele; wechimarisa orio kindo kiidi kya oruka loke ili mandi wechishika iya masarikionyi hake iwuka njora tsose kiheri kya osaramayo loke.”

³ Kulaneinge mwanya welasa mfi wa Babeli; kulawaleke wakuruo wuda tsawo, ma iṟaa maṟao ha shida. Kulasaṟie warika wake; rumatsa piu wandu wake wa mbahanyi.

⁴ Wechioloka na iwoho kiidi kya oruka lo Wakalidayo, wechiwiko shifaṟe kiidi kya paṟapaṟa tsake.

⁵ Kyaindi Israeli na Yuda Mndumii-Ruwa o matorito alewadapfo, ma chandu oruka lowo luichuo wukiwa, oshangunyi loko nyi mwele o Israeli.

⁶ Dichenyi muwuke Babeli, orio mndu naletse moo foke! Mularumatso kiidi kya nyashi yake, kipfa iki nyi kiheri kya Ruwa itaa kiṟache, nechihoṟuo Babeli chandu kiwaṟi.

⁷ Babeli nawei kirahu kya sahabu owokonyi lo Mndumii-Ruwa, kikananza wuyana wose. Mkambo walewado nyi nyashi itane wasuko.

⁸ Kudi Babeli naoloka na ifunjikafunjika; sokionyi fowa kipfa kyake! Endenyi mdi mumwaanguṟie mawawio hake; kofia nechiidima ichiṟo.

⁹ Luleheṟie ichiṟa Babeli, indi kechiwa-pfo Denyi mṟifu, luhende, orio mndu oruka loke, kipfa mwanduye foke nyi fung'anyi mnu, fukuirie mṟasa mapuchinyi.

¹⁰ Mndumii-Ruwa ameṟingishia ke kuwode kindo lutehiye-pfo. Luhende Sioni luonguo mawuto ha Mndumii-Ruwa, Ruwa odu.

¹¹ Mndumii-Ruwa nasuwia mrima ya wamangi wa Mede, kipfa nakusaṟie irumatsa Babeli. Ee da, ikyo nyi kyo kiṟache kya Mndumii-Ruwa, nataa kiṟache kipfa kya hekalu lyake. Nuonyi mfi yanu! Irenyi ngawo.

¹² Irenyi bendeṟa ya shida saṟikienyi njomombo tsa Babeli. Wanzenyi wuringi; wikenyi waringi; reheṟenyi isaṟikia. Mndumii-Ruwa nadumbuye na iawutsia, mbonyi adedie kya wenyi wa Babeli.

¹³ Oruka lo luichuo meda na shisa pacha, kyaindi masionyi hashika, orusu lo moo foke lodumbuyo.

¹⁴ Mndumii-Ruwa o matorito nalya nyamu yake. Na kya lohi njikuichuṟia wandu wapfo wa mbahanyi cha nzihe, nawo wechikapa mṟoṟo fo wuwinzi huye yapfo.

¹⁵ Mndumii-Ruwa nyio alewumba wuyana kwi pfinya tsake, kwi wulaanyi woke kawanza wuyana, na kui wuṟango woke kaala ruwehu.

¹⁶ Ili adeda mṟinga fukadedemisha ruwehu, nechidosa mtima fudo mṟasenyi ya oruka. Nekewika mbaṟuko luwaṟuo kiheri kya mvuo, kawiwita otanu luwuke kikumbinyi kyalo.

¹⁷ Orio mndu nyi tondo alawode wuṟango, orio mnganya nechisutso nyi sanamu tsake; kipfa sanamu tso tsake nyi wulembi nakamu, ma tsiwode mṟufu kiidi kyatso pfo.

¹⁸ Tsiwode wuhuru pfo, nyi wulembi nakamu, kiheri kehoṟuyo, natso tsechisaramaya.

¹⁹ Ruwa chu ai kisa kya Yakobo ai ado pfo, kipfa nyio awikie isho shose, na Israeli nyi oshari lui loke; Mndumii-Ruwa o Matorito, nyi lyo rina lyake.

Masiionyi ha Babeli

²⁰ Mndumii-Ruwa nahamba adi: “Iyo Babeli nyi ṟungu na kisha kyako kya shida; njikuwode nofunjefunje mkambo, njikuwode norumatse wamangi.

²¹ Njikuwode nopaṟepaṟe farasi na wedooya frasi, magari hekuruo na wehaluo.

²² Njikuwode nopaṟepaṟe wasoṟo na waka, waku na wakoho, wa kiumi na wa kika.

²³ Njikuwode nopaṟepaṟe walisi na mapoo hawo, wademi na mmbe tsawo tsedema, wanene na isanga na wachili.”

