YEREMIA 48 - Bibilia Kui Mdedie fo Kimochi

Mwanduye huya Moabu

¹ Mndumii-Ruwa menyi matorito, Ruwa o Israeli, nahamba adi: “Ochia wandu wa Nebo, kipfa mṟi foke fonyamaṟo! Kiriathaimu fosutso, fowado, omombo lofo luwunduyo kuleshe.

² Wusuṟi wo Moabu wodeka. Masae halesayo ipfo Hesboni kipfa kyake: ‘Kyasia! Luwarumatse walawe-se mkambo! Na iyo Madmeni nochitsia, oshu lochikuosha.

³ Adanyia! Ofuho luweukie Horonaimu. “Orumatso na inyamaṟo ling'anyi!’

⁴ Moabu yamemaa irumatso, ofuho loke luichuo mṟasa Zoari.

⁵ Walya walekia waido ihenda Luhithi, kunu waifuha na ṟu. Ili waisoka ihenda Horonaimu, waicho kifihiṟo kya inyamaṟo.

⁶ Dichenyi! Kiṟenyi moo yanu! Dichenyi cha nzoi ya ngeṟenyi ipfo nuka ya msanga.

⁷ “Moabu, nuwekusirie omombo na shisha shapfo, indi wulalu iyo da nochiwado; Ruwa opfo Kemoshi nechidao osamiṟonyi, hamu na Wakohanyi wake na waṟundi wake.

⁸ Morumatsa nechiida orio mṟi, kuwode mṟi fochimwowisha pfo; orio kindo kii pichinyi kechirumara, njora tsa huye tsechinyamaṟo chandu Mndumii-Ruwa alehamba.

⁹ Sumienyi Moabu kipfu, kipfa irumara lyake nyi lya lohi; mṟi yake yechisamo, ilechiwada ma mndu umu.

¹⁰ Naolotsio oseso mndu moṟunda iṟunda lya Mndumii-Ruwa na wudoko; naolotsio oseso ichu moima oshu loke lulapusuo samu!

¹¹ “Moabu nasie moo wokia wurika woke, nakutsie cha mvinyo kirahunyi, Ameletso awuka Kihia-ki mṟasa kihia-ki pfo, ale medao osamiṟonyi-pfo, nawekeri na mlodo foke, mpfaamo foke mcha fulemeilachike-pfo.

¹² “Ko ikyo, kuicha kiheri, njideda inyi Mndumii-Ruwa njechidika weletsa, nawo waletse mvinyo foke. Wechipusuo yose iwuke shihienyi na ishipaṟapaṟa shiteeno teno.

¹³ Wamoabu wechiwadia ruwa owo Kemoshi sonu chandu wandu wa Israeli walewadia sonu Betheli, ruwa ulya wawemkusirie.

¹⁴ “Mochiidima kuda ihamba, “So nyi lui wakari, nyi wandu wawode pfinya tsa shida?

¹⁵ Ulya morumatsa Moabu na mṟi yake, ameafukia wanake wake wecha wasia iwoho. Ngahamba inyi njekelaho nyi Mndumii-Ruwa Menyi Matorito.

¹⁶ Kiwi kya Moabu kyakoya, orumatso loke locha owinyi.

¹⁷ Kapienyi Moabu kilio, nyo wamṟasa wake wose, nanyo muichi necha, hambenyi: ‘Nyi uda ndichi ya pfinya, ilefunjo, na ndichi ya kiṟumi?

¹⁸ Nyo wandu wa Diboni: Sokenyi muwuke handu hanu ha kiṟumi, muhende idamia orukenyi lulawode mṟinga. Kipfa ulya morumatsa Moabu, ameshika kundu namsaṟikie; amemaa inyamaṟa njotiṟiwa tsanu.

¹⁹ Nyo wandu wa Aroeni, hoṟokenyi mbai ya njia muambuye! Wesenyi ichu aidicha na ikusheṟuo.’ ‘Nkiki kyawutika?’

²⁰ Moabu yasutso kipfa yafunjo, kapenyi kilio na ifihiṟa, onguonyi mbai ya meda fo Arnoni, ke Moabu yanyamaṟo kichikichi.

²¹ “Mwaanduye fokooya mṟi iya ya ora lo huye: Holoni, Yasa, Mefaathi,

²² Diboni, Nebo, Beth-diblathaimu,

²³ Kirathaimu, Beth-gamuli, Beth-meoni,

²⁴ Keriothi na Bosra. Ee da mwanduye yahooya mṟi yose ya Moabu kuleshe na kufui.

²⁵ Pfinya tsa Moabu tsilefunjio kuleshe na wuidimi woke wulefunjo. Nyi Inyi Mndumii-Ruwa, ngahamba.

