YEREMIA 49 - Bibilia Kui Mdedie fo Kimochi

Mwanduye huya Waamoni

¹ Kirianyi na Waamoni Mndumii-Ruwa nahamba adi: “Ngesa, Israeli awode wana? Ngesa, awode wemwoṟa? Kyawa kida ruwa Milkomu, naitoṟie Gadi na wandu wake wakahaluo mṟi yake iwe yawo yekaa?

² Kyasia, maheri haicha lohi, mkonu yacha, Mndumii-Ruwa ahamba, njechiamtsa ṟu lya shida, ipfo Raba mṟi fo Waamoni. Raba fochiwa fumvu lya onyamaṟo, shihongo shake shechirumatso ko modo, naalyo Israeli echiitoṟia walya walemiitoṟia. Nyi inyi Mndumii-Ruwa ngahamba.

³ “Kapenyi kilio nyo wandu wa Heshboni, kipfa mṟi fo Ai fonyamaṟo, Fihiṟenyi nyo wana wa waka wa Raba, kupfungenyi makunyia shitsinyi, kapenyi kilio na idicha ipfo na ipfo kadi! Kipfa ruwa Milkomu nechidao osamiṟonyi, kimu na wakohanyi wake na waṟundi wake.

⁴ Nki ili mukushelia mapichi hanu nyo mulaidikie, wandu mulekusiria masaa hanu, mochihamba: Nacho echikaria ikapana naso?

⁵ Kyasia, inyi njechimuendie kiṟihisho kya wuowu wuwukie ko wamṟasa wanu wose, nanyo mochifunyio nja orio mndu, kulawode mosanyia wadichi. Nyi inyi Mndumii-Ruwa menyi matorito ngahamba.

⁶ Kyaindi lyefurumia njechiwihiṟia Waamoni sia yawo. Nyi inyi Mndumii-Ruwa Menyi Matorito ngahamba.”

Mwanduye huya Edomu

⁷ Kirianyi na Edomu. Mndumii-Ruwa menyi matorito nahamba adi: “Ngesa, kuwode wulaanyi mṟinyi fo Temani? Ngesa, iwo waṟango wawode kindo se? Wulaanyi wudekie piu?

⁸ Dichenyi nyo wandu wa Dedani. Halukenyi muhende ikaa maowionyi! Kipfa njimuendie orumatso nyo wana wa Esau.

⁹ Wahaa sabibu ili wechicha konu, wechitsuhaṟa ndunda ma imu-pfo. Kio kilya waiwi wechicha, wechinyamaṟa orio kindo waiṟimiṟe.

¹⁰ Kyaindi njilesoka Esau orio kindo, ee da, ngashukuo maowionyi hake, ma echiidima iowase pfo. Wana, wa wamae na wamṟasa wake walerumatso; kuwode ma umu aledeo-pfo.

¹¹ Njideyenyi wana wanu wai ngoeda, na inyi njechiwaembeṟa, njideyenyi wakusu wanu wakusihiye koko.”

¹² Mndumii-Ruwa nahamba adi: “Kokoya walya walawewaṟi inyo kikombe kya ngapo na wakinyo, ngesa iyo nochideo ulawode ngapo? Ote! Ochiwuṟa ngapo pfo; na kikaki na unyo kirahu kyo!

¹³ Kipfa ngalya nyamu yako ke mṟi fo Bosra fochiwa kiṟihisho na kindo kesetsa, fochiwa mnyamaṟe na oseso; shihongo shose shechiwa mrapu mandi hose. Nyi inyi Mndumii-Ruwa ngahamba.”

¹⁴ Ngaambia mbonyi iwuka ko Mndumii-Ruwa, mndu amdume naongoye mkambo: “Kusanzenyi handu hamu kya Edomu; kurenyi muhende ifusaṟikia!

¹⁵ Inyi Mndumii-Ruwa njechikuhaluo iyo Edomu, uwe mtutu kota mkambo yose. Wuyana wose wochikumina.

¹⁶ Mbonyi tseowesha na orikiki lopfo shakulemba, iyo okekaa kiidi kya mbako tsa ngaṟahamba tsa maho, kowekaa huya njowerihu tsa fumvu! Ma chando uwikie kanyi kopfo huye cha mbero, inyi njechikupuhutsa uwuke ipfo kundu ui. Nyi inyi Mndumii-Ruwa ngahamba.

¹⁷ “Edomu yechiwa kiṟihisho na orio mndu echiida kufui nao nechiṟihiyo, na ikapa mang'ango kipfa kya mawicho hechimhoya,

¹⁸ cha Sodoma na Gomora na mṟi iya ya mṟasenyi ilerumatso, inyi Mndumii-Ruwa ngahamba, kochiwada mndu ose echikaa Edomu ma idediapfo chila pfo.

