YEREMIA 44 - Bibilia Kui Mdedie fo Kimochi

Ndumi ya Ruwa ko Waisraeli orukenyi lo Misri

¹ Idedo lya Mndumii-Ruwa lilechea Yeremia kya Wayuda wawekekaa orukenyi lo Misri kiidi kya mṟi ya Migdoli, Tahpanesi, Memfisi na ora lo Pathrosi.

² Mndumii-Ruwa menyi Matorito, Ruwa o Israeli nahamba adi: “Nyo mulewona mawicho hose njilewutia mṟi fo Yerusalemu na mṟi yose ya Yuda. Mṟi ii nyi mrapu mṟasa inu ma kuwode mndu ekekaapfo pfo.

³ Ilewa ido kipfa kya wuwicho walewutana, wakanjisuiṟa ko ipfaamiṟia maruwa hengi ubani na ihaṟundia maruwa hengi walawehaichi; manyo, ma waku wanu.

⁴ Manya kudo, inyi orio kiheri njilemudikia waṟundi wako waikimbi njechihamba; Mulawute kindo-ki kiwicho njikisuuye!

⁵ Indi kuwode alenjiicho ma ideha kudu koke pfo. Nyo muleleha ida wuwicho wonu na ida ipfaamiṟa ubani maruwa hengi.

⁶ Koikyo tuke yako na nyashi yako ikaaka na iletsekia huya mṟi ya Yuda na njia tsa Yerusalemu, itane yawa nuka ya msanga na mrapu chandu ikeri mṟasa inu.

⁷ “Wulalu, inyi Mndumii-Ruwa Menyi Matorito, Ruwa o Israeli, njiwesa njidi: Nki ili mukuendie mawicho hang'anyi kudi, na ikurumatsa nyo muwenyi, wasoṟo ko waka, wana watutu na wanangu, kulawode mndu achitsuhaa kiidi kya Yuda?

⁸ Nki ili munjitewa njisuo kipfa kya ihoneṟia sanamu muletsisungusia muwenyi na ipfaamiṟia ubani maruwa hengi kiidi kya oruka lo Misri ilu mulecha napfo isamiya? Ngesa, mukundi irumatso na iwa oseso na kindo kya sheeṟe oshangunyi lo mkambo ya wuyana?

⁹ Ngesa, mohadima wuwicho wo waku wanu, wuwicho wo wamangi wa Yuda, wuwicho wo waka wawo na wuwicho wonu nyo muwenyi na wo waka wanu, mulewuutia orukenyi lo Yuda na njienyi tsa Yerusalemu?

¹⁰ Mṟasa inu ma mulemekunyiiṟe ma iowuo ma iosha mawawaso hako na mbiia tsako njilemudea nyo na waku wanu pfo.

¹¹ “Ko ikyo inyi Mndumii-Ruwa Menyi Matorito, Ruwa o Israeli ngahamba njidi; Wulalu, njechimuhalukia njimuendie mawicho na irumatsa Yuda yose.

¹² Njechiwuta wandu wa Yuda waletsuhaa iwo wakuṟeheṟie ihenda ikaa Misri, njiwarumatse wose, wang'anyi ko watutu; wechipfa ko oshu ang'u ndaṟe. Wechiwa mbosha, kiṟihisho, oseso na italuka.

¹³ Njechiwahoṟuo wose wai orukenyi lo Misri chandu njilehoṟuo mṟi fo Yerusalemu, ko shida, njaa, na ndaṟe njiwicho.

¹⁴ Koikyo kochiwada mndu ma umu kiidi kya wandu wa Yuda waletsuhaa na ihenda ikaa orukenyi lo Misri echikia ang'u nakae na moo, ang'u iwuya orukenyi lo Yuda pfo lulya walangie iwuya na ikaapfo. Wechiwuya pfo, shile nyi waangu walya wai wadichi.”

¹⁵ Kyasia, wasoṟo wose iwo waweichi ke waka wawo wawepfaamiṟa ubani ko maruwa hengi, na waka wose waleicho, kisanzio king'anyi kya wandu hamu na Waisraeli wawekekaa Pathrosi orukenyi lo Misri wakahaluo Yeremia;

¹⁶ “Kindo ki oluwia handu ha Mndumii-Ruwa lochikiindia-pfo.

