YEREMIA 43 - Bibilia Kui Mdedie fo Kimochi

Yeremia adao Misri

¹ Yeremia kekimarisa iongoya wandu wose madedo hose Mndumii-Ruwa, Ruwa owo, alembawasa nawaongoye,

² Azaria mana o Hoshaia, Yohanani mana o Karea na wandu wose walawode sonu, wakawia Yeremia: “Mndumii-Ruwa, Ruwa odu, alekuduma iyo uluwie lulahende Misri, lukaepfo pfo.

³ Baruku mana o Neria, nakusuwia kodu kundu luwiko mawokonyi ha Wakaldayo waluwahe ang'u waluduo osamiṟonyi Babeli.”

⁴ Kyasia, Yohanani mana o Karea na Wanene wose wa shida hamu na wandu wose wakamina kilya Mndumii-Ruwa alehamba ke wakae kiidi kya oruka lo Yuda.

⁵ Naho Yohanani mana o Karea na wanene wose wa shida wakaduo wandu wose wa Yuda wawetsuhae iwo wawewuuye orukenyi lo Yuda wawuka mkambonyi yose wawenyanyaṟikie;

⁶ wasoṟo na waka, wana wa womi na wa kika na mangi na orio mndu ichu Nebuzaradani msongoru o waringi, awedeye Gedalia mana o Ahikamu, mchuku o Shafani, wakaweduo Yeremia na Baruku mana o Neria,

⁷ wakahenda orukenyi lo Misri wakashika mṟinyi Tahpanesi. Nyi wudo waleleha iindia kilya Mndumii-Ruwa alededa.

⁸ Kyasia idedo lya Mndumii-Ruwa likachea Yeremia ipfo Talpanesi:

⁹ “Duo maho hang'anyi, nohaṟike kiidi kya chokaa ya matofaṟi kichuminyi kya mba ya mangi Farao mṟinyi fo Tahpanesi, wandu wa Yuda wawonyi.

¹⁰ Kiidima uwawie kudi: Ambuyenyi, inyi njechiduma na iende Nebukadneza, mangi ya Babeli, mṟundi oko, nao nechiwika loṟika loke lo wuitoṟi huye ya maho-ha njihaṟikie iya, na iala kai lya wumangi huyake.

¹¹ Ili echishika nechirumatsa oruka lu lo Misri. Iwo wai wateseheṟe ipfa ko ndaṟe, wechipfa ko ndaṟe, wai wateseheṟe idao wupfungo, wedao wupfungo; wai wateseheṟe ipfia shidenyi wechipfia shidenyi.

¹² Inyi njechiatsa modo kiidi kya mahekalu ha maruwa ha Misri na Nebukadneza nechikombetsa kombi maruwaho ko modo ang'u nahaduo wupfungonyi mṟasa Babeli. Nechisanja oruka lu lo Misri cha ili mlisi aiwuta icheri kiidi kya nguwo yake na iwuka Misri ai mbinzi.

¹³ Nechifunja mnaṟa ya kiṟingishio ikeri ipfo Heliopoli orukenyi lo Misri, na mahekalu ha maruwa ha Misri nechihakombetsa ko modo.”