¹⁹ Chandu mwiso fokekusoromuo fuwuka ngeṟenyi ya meda fo Yordani na iida kiidi kya maṟa mecha, nyi wudo njechifuna Waedomu wawuke orukeni lowo faṟa. Na inyi njechiwikapfo msongoru icho njechimsambuṟa. Kipfa nyiu echiwa iṟinganyisho na inyi? Nyiu echiidima injianduya? Nyi mlisi uhya echiidima injiima.

²⁰ Ko ikyo, adanyienyi oloho loko inyi Mndumii-Ruwa, njiluteseheṟie kya Edomu hamu na mbonyi tsilya njiweṟeheṟie, iwutia wandu wa Temani: Na kya lohi, wana wawo watutu wechikuruyo na idao; nyi lohi kochiwada ikangaṟika ling'anyi kiidi kya handu ekekaa.

²¹ Na mtiṟi fo ioloka lyawo, wuyana wochidedema, ṟu lya ofuho lowo lyechiichio mṟasa ipalyipalyi lya Shamu.

²² Ambuya mkituwa nechirunduka cha mbeṟo na iṟambatsa makungo hake huya Bosra. Mkonu fo mrima fo mbahanyi tsa Edomu fochiwada wuowu cha mndumka aifee.”

Mwanduye huya Damasko

²³ Kirianyi na Damasko: “Mṟi ya Hamathi na Arpadi, iichuo makangao, kipfa kya mbonyi njiwicho: Mrima ya wandu wake isalaa ko wuowu, iwodo nyi madima cha ipalyipalyi lilechiidima itsia sau.

²⁴ Wandu wa Damasko wapfie mrima; wahaluka kundu wadiche; wuowu wung'anyi wowakoya, mawawio na fowa shawakoya cha mndumka aifee.

²⁵ Nyi ṟiho mṟi fuwemanyikie, mṟi fuweichuo sia ideo.

²⁶ Kyasia warika wake wechioloka mapatehu koke, Waskari wake wose wechisaramaya mkonu fo. Nyi inyi Mndumii-Ruwa menyi matorito ngahamba.

²⁷ Njechiatsa modo kiidi kya mawanda ha Damasko, nafo fochikoṟa njotiriwa tsa mangi Ben-hadadi.”

Shishari sha Kedari na Hazori

²⁸ Kirianyi na Kidari na mangi tsa Hazori itso mangi Nebukadneza mangi ya Babeli, aletsisarikia na itsiwinga, Mndumii-Ruwa nahamba adi: “Kure uhende isaṟikia kishari kya Kedari! Rumatsa wandu wa ora lo ngamenyi.

²⁹ Mahema hawo na machondi hawo shechidao, shidami shawo sha matiṟishenyi na masaa hawo hose; wechisoko na ngamia tsawo, ofuho lochiichio: Iowesho orio ora!

³⁰ Dichenyi, hendenyi kuleshe, kaenyi marinenyi. Nyo wandu wa Hazori, dichenyi mṟaheṟahe na ikaa maowionyi! Inyi Mndumii-Ruwa ngahamba. Kipfa Nebukadneza mangi ya Babeli nakuteseheṟa kyanu, nakusaye icha imusaṟikia.

³¹ Kure nohende isaṟikia mkambo fusiie moo, mkambo fui handu ha olele. Nyi inyi Mndumii-Ruwa ngahamba. Mkambo fo fuwode shichumi ma kai lya menya pfo; nyi mkambo fui kyaanya kyafo.

³² “Ngamia tsawo tsechiwado, shuuma shawo shechiwado cha shidenyi. Njechirahanyitsa, walya weoda kilodi orio ora. Njechiwaendie wukiwa orio ora. Nyi inyi Mndumii-Ruwa ngahamba.

³³ Mṟi fo Hazori fochiwa kanyi ko mapaara, kuwode echikaapfo pfo, na ihaluo handu ha kikaya.”

Mwanduye huya Elamu

³⁴ Idedo lya Mndumii-Ruwa lilechea mwikimbi Yeremia kya Elamu, mawookyonyi ha wuitoṟi wo Sedekia mangi ya Yuda.

³⁵ Mndumii-Ruwa menyi matorito nahamba adi, “Njechifunja wuda wo wandu wa Elamu wui otende lo pfinya tsawo.

³⁶ Njechiende otanu luwuka njora tsose tsa ruwehu; njechiwarahanyitsa orio handu ma kulechiwada mkambo fulawode wadichi wawukie Elamu.

³⁷ Njechiendie wandu wa Elamu wuowu wung'anyi oshangunyi lo wakituwa wawo na oshari lo walya wakundi irumatsa moo yawo. Njechiwaendie mawicho na nyashi yako njiwawo. Nyi inyi Mndumii-Ruwa ngahamba. Njechiwaendie oshu luwaoshe mṟasa wasaramae na kamu.

³⁸ Njechiwika loṟika loko lo wuitoṟi ipfo Elamu na imamiṟa mangi owo hamu na wanene wawo. Inyi Mndumii-Ruwa ngahamba.

³⁹ Kyaindi mkonu yefurumia, njechiwihiṟia mṟi fo Elamu sia yake. Nyi inyi Mndumii-Ruwa ngahamba.”