YEREMIA 47 - Bibilia Kui Mdedie fo Kimochi

Idedo lya Mndumii-Ruwa kya Filistia

¹ Idedo lya Mndumii-Ruwa lilechea Yeremia mwikimbi kya Wafilisti, Farao alamesaṟikia mṟi fo Gaza.

² Mndumii-Ruwa nahamba adi: “Ambuya mṟinga fochido fuwuka mtsudu, nafo fochiwa meda fupuikie, fochishikia oruka lose na shose shiipfo, mṟi na wenyi mṟi na wose waipfo, wandu wechifihiṟa, wandu wechikapa kilio.

³ Wechiicho mtiṟi fo mbahachu tsa frasi, kifahiyo kya magari ha shida, na mtiṟi ya oṟo tsaho. Wasoṟo wechihadima wana wawo, mawoko hawo hechiwa mhuli mnu.

⁴ Ifo nyi mkonu forumatsa. Wafilisti wose, itirimisha kitarama kiletsuhaa wuka Tiro na Sidoni. Kipfa Mndumii-Ruwa nairumatsa Wafilisti, wandu waletsuhaa wa kihongo kiṟingichie, mṟinga njora tsose kya Kafto.

⁵ Wandu wa Gaza waodie ohaa wekapa kilio; mṟi fo Askeloni forumara. Lanye wandu wa Anahimu mletsuhaa, mṟasa indii mochikuwehaweha mui na mkuinadie?

⁶ Iyo oshu lo Mndumii-Ruwa! Nyi indii ochitsia? Ida na kiṟandenyi kyapfo, usie moo na itsia sau!

⁷ Indi nyi uda ochitsia, kokoya Mndumii naluinengie iṟunda? Naluwawasie msaṟikie mṟi fo Askeloni, na wai wambaṟa ya ipalyipalyi.”