YEREMIA 41 - Bibilia Kui Mdedie fo Kimochi

¹ Kushikie meri fo mfungade, Ishmaeli mana o Nethania, mchuku o Elishama, o kishari kya mangi, umu o wasongoru wang'anyi wa mangi, naleshika Mispa ko Gedalia keoshana na wandu ikumi. Kiheri wawekeri ilya kelya ipfo Mispa,

² Ishmaeli mana o Nethania kimu na walya ikumi, walekure wakahoya Gedalia mana o Ahikamu mchuku o Shafani wakambaha. Gedalia nyi awemsambuṟe nyi mangi ya Babeli nawe mwitoṟi o oruka.

³ Ishmaeli kawewaha Wayuda wose wawei kimu na Gedalia ipfo Mispa na wandu wa mbahanyi wa Wakalidayo wawei handuho.

⁴ Mkonu fumu fokiida Gedalia amewoho,

⁵ kulawode mndu ma umu amemanya mbonyi tso, kulecha wandu makumi nyanya (80) wawukie Shekemu, Shilo na Samaria. Waweodie ngerero tsawo na waweṟee nguwo tsiatukie na mbihu yawo injisaṟesaṟe. Waleende mwano ya mso na ubani shiwiko hekalunyi lya Mndumii-Ruwa.

⁶ Ishmaeli mana o Nethania, nalehenda nja ya mṟi iwaambia kechifuha. Kekarisana nawo, kawawia, “Idenyi na mba ko Gedalia mana o Ahikamu.”

⁷ Wekishika mṟinyi, Ishmaeli mana o Nethania hamu na wandu walya ikumi wawei kimu nao, walewaha wandu-wo na ikumba mnying'a yawo ṟungunyi lya mṟinga.

⁸ Kyaindi kuwewode wandu ikumi wawei kiidi kya kamba lyo likawia Ishmaeli: “Hoi kulakuso ma kulaluwahe kipfa kuwode kisa king'anyi kya ngano, shayiri, mafuda na wuki shishiṟike mademenyi.” Nawo wakawada na moo.

⁹ Ṟungu lilya lya mṟinga Ishmaeli alekumbapfo mnying'a ya wandu walya alewawaha liwekeri lilya ling'anyi mangi Asa awelisumie lyekuṟisa na Baasha mangi ya Waisraeli. Ishmaeli mana o Nethania, naleichuṟa ṟungu lyo mnying'a ya wandu alewawaha.

¹⁰ Kiidima, Ishmaeli naleduo wana wa kika wa mangi wapfungo na wandu wose waletsuhaa Mispa, wandu Nebuzaradani, mnene o waringi aweinengie Gedalia mana o Ahikamu. Ishmaeli mana o Nethania, naleduo iwo wupfungo kakure, kahenda ko Waamoni.

¹¹ Kyaindi Yohanani mana o Karea, hamu na wasongoru wa machekeṟo wechiicho kya wuwicho wo Ishmaeli mana o Nethania alewuuta,

¹² walesanyia wandu wawo wose wakahenda ikapana na Ishmaeli. Walemkoya kufui na nduwa ing'anyi ikeri Gibeoni.

¹³ Wandu wose walewado na Ishmaeli wekiwona Yohanani mana o Karea, hamu na wasongoru wose wa machekeṟo, walechihiyo mnu.

¹⁴ Kyasia wandu wo wose iwo Ishmaeli awemewaduo wapfungo wa shida wuka Mispa, walehaluka, wakawuya numa, wakahendia Yohanani mana o Karea.

¹⁵ Kyaindi Ishmaeli mana o Nathania, hamu na wandu nyanya waleashuka ko Yohanani wakadichia ko Waamoni.

¹⁶ Nduma, Yohanani mana o Karea hamu na wasongoru wose wa shida wawei kimu nao waleduo wandu wose waletsuhaa, iwo Ishmaeli mana o Nathania awewadaye wupfungo kuwuka Mispa amewaha Gedalia mana o Ahikamu, wakeri nyi askari, waka, wana na manzenge. Yohanani kawawihiṟa wose kuwuka Gibeoni.

¹⁷ Kyasia wakakuhendia kowo, wakakaa ipfo Geruthi Kimahamu kufui na Bethlehemu wakusirie iida na orukenyi lo Misri kipfa

¹⁸ waweowoye Wakalidayo wokia kiheri kya Ishmaeli mana o Nethania, alewaha Gedalia mana o Ahikamu ichu mangi ya Babeli awemsambuṟie nawe mwitoṟi o oruka.