YEREMIA 46 - Bibilia Kui Mdedie fo Kimochi

¹ Idedo lya Mndumii-Ruwa lilechea Yeremia kirianyi na wandu wa mkambo.

Mndumii-Ruwa adeda kya wandu wa Misri

² Misri na ichekeṟo lya Farao Neko mangi ya Misri, liwekeri ipfo Karkemishi hafui na meda fo Eufrate ilyo mangi Nebukadneza o Babeli alelisaṟikia maka fo kana fo wuchili wo Yehoyakimu mana o Yosia, mangi ya Yuda.

³ Teseheṟenyi ngawo njitutu na tsing'anyi, hendenyi kusonguo mkapane shida.

⁴ Ṟeheṟenyi frasi na itsidoya, wadenyi handu hanu na mboṟohondo tsa menya mṟae. Nuonyi mapfumu hanu, ṟaenyi maṟao hanu ha menya!

⁵ Kyaindi nkili njiwawonyi waowesho? Wakawuya numa. Walya wai mbahanyi wakapo, wawikia mteeṟa wakadicha, walaambuye numa. Waowesho njora tsose. Mndumii-Ruwa ahamba.

⁶ Walya wai waangu isheṟuka waidimapfo, wai mbahanyi waidima ikushowa pfo; ora lo mtsudu medenyi fo Eufrate wakapa mtulia na iomboka.

⁷ Nyiu icho aicha meda fo Nili fupuikie, cha meda idosa masinamu?

⁸ Misri nyi cha meda fo Nili fupuikie, cha meda idosa masinamu. Ilehamba: “Njechiichuo njishikie oruka, njechinyamaṟa mṟi na wenyiyo.

⁹ Hendenyi kusonguo nyo frasi, saṟikienyi nyo magari ha frasi. Wandu wa mbahanyi ndepfonyi kusonguo, wandu wa Ethiopia na Puti wewada ngawo, wandu wa Ludi waaria welasa na uda.”

¹⁰ Mkonu fo nyi mkonu fo Mndumii-Ruwa Menyi Matorito, nyi mkonu fotaa kiṟache; ee da, nyi mkonu fohoṟuo wakituwa wake. Oshu lochiwamarisa na ihuda, lochinyo samu yawo na ihuda. Kipfa Mndumii-Ruwa Menyi Matorito nawode kidaso, ipfo ora lo mtsudu kufui na meda fo Eufrate.

¹¹ Hendenyi Gileadi, nyo wandu wa Misri, muonduo mdi fopfaama. Momenyo mdi ifoi kya wulya, mulawode ichia.

¹² Mkambo yameicho mbonyi tsanu tsa sonu, ofuho lonu lodung'ana wuyanenyi kose; wandu wa mbahanyi wakapana wo wenyi ko wenyi, wose waomboka kimu.

Misri yatengetio

¹³ Aili idedo Mndumii-Ruwa alewia Yeremia kiheri mangi Nebukadneza o Babeli lilya alecha isaṟikia oruka lo Misri.

¹⁴ “Onguo orukenyi lo Misri, kapa iranda ipfo Migdoli; Onguo ipfo Memfisi na Tahpanes. Wawie: ‘Kuṟeheṟenyi mnu kipfa oshu lochimumarisa orio handu!’

¹⁵ Nki kitewe icho ai ngarama adicha? Nki kitewe pung'a yapfo ilaidime itirisia? N'kipfa inyi Mndumii-Ruwa njilemwolotsa wanda!

¹⁶ Wafoi walekapa tulia, wakaomboka, kiidima wakawiana wo wenyi ko wenyi, luwuye orukenyi lodu, ludiche oshu lo mkituwa?

¹⁷ “Nao Farao, mangi ya Misri, mdumbuyenyi rina li: ‘Mtiṟi fo wulya!’

¹⁸ Inyi ngalya nyamu ko moo foko, njihamba inyi nyi mangi njekelaho Mndumii-Ruwa Menyi Matorito, na lohi mkituwa naicha imusaṟikia. Nyi kya lohi chandu Tabori fui fumvu, chandu Karmeli fumvu lekewono kuwuka ipalyipalyinyi.

¹⁹ Nyo wandu wa Misri, kuṟeheṟenyi na mhanda yanu ihenda osamiṟonyi! Kipfa mṟi fo Memfisi fochinyamaṟo kuchu, fochiwa mrapu fulechikao nyi wandu.

²⁰ Misri fui cha taho njicha ya mbe, kyaindi kilehe kiwukie mtsudu kimtengetie.

²¹ Ma maaskari wake watao wueri nyi cha taho njinoru; nawo da wahaluka, wakadicha kimu, walaidime itirisia, kiheri kehoṟuo kyaafukia.

²² Misri nawuta ṟu cha njoka idicha; kipfa wakituwa wake waimchea ko pfinya, wamchea na masoka cha wemanya mashidi.

²³ Wechimanya ngeṟa isie kuchu, ma chandu ilekewa iida napfo, nyi inyi Mndumii-Ruwa ngahamba, kipfa wo nyi wafoi cha nzihe walechiwa iitala.

²⁴ Wandu wa Misri wechisutso, wechidambiko mawokonyi ha wandu wawukie mtsudu.”

²⁵ Mndumii-Ruwa Menyi Matorito, Ruwa o Israeli, nalehamba, “Ambuya inyi njechihoṟuo Amoni ruwa o Thebesi, njechihoṟuo Misri na maruwa hake na wamangi wake njechihoṟuo Farao na wose wamkusirie.

²⁶ Njechiwadambika mawokonyi ha wose wakundi irumatsa moo yawo, ai Nebukadneza mangi ya Babeli na wanene wa wandu. Kiidima oruka lo Misri kuwade wandu cha kuwoka. Inyi Mndumii-Ruwa ngahamba.”

Mndumii-Ruwa nechikiṟa wandu wake

²⁷ “Kyaindi iyo Yakobo mṟundi oko kulaowuo, ma kulaawo mamoo, iyo Israeli; kipfa njechikukiṟa kuwuka kuleshe, njechicha ikiṟa luwa lyapfo, kuwuka oruka walesamiṟo. Yakobo nechiwuya na ikutsia amchihie, ma kuwode echimwowesha pfo,

²⁸ kulaowuo iyo mṟundi oko Yakobo, kipfa inyi njii kimu na iyo. Njechirumatsa mkambo yose ya wandu walekunyanyaṟitsa kiidi kyawo, indi iyo njechikurumatsa-pfo. Nechikulachuo chandu uwaṟi, njechida njilakuhoṟuo-pfo.”