YEREMIA 50 - Bibilia Kui Mdedie fo Kimochi

Mwanduye huya Babeli

¹ Ili nyi idedo lya Mndumii-Ruwa alelideda kwi dumbu lya Yeremia mwikimbi kya oruka lo Babeli na wandu wake Wakalidayo:

² “Hamba kiidi kya mkambo, irienyi bendeṟa na ihamba, mlaṟike kindo ma kimu. Hambenyi: ‘Babeli yamewado, Beli nasutso, Merodaki naiṟewe; sanamu tsake tsasutso, maruwa hetsana hadedema.’

³ “Kipfa, mkambo fuwukie mtsudu focha ikapa; fochihaluo oruka loke mrapu. Kulawode mokaapfo; wandu ma mando hose hadichie kuleshe.”

Mawuyenyi ha Israeli

⁴ “Mafiriho na maheriho, ngahamba inyi Mndumii-Ruwa, wandu wa Israeli na wandu wa Yuda wechisanza handu hanu na iwuya wechifihiṟa na injishiha inyi Mndumii-Ruwa, Ruwa owo.

⁵ Wechiwesa njia yehenda Siyoni, na shamu shawo nyipfo shiembeṟukie, wechihamba, “Njonyi.” Nawo wechiwadana na Mndumii-Ruwa kiidi kya mkundana fo mlungana fulechikaa fuhadimike.

⁶ “Wandu wako wawei machondi hadekie; walisi wako walehadekesha, wakawahaluo wambuya mafumvuhu; hakaṟahaṟa fumvu na shitoṟomoso hakahadima mfiṟiha foho.

⁷ Wandu wose walehakoya walehawaha, na wakituwa waho wakahamba, luwode mti sopfo, kipfa ho haledekio Mndumii-Ruwa ai kanyi kawo kalohi; Mndumii-Ruwa ichu ai kikusirio kya waku wawo!

⁸ “Dichenyi kuwuka Babeli! Wukenyi orukenyi lo Wakalidayo, muwe cha shioṟo shisongoye po.

⁹ Kipfa inyi ngasuwia mkambo ing'anyi iwukie oruka lo mtsudu wasaṟikie Babeli. Wechikuteseheṟa isaṟikia Babeli na iiduo. Mfi yawo ikeri cha ngohoda alechiwuya na mawoko ha wulya.

¹⁰ Oruka lo Wakalidayo lochidao na iwo weluduo wechichihiyo. Nyi inyi Mndumii-Ruwa ngahamba.”

Iomboka lya Babeli

¹¹ “Nyo weduo masaa hako! Ma chandu muichihiyo na ikapa ngululu, mkaitolatola cha taho isusa Ngano, na iana cha pung'a ya frasi,

¹² Oruka lonu lofeeyo lochisutso; na oruka lo maanu lochimino. Apaa! Babeli yechiwa yefurumia kiidi kya mkambo, yechiwa nuka ilawode mṟinga ma nta.

¹³ Kipfa kya nyashi yako inyi Mndumii-Ruwa, Babeli yechilao nyi mndu pfo, yechiwa mrapu; orio mndu echiida hafui nayo nechiṟihio, nechiikapa mang'ango kipfa kya shifaṟe shake.

¹⁴ “Nyo mui waaria welasa na mfi, wadenyi handu hanu mutengetie mṟi pfo Babeli; fukapenyi, mulade mfi ma fumu, kipfa fulenjidekio inyi Mndumii-Ruwa.

¹⁵ Kapenyi kifahio kya shida njora tsose, wulalu Babeli nokuloṟa uwado. Njotiṟiwa tsake tsaoloka, mawanda hake hawunduyo. Njitaa kiṟache huya Babeli, uwawutie chandu ulewutia wengi.

¹⁶ Imenyi wandu walawaaye mbeu ipfo Babeli, manya walasambuo kiheri kya shilimu, kwi oshu lo mbaka, ori umu nechiwuuya wandu wake, orio umu nechidichia oruka loke.

¹⁷ “Israeli nyi ichondi lyekeowelio na iwingio nyi mwiso. Kuwoka walerumatso nyi mangi o Ashuru na wulalu Nebukadneza mangi o Babeli nafunjafunja mafuo hake.

¹⁸ Ko ikyo inyi nyi Mndumii-Ruwa Menyi Matorito, Ruwa o Israeli, ngahamba njidi: Njechikuhoṟuo mangi o Ashuru.

¹⁹ Njechiwihiṟa Waisraeli orukenyi lowo, nawo wechilya shilimu shechidemo fumvuhu lya Karmeli na Bashani waweihuda kando kawukie mafumvuhu ha Efraimu na Gileadi.

²⁰ Mafiri ho na maheri ho, wuwicho wochishiho orukenyi lo Israeli, indi lochiwonopfo pfo; wunyamaṟi wochishiho orukenyi lo Yuda, indi wochiwonopfo pfo, kipfa inyi njechihoṟia walya njilewatsuhaṟa. Nyi inyi Mndumii-Ruwa ngahamba.

²¹ “Donyi, muhendie oruka lo Merathaimu, hendenyi muisaṟikie; saṟikienyi wenyi wa Pekodi, na irumatsa piu wandu wake. Ngahamba inyi Mndumii-Ruwa. Ṟundenyi orio kindo njilemuwawasa.

²² Kifahio kya shida kiichio mṟinyi, kuwode inyamaṟo ling'anyi.

²³ Nyi kuda kyawa mṟi fo, fuwei kiria kya wuyana wose fuiolotso wanda na ifunjika! Babeli nowa mdao kiidi kya mkambo!

