YEREMIA 42 - Bibilia Kui Mdedie fo Kimochi

Wandu wa oruka waterewa Yeremia nawaterewie

¹ Nahong'u wanene wose wa machekeṟo, Yohanani mana o Karea, na Azaria mana o Heshaia kimu na wandu wose, watutu ko wang'anyi,

² wakahendia Yeremia, wakambia, “Hoi keadanyia kiterewo kyadu na iluterewia ko Mndumii-Ruwa, Ruwa opfo, so luletsuhaa kipfa luwefoi, kyaindi wulalu lui waangu tupu, chandu uwonyi.

³ Mndumii-Ruwa, Ruwa pfo, naluloṟe chandu akundi lumwoshe na kilya akundi luṟunde.”

⁴ Yeremia kawahaluo, “Kicha; ngaicho. Njechiterewa Mndumii-Ruwa, Ruwa onu, chandu moterewa; kindo kyose Mndumii-Ruwa echinjihaluo, njechimuwia; njechimuṟika kindo kyosepfo.”

⁵ Kyasia, wandu-wo wakawia Yeremia, “Mndumii-Ruwa nawe mṟingishi o lohi na mhendeli kiidi kyadu kokoya lulechiṟunda chandu Mndumii-Ruwa, Ruwa opfo echikuwia uluwiye.

⁶ Kiwe kicha ang'u kiwicho so lochiindia ṟu lya Mndumii-Ruwa, Ruwa odu ichu lukuduma koke kundu mbonyi tsadu tsichie ili lochiindia Mndumii-Ruwa, Ruwa odu.”

⁷ Komeidaho mfiri ikumi, idedo lya Mndumii-Ruwa likachea Yeremia.

⁸ Kyasia Yeremia kalaha Yohanani mana o Karea, na wasongoru wose wa machekeṟo kimu na wandu wose watutu ko wang'anyi, kawawia,

⁹ “Mndumii-Ruwa, Ruwa o Israeli ichu mulenjiduma koke njiduo kiterewo kyanu nahamba adi.

¹⁰ Kokoya mochikaa kiidi kya oruka lu, kyasia njechimuwika, ma njechimuwunduopfo, njechimuwaya ma njechimukuṟuopfo; kipfa njechiilacha mahiyo kya mawicho halya njilemuwutia.

¹¹ Mulaowuo mangi ya Babeli ichu mumuowoye: ee da, mulamwowuo manya le. Nyi inyi Mndumii-Ruwa ngahamba. Inyi njii hamu nanyo imukiṟa na imuringa kiidi kya mawoko hake.

¹² Njechimusaṟia na ihaluo mangi namusaṟie namude orukenyi lonu.”

¹³ Kyaindi mukahamba: “Lukaundi ikaa kiidi kya orukalu-pfo; mukada mlaindia ṟu lya Mndumii-Ruwa, Ruwa onu,

¹⁴ mukahamba ke mochihenda ikaa Misri, kundu mulechiwona shida manya iicho ṟu lya iranda ma ituṟa kando,

¹⁵ kyasia adanyienyi chandu Mndumii-Ruwa amuwia nyo mtsuhae wandu wa Yuda. Mndumii-Ruwa, Ruwa o Israeli, nahamba adi: Kokoya mukuteseheṟie ihenda orukenyi lo Misri na ikaapfo,

¹⁶ kyasia, shida mushiowoye shechimkoya ipfo ipfo Misri, na njaa muiowoye yechimwoosha iya njiwawo itane Misri, na ipfo muwepfiia-pfo.

¹⁷ Wandu wose wawode makusaṟo hehenda Misri na ikaapfo wechipfa njaa na ndaṟe mbicho kulechideo pfo ma mndu mokia kya mawicho-ho njechimuendie.

¹⁸ Kipfa inyi Mndumii-Ruwa Menyi Matorito, Ruwa o Israeli, ngahamba njidi: Chandu nyashi yako na tuke yako ilehoya wandu wa Yerusalemu, nyi wudo tuke yako yechimuhoya nyo, kokoya mochihenda Misri. Mochiwa kirumo, kiṟihisho, oseso na sonu. Mochiwonase iyapfo.”

¹⁹ Yeremia kawia wandu: “Nyo Wayuda muletsuhaa, Mndumii-Ruwa nalemuwia mulahende Misri. Manyenyi na pata ke inu ngamuwawasa ke

²⁰ momedeko, mowika moo yanu kiterengionyi. Kipfa mulenjiduma ko Mndumii-Ruwa, Ruwa odu, na kyose Mndumii-Ruwa, Ruwa odu echikideda nuluwie, naso lochiinutsia.

²¹ Inu nyi ngamuwia indi moindia kyose Mndumii-Ruwa, Ruwa onu anjiduma njimuwie-pfo.

²² Kyasia, manyenyi ke handuho mulangie ihenda kaapfo mochipfiapfo ko shida, njaa na ndaṟe.”