²⁶ “Nanzenyi Moabu kipfa nalekudosa oshangunyi loko Inyi Mndumii-Ruwa. Moabu nechisemberere kiidi kya odaiko loke na wandu wechimseka.

²⁷ Kumbuo Moabu chandu uleseka Israeli. Ngesa! Nalewado kimu na waiwi, itane osingitsa mdo fopfo orio mandi odeda kyake?

²⁸ “Lanye wandu wa Moabu, wukenyi mṟinyi, muhende mbakonyi! Muwake mbeta yekewika sungu, kundu kuwode mchenje.

²⁹ Lomeicho kya orikiki lo Moabu, Moabu nekekushela mnu. Lukaaicho chandu ekekudosa, orikiki na ikushela lyake; lukaicho chandu ekekuirinyisha mrimenyi.

³⁰ “Na inyi Mndumii-Ruwa ngahamba: Njiichi wuwicho woke: Ikushela lyake nyi wulya, mawuto hake chi kindo-pfo.

³¹ Ko ikyo nyikapa kilio, kipfa kya Moabu, njifihiṟa kipfa kya Wamoabu wose, njikapa kilio kya wandu wa Kir-heresi.

³² Njikufihiṟia iyo dema lya Sibma, kota wandu wa Yazeri. Maṟamba hapfo hakuala, mṟasa molyolya ya ipalyipalyi lya monyo, hakashika mṟasa Yazeri. Indi ulya morumatsa, nahoya ndunda tsa kwari, na msabibu yapfo.

³³ Sia na ngululu tsawuto, kiidi kya oruka lo Moabu luwode teri njicha. Kulawoneke mvinyo handu hekamia, kuwode mndu mokama sabibu awode sia pfo: Kifahio njiicho chi kya sia-pfo.

³⁴ “Kifihiṟo kya wandu wa Heshboni kiichio ipfo Eleale mṟasa Yahazi; kudung'anyie wuka Zoari mṟasa Horonaimu mṟasa Eglath-shelishiya. Itane mṟinga fo kimeda Nimrimu fuumie.

³⁵ Ambuya na inyi njechiangatsa orio mndu kiidi kya Moabu ichu echidasia shifumvuhu na idutsia ubani ruwa oke.

³⁶ “Ko ikyo, mrima foko fukapia kilio wandu wa Moabu na wandu wa Kir-heresi, cha mokapa mtoṟiṟo kiṟikionyi; kipfa ma masaa halya hose walewona hasaramaya.

³⁷ Orio mndu naodie ohaa na ngerero tsake, wose wakuwehie wehie mawokonyi na shitsinyi waṟee makunyia.

³⁸ Mbenyi tsa Moabu na kiidi kya shiwanja shawo kuwode kindo kechiichio sile ikapa kilio pfo. Inyi ngafunja Moabu cha kindo kilakikunde nyi mndu. Inyi Mndumii-Ruwa ngahamba.

³⁹ Ambuya chandu afunjikie! Ambuya chandu waikapa kilio! Ṟiho chandu Moabu awuya nduma ko sonu! Moabu nawa seko na kiṟihisho ko wamṟasa wake wose.”

⁴⁰ Mndumii-Ruwa nahamba adi; “Ambuya, mkambo fo wandu wechirunduka, na itowokia wa Moabu, cha owishi, lualie makungo halo.

⁴¹ Mṟi yake yechidao, njotiṟiwa tsechidao. Mkonu fo mrima ya wambahanyi wa Moabu, yechiowuo cha mndumka aifee.

⁴² Wamoabu wechirumatso, walechiwa se mkambo, kipfa walekudosa huya Mndumii-Ruwa.

⁴³ Kiṟihisho, marina na mdeho, shimuwedie nyo wandu wa Moabu. Ngahamba inyi Mndumii-Ruwa.

⁴⁴ Kokushowa na kiṟihisho, nochioloka rinenyi, kuwuka rinenyi, nochiwado mdekonyi. Kipfa njechiende isho shose huya Moabu, kiidi kya maka fowo fo hoṟuyo. Ngahamba Inyi Mndumii-Ruwa.

⁴⁵ Wadichi waleheli wasia moo Heshboni wakundi ofoṟo, kipfa koṟuka modo ipfo mṟinyi, olewo lo modo lowuka, mbenyi ya mangi o Sihoni; lorumatsa mṟasa ya Moabu lotengeta mafumvu ha iwo walemeshi.

⁴⁶ Ochia lonu wandu wa Moabu! Wandu wa Kemoshi wulalu morumatso, wana wanu wadao wapfungo, wana wanu wa kika wadao osamiṟonyi.

⁴⁷ Kyaindi mkonu yecha, njechioṟisha se Moabu Inyi Mndumii-Ruwa ngahamba. Ifu nyifo mwanduye huya Moabu.”