²⁴ Iyo Babeli, njilekuwikia mdeho kowado, ma kulemanya pfo, kipfa kulerekiana na inyi Mndumii-Ruwa.

²⁵ Ngaṟuhuo kikumbi kya shisha, ngawutapfo shisha sha nyashi yako, kipfa inyi Mndumii-Ruwa menyi matorito njiwode iṟunda kiidi kya oruka lo Wakalidayo.

²⁶ Njonyi mumsaṟikie kuwuka orio ora, ṟuhuonyi shikumbi shake sha shelya; muumbienyi mhanda fo kando ka mso! Rumatsenyi piu oruka lu; ma mulatsuhaṟe kindo kyose!

²⁷ Wahenyi wasikari wake wai ngohoda; walekenyi wasokie kundu weshinjio kwi oshu. Ochia lowo, kipfa mkonu fowo foshika, kiheri kyawo kehoṟuyo kyashika.

²⁸ “Adanyia! Wadichi na walya walesheṟuka wawuka orukenyi lo Babeli wakeri icha ipfo Siyoni ionguo chandu Mndumii-Ruwa aletaa kiṟache kipfa kya hekalu lyake.

²⁹ “Lahenyi walya welasa na mfi wasaṟikie Babeli; Duonyi orio aichi ikuruo uda. Tengetienyi mṟi kulakae pfo echidicha wokusheṟuo. Taenyi kiṟache kirianyi na mawuto hake hose; muwute chandu mulewutia wengi, kipfa kya orikiki lopfo nyi kulenjimina inyi Mndumii-Ruwa mwele o Israeli.

³⁰ Ko ikyo, warika wake wechiwohiyo kiidi kya shidembo shake, na wandu wa mbahanyi wose wechirumatso mkonu naafo. Inyi Mndumii-Ruwa ngahamba.

³¹ “Inyi Mndumii-Ruwa o matorito, njikapana na iyo uwode orikiki, kipfa mkonu fopfo fohoṟuyo foshika. Kiheri kyekuhoṟuo kyamanda.

³² Menyi orikiki nechikapa mtulia naoloke, ma echiwona momiira pfo. Njechiatsa modo kiidi kya mṟi yake nafo fochikoṟa orio kindo kii mbarinyi koyo.”

³³ Mndumii-Ruwa o matorito nahamba adi: “Wandu wa Israeli wakeri iwonyio; kake na wandu wa Yuda. Walya walewaduo wapfungo wawawada ma walakunde iwalekia.

³⁴ Kyaindi inyi mkiṟa owo njiwode pfinya. Ruwa Menyi Matorito nyilyo rina lyako. Na kya lohi njechideda kyawo kundu njiende ofoṟo ko wandu wako na wuale ko wandu wa Babeli.

³⁵ “Opfu ko Wakalidayo, ko wandu wa Babeli na wandu walaanyi wa koke!

³⁶ Opfu ko walasha, ikyo waionguo nyi wutondo tupu! Opfu ko wandu wa mbahanyi, kundu warumatso!

³⁷ Opfu ko frasi tsake na magari hawo hanyamaṟo, opfu ko wandu wa mbahanyi wai watae, kundu waowuo cha waka! Shisha shake shinyamaṟike, kundu shiiwo na idetso.

³⁸ Kuwae mṟasa mṟinga fuumie fulechiwono! Kipfa Babeli nyi oruka lo sanamu tsa maruwa, wandu nyi wekesuko kya sanamu tsawo tsepacha wakatsihaluo ruwa.

³⁹ “Ko ikyo mando ha ngeṟenyi, shisii hamu na nyaha, hechikaa Babeli. Kochikaa kukaepfo wandu maheri hose ma walya wechikaa wafeo.

⁴⁰ Chando inyi Mndumii-Ruwa njilerumatsa mṟi iya ya Sodoma na Gomora na mṟi ya mṟasenyi, na wudo kuwode mndu echikaa nakae pfo pfo. Ee da, kochikaapfo mndu pfo. Inyi Mndumii-Ruwa ngahamba.

⁴¹ “Ambuya wandu waicha wawuka mtsudu; mkambo fuwode pfinya na wamangi wafoi, wakeri ikuṟeheṟa iwuka mtsitsionyi ya wuyana.

⁴² Wawode wuda na mfi, nyi wandu walang'a walawode osaṟio. Mtiṟi yawo nyi cha mrundumo fo ipalyipalyi, wadooye frasi hu wakuteseheṟie kichikichi ko shida, wache ikarisana na iyo Babeli!

⁴³ Mangi o Babeli naicho mbonyi tsawo, mawoko hake hakawa cha mrewa. Nahoyo mawawio, kawado nyi okoṟa cha lo mndu mka akeri iendio mana.

⁴⁴ “Ambuya, inyi njechiwa cha mwiso fosoṟomoka ngeṟenyi ya meda fo Yordani na iida handu hawode kando kecha. Inyi Mndumii-Ruwa njechiwapuhutsa oweṟe wandu wake wawukie koke. Na inyi njechiwika pfo msongoru echiwaiṟinganyisho na inyi nyiu echiidima injiwada mondu? Nyi mlisi uhya echiidima injilema?

⁴⁵ Ko ikyo adanyienyi kilya njikusirie ikiwuta inyi Mndumii-Ruwa kya Babeli hamu na mbonyi njikusirie wana wawo wechikuruyo na idao; na lohi kochiwada iṟihiyo ling'anyi kiidi kya handu hake hekaa.

⁴⁶ Kwi mtiṟi fo wado shida ko Babeli wuyana wochidedema na kifihiṟo kyawo kechiichio kiidi kya mkambo ingi.”