Ikapo lya Babeli

²⁴ “Wulalu njechihoṟuo Babeli na wandu wose wa Kaldayo mochiwona na meso hanu muwenyi, kipfa kya wuwicho wose walewutia Sioni. Inyi Mndumii-Ruwa ngahamba,

²⁵ ‘Inyi njilimbana na iyo fumvu linyamaṟa oruka lose! Njechihoṟotsa owoko loko huye yapfo, njekuolotsa kuwuka ngaṟahambenyi ya maho huye na ikuhaluo uwe fumvu likoṟe modo.

²⁶ Kulewada ma iho lyapfo, lyechidao iwika mba, manya kochiwono iho lyewika otendenyi lo mba-pfo. Nochiwa cha nuka ya msanga mlungana. Nyi inyi Mndumii-Ruwa ngahamba.’

²⁷ Iria bendeṟa ya shida wuyanenyi, kapa taṟumbeta kiidi kya wandu wa mkambo; teseheṟa mkambo ikapana nao; laha mangi isaṟikia; mangi tsa Ararati, Mini na Ashkenazi. Wika mbahanyi sumhana nawo; ende frasi cha mapo ha nzihe.

²⁸ Teseheṟa mkambo ikapana shida; teseheṟa wamangi wa Medi; Wachili na waeki wawo, teseheṟenyi njoruka tsose kiidi kya wuchili woke.

²⁹ Oruka ludedema na idosa mtara kui mawawio, kipfa makusaṟo ha Mndumii-Ruwa kirianyi na Babeli nyi hamanyikie, nechihaluo oruka lo Babeli luwe nuka ya msanga, ikae ilawode wandu.

³⁰ Askari wa Babeli walemo ikapana, wakaa njotiṟiwenyi tsawo, pfinya tsawo tsasia, wakawa cha waka. Mmba tsa Babeli tsakoṟo na modo, mongo yawo ya menya yafunjo.

³¹ Moduo mbonyi nawikia mteeṟa ihenda iambia ungi. Modumo kawehekia mteeṟa, ihenda iambia manomae, kundu mangi o Babeli nawio mbonyi, ke mṟi foke fufuduo orio handu.

³² Ke shitaṟa sheambada sha meda shadao, njotiṟiwa tsakoṟo modo, askari waichuo wuowu wung'anyi mnu.

³³ Mndumii-Ruwa, Ruwa o Israeli nahamba adi, ‘Babeli nyi ai cha kiwuha keelia Ngano kiheri kyo kekeṟeheṟo. Kyaindi kutsuhee kitutu tupu kiheri kesambuo kikoyo.’

³⁴ Mangi Nebukadreza o Babeli nalenyamaṟa na iwunduo mṟi fo Yerusalemu. Kafuda cha kitosho kilawode kindo; kafumeṟa cha njoka, naleichuṟa ndeu yake na shindo shicha, kafukumba kuleshe cha odaiko.

³⁵ Wandu wa Yerusalemu wahambe, ‘Babeli nao naate natao kiṟaache kya wuneesi wulya wulya, lulewutio so na wandu wadu! Babeli itao kiraache kipfa, kepusuo samu yadu.’”

Mndumii-Ruwa nechitarama

³⁶ Mndumii-Ruwa nahamba adi; “Njechideda handu hanu kya mbonyi tsanu, na itaa kirache kipfa kyanu. Njechiumiṟa ipalyipalyi lya Babeli, njiumiṟe maṟungu ha mṟinga.

³⁷ Babeli yechiwa sohu ya mba tsiwundukie kanyi komapara, yechiwa kindo kilawaṟi na cha kindo kepiṟo na itahika; kochikao nyi mndu pfo.

³⁸ Wababeli wechiringona cha mwiso; waringone cha maalea ha mwiso.

³⁹ Wakawado nyi oṟoo lung'anyi, njechiwaṟeheṟia mfuho; njechiwananza itane watangaluka, wechilaa mado ha mlungana walechikure se, nyi inyi Mndumii-Ruwa ngahamba.

⁴⁰ Njechiwasotsa cha machondi heshinja, cha isuwa na kyoṟo.

⁴¹ Apaa ṟiho lya iwado Babeli, Mṟi fuwei mṟumishe wuyanenyi kose fodao! Babeli nyowa kindo kilawaṟi kiidi kya mkambo!

⁴² Ipalipali lyapuika huya Babeli, ikashikio nyi masinanu hapuika.

⁴³ Mṟi yake yawa omino, oruka lumu na nuka ya msanga oruka lulekao nyi mndu ose, ma iido na mndu o wandu ose.

⁴⁴ Njechihoṟuo ruwa Beli ipfo Babeli, njechimtana nawute ikyo ameṟie, mkambo yechilungana se imhendia pfo. Omombo lo Babeli lowunduka.

