YEREMIA 5 - Bibilia Kui Mdedie fo Kimochi

Wunyamaṟi wo Yerusalemu

¹ Wikienyi mteṟa kunu na kunu kiidi kya njia tsa Yerusalemu, muwone wulalu na imanya muwenyi, na ishika kiidi kya shiwanja shake kokoya mochiidima iwona-pfo, mndu umu na icho umu ekewuta sha wulohi, ai mhendeli; inyi njechihoṟia mṟi fo.

² Ma wakahamba, “So Ruwa ai na moo.” Walya nyamu ya wongo.

³ Meso hapfo iyo Mndumii hekeambuya wuhendeli nulewakapa, indi walesokio nyi fowa pfo; kowadedia wakaleha iwuya; wakawada orikiki kiwicho, wakahaluo shamu shawo iho lya iṟaṟa; walehiye iwuya.

⁴ Nkyo kitewe ngahamba, “Nkya lohi iwa nyi wakiwa matondo, masembo halaichi njia ya Mndumii, ma mwaanduye ya Ruwa owo.

⁵ Njechihendiya wandu wang'anyi, njechideda nawo, kipfa waichi njia ya Mndumii na, mwaanduye fo Ruwa owo. Indi iwa kui mahiyo hawo walehiye, kusanza kimu na idumbuo shipfunga shimu na Mndumii owo.

⁶ Kipfa ikyo mwiso fuwukie ngeṟenyi fochiwawaha, kisii kechiwadeha kiukanyi, rumu lyechilaaya mṟi yawo, orio motambahana iwukapfo nechitufuyotufuyo nasie; kipfa madeko hawo nyi hafoi na iwuya, numa kowo nyi kuengeṟekie.

⁷ “Njechiidima njida ikuhoṟia iyo Yerusalemu? Wana wapfo wanjida inyi, na ilya nyamu ko walya walai ruwa lilya waleihuda, waleṟuhuya wakakumbuhana kiidi kya mba ya wameluki wai wafoi.

⁸ Wakawa cha frasi tsiihutsu kiheri kya ngamenyi; orio umu kafihiṟa kipfa kya ilanga mka o odoye.

⁹ Ngesa njilatae kiṟache kipfa kya mbonyi-tso tsesutsa, Mndumii ahamba; na mrima foko nawo fulatae kiṟache kiidi kya mkambofu fo mbaṟi ii?

¹⁰ “Doyenyi omombohu loke muwunduo na inyamaṟa, kyaindi mulanyamaṟe mumarise pahuonyi maṟamba halyo, kipfa hai ha Mndumii-pfo.

¹¹ Nyi kipfa mba ya Israeli na mba ya Yuda, walenjiwutia mbonyi njiwicho mnu.” Mndumii ahamba.

Mndumii aleha Waisraeli

¹² Wo nyi waleleha Mndumii wehamba, “Chio-pfo ma kuwode mawicho hechilukoya-pfo, lochikoyana na oshu manya njaa-pfo.

¹³ Waikimbi wechiwa otanu, ma kuwode idedo lya wulohi kiidi kya wopfo; kyasia nyi wudo wechiwutio.

¹⁴ Kui kipfa kya ikyo Mndumii-Ruwa menyi matorito nahamba adi wai, ‘Kipfa kya ili nyo mohamba idedo li ambuya, njechihaluo madedo hako kiidi kya dumbu lyapfo hawe modo, na wandu-wa wawe ngu, na modo fochiwalya.’

¹⁵ “Ambuya njechiende mkambo fo wandu fuwukie haleshe mnu iyo mba ya Israeli: Mndumii ahamba; nyi wandu waapfinya, nyi wandu wa mkambo fo kacha, mkambo fo wandu ulaichi kishomo kyawo, ma kulaichi kilya wadeda.

¹⁶ Shaha yawo nyi ṟungu likualie, nyi wai ngohoda wa shida wose.

¹⁷ Wo nyi wechilya shilimu shapfo, na mkate fopfo, wechimarisa wana wanu wa kisoṟo na wa kika; wechilya mapo hapfo ha machondi na ha mbe, wechilya msabibu yapfo na mashidi hawode ndunda tseloda; wechinyamaṟa mṟi yapfo injiiṟihiye omombo, iya uwekusirie ee da, wechiinyamaṟa na oshu.

¹⁸ “Kyaindi ma kudo kiidi kya mkonu iya njechimurumatsa piu-pfo.” Mndumii ahamba.

¹⁹ Nakyo kechiwa ilindi mochiwesa, “Mndumii naleluwutia ishi shose kipfa kya iki? Nalyong'u mochiwawia, ‘Chandu mulenjida inyi na iṟundia maruwa hengi kiidi kya oṟuka lonu muwenyi, nyi wudo mochiṟundia wahenu kiidi kya oruka lulai lonu.’”

Mndumii-Ruwa akanga wandu wake

²⁰ Onguonyi mbonyi ii kiidi kya mba ya Yakobo, hambenyi kiidi kya Yuda.

²¹ “Adanyienyi idedo li nyo masembo mulaichi kindo, muwode meso kyaindi mulawonyi kindo; muwode madu kyaindi mulaidime iicho.

²² Ngesa mochinjiowuo inyi? Mndumii awesa. Mochidedema oshangunyi loko inyi njilewika mlelya oṟiho lo ipalyipalyi, kui iwawaso lya mlungana mṟinga lularunduke ma masinamu hakakuuriya halaluidime kindo; na hakakuma na pfinya hechiidima iida-pfo.

²³ Kyaidi wandu wa wawode mrima fowuta na orikiki wamina wakahenda chando wakundi.

²⁴ Manya wakadeda mrimenyi yawo ke wulalu luindie Ruwa odu moende mvuo ya maka, na ya fuli kui kiheri kyayo; na iluinenga mfungade ya shilimu chandu kii kiteṟiye.

²⁵ Mawicho hanu hailachie ishi, na manyamaṟo hanu hakaima ishi shose mulashiwone.

²⁶ Kipfa kiidi kya wandu wako kuipfo wandu wawicho, wekelaaya cha modeha mdeho; wekedeha ikawada wandu.

²⁷ Chandu itimba lyekeichuo shilehe, nyi wudo mba tsawo tsiichuo mtambo; ko ikyo nyi wai wandu wang'anyi wawode masaa.

²⁸ Wakakuiria wakaaka aka, ee da, waeṟie wewuta mawicho; wechiidima itarama wangoeda waidime iwa necha; ma wekeanduo kya sungusihu-pfo.

²⁹ “Ngesa njitae kiṟache kipfa kya isho? Mndumii ahamba; Na mrima foko njilafutaye kiṟache kiidi kya mkambo fu fo wandu.”

³⁰ Kindo kiṟihishie kiwicho kikeri kiidi kya orukalu.

³¹ Waikimbi wahamba wongo, wakuhanyi waitoṟia kui ngaya yawo, na wandu wako wakundi shindo shiwe shido. Nanyo mochiwuta muda iya masiiyonyi ngesa?