¹⁷ Indi orio kindo lulekiliia nyamu lochikiṟunda: Lochipfaamiria mka mangi o ngina ubani na imletsia mwaano fonyo chandu luwekewuta so luwenyi na waku wadu, wamangi wadu na wasongoru wadu, kiidi kya mṟi ya Yuda na njienyi tsa Yerusalemu. Maheri ho luwewode kando kalushikie, lukafuda ma lulewona ngataṟa yosepfo.

¹⁸ Kyaindi wokia loda ipfaamiṟia ubani mkamangi o ngina na imletsia mwano fonyo, lulewuṟa orio kindo lukarumatso ko shida na njaa.”

¹⁹ Na waka wakahamba, “Lulewuta ludo ko momu fo wamii wadu. Kake lukamsungusia mkate iwode fana yake na imletsia kenyo!”

²⁰ Naalyo Yeremia kahaluo wandu wose, womi na waka, iwo walemmbia wado:

²¹ “Ikyo kya idasa nyo na waku wanu, wamangi wanu na wasongoru wanu, hamu na wandu wa oruka wose, mulewutia kiidi kya mṟi ya Yuda na kiidi kya njia tsa Yerusalemu; alae mukusaṟie Mndumii-Ruwa nahadimie ang'u akumburie?

²² Mndumii-Ruwa echiidima itirisiase mawuto ho hanu mawicho mulewuta pfo; nkyo kimarete oruka lonu lowa mrapu, cha nuka ya msanga, oseso luwuṟie wandu, chandu kii mṟasa inu.

²³ Mawicho ha hamukoya mṟasa inu kipfa mulewuta mwaano yemaya modonyi ko maruwa hengi na idekio Mndumii-Ruwa, mukaleha iindia ṟu lyake na iosha wuwawaso woke, na chile tsake na shilya awawasie shose.”

²⁴ Yeremia kawia wandu wose na waka wose: “Adanyienyi idedo lya Mndumii-Ruwa, nyo wandu wose wa Yuda mui orukenyi lo Misri.

²⁵ Mndumii-Ruwa Menyi Matorito, Ruwa o Israeli, nahamba adi: Nyo kimu na waka wanu moinutsia kwi mawuto shilya mulededa na madumbu hanu, mochihamba ke na kikaki na muinutsie nyamu yanu yewutia mwaano na yeletsia mka-mangi o ngina. Kyasiang'u! Wadenyi nyamu yanu na iwuta mwaano yeletsia!

²⁶ Kyaindi adanyienyi idedo lyako inyi Mndumii-Ruwa, nyo wandu wose wa Yuda mui orukenyi lo Misri. Inyi Mndumii-Ruwa ngahamba njidi: ‘Ngalya nyamu ko rina lyako ling'anyi ke kuwode mndu oose o Yuda ai orukenyi lo Misri echisenda rina lyako na ilya nalyo nyamu kechihamba: So Mdumii Ruwa ai na moo!’

²⁷ Inyi njiwaimehia chi ko mecha pfo kyaindi ko mawicho. Wandu wose wa Yuda orukenyi lo Misri wechirumara ko oshu na njaa kulechitsuhaa ma mndu umu.

²⁸ Nyi waangu wechikia shidenyi wawuye wawuka Misri na ihenda orukenyi lo Yuda. Wandu wa Yuda wose waletsuhaa kiidi kya walya walehenda ikaa Misri wechimanya nyi idedo lyau lyiwode pfinya lyako ang'u lyawo!

²⁹ Inyi Mndumii-Ruwa ngahamba ke njechiwahoṟoya iya iya mumanye ke madedo halya hawi njilededa kyanu hahoya. Na iki nyi kitaanyo kyake:

³⁰ Njechidambika Farao Hofra mangi ya Misri mawokonyi ha wakituwa wake, mawokonyi ha walya wawekundi imbaha chandu njiledambika Sedekia mangi ya Yuda mawokonyi ha mkituwa oke Nebukadneza, mangi ya Babeli, ichu awekundi imbaha. Nyi Inyi Mndumii-Ruwa ngahamba.”