⁴⁵ “Wukenyi ipfo nyo wandu wako! Orio mndu naletse moo foke, nalekane na nyashi njiwawo ya Mndumii-Ruwa.

⁴⁶ Mulapfe mrima manya mulaowuo, kipfa kya mbonyi muicho orukenyi. Maka fu kuwode mbonyi tsi, maka fungi mbonyi tsingi, mbonyi tsa wunesi kiidi kya oruka, mwuitoṟi umu ko muitoṟi ungi.

⁴⁷ Na kya lohi, mkonu ikeri icha, mandi njechihoṟuo sanamu tsa Babeli, oruka lose lochihoyo nyi sonu, wandu wake wechiwohiyo ipfo pfo.

⁴⁸ Kiidima ruwehu, oruka na shose shiipfo, shechiimba na sia kipfa Babeli naoloka, kipfa kya werumatsa wawuka ora lo mtsudu wakacha ifusaṟikia. Nyi inyi Mndumii-Ruwa ngahamba.

⁴⁹ Babeli notewa njopfu tsiche wuyanenyi kose; wulalu wenyi wechirumatso, wawoho nyi Israeli.

⁵⁰ “Nyo mulekia opfu, kurenyi wulalu, ma mulahingehinge! Ma chandu mukeri oruka lo kuleshe mukumbuo Mndumii-Ruwa, muwekumbuo mṟi fo Yerusalemu.

⁵¹ Muihamba: ‘Lulesutso na iowesho; sonu tsashikia shaamu shanu, kipfa wahenu waida kiidi kya handu haele ha mba ya Mndumii-Ruwa.’

⁵² “Ko ikyo, kui cha kiheri, nyi inyi Mndumii-Ruwa njihamba njihoṟuo sanamu njipache tsa Babeli, na walya wafaṟe wechisumukia kiidi kya oruka loke lose.

⁵³ Ma Babeli kodo mṟasa ruwehu, na iikara njotiṟiwa tsake njileshe, njechidika werumatsa wampufukie. Inyi Mndumii-Ruwa ngahamba. Omarumatso lo ngoseṟa huya Babeli!”

Orumatso lo ngoseṟa lo Babeli

⁵⁴ “Adanyia! Ofuho loichio luwuka Babeli! Mtiṟi fo orumatso lung'anyi lowuka orukenyi lo Wakaldayo.

⁵⁵ Kipfa inyi Mndumii-Ruwa njirumatsa Babeli, na itoromesha kifahio kyake king'anyi.

⁵⁶ Ee da, morumatsa naichea Babeli; waskari wake wadayo, wuda tsawo tsafunjofunjo. Inyi Mndumii-Ruwa nyi Ruwa mohoṟuo, kya lohi inyi njechitaa kiṟache kishikie.

⁵⁷ Njechinanza wanene na walaanyi wawo, waitoṟi wawo, wachili na waskari wake; wechilaa mado ha mlungana walechikuṟe se. Ngadeda inyi mangi na rina lyako nyi Mndumii-Ruwa Menyi Matorito.

⁵⁸ “Inyi Mndumii-Ruwa Menyi Matorito ngahamba, omombo lulandari lo Babeli, lochiwunduyo mṟasa wanda, na mongo yake njileshe yechirumatso na modo. Wandu wakeri itambahana kya wulya, wandu wa mkambo waikuwinyisha kipfa mtsitsionyi fowo nyi modonyi.”

Ndumi ya Yeremia yadao Babeli

⁵⁹ Maka fo kana fo wuitoṟi wo mangi Sedekia nalehenda Babeli kimu na mnene o oshari loke elaho nyi Seraya mana o Neria na mchuku o Maseya. Kipfa kya mwanya fo, inyi Yeremia njileinengia Seraya ndumi.

⁶⁰ Njileṟehia kitapunyi mawukiwa hose njileonguo kya Babeli na madedo hengi da kipfa kya Babeli.

⁶¹ Njilewia Seraya, “Ili mandi ochishika Babeli nyi kiwaṟi nosomie wose ndumi.

⁶² Kiidima umarisie na madedo ha: ‘Hoi Mndumii-Ruwa, iyo nyi ohamba ke nochinyamaṟa handu ha, ma kulakae ho kiumbe kyose, mndu ang'u mando ha mbaṟi tsose hai na moo na ke orukalu lochiwa lo msanga mlungana.’

⁶³ Komemarisa isoma kitapu ki, kipfungie iho, nokiolotse makidi hawi ha meda fo Eufrate, kochihamba:

⁶⁴ ‘Nyi wudo mṟi fo Babeli fochisoṟowia ma fochikure sepfo, kipfa kya mawicho ho Mndumii-Ruwa aifuendie.’” Mtsitsionyi fo madedo ha Yeremia.