YEREMIA 40 - Bibilia Kui Mdedie fo Kimochi

Yeremia akaa na Gedalia

¹ Idedo lilechea Yeremia kuwuka ko Mndumii-Ruwa kiheri kya Nebuzaradani mnene o waringi wa mangi, kiheri Yeremia aleinengo momu fowuka Rama. Mnene cho naleduo Yeremia ampfunge na mshe, kamduo kimu na wapfungo wengi wa shida wose wa Yerusalemu na Yuda iwo wawedao Babeli osamiṟonyi.

² Mnene cho o waringi naleduo Yeremia kambia, “Mndumii-Ruwa, Ruwa oko naleonguo mawicho hechikaa hakoye handu ha.

³ Na wulalu Mndumii-Ruwa nainutsia idedo lilya chandu alehamba, kipfa nyo mose muledekio Mndumii-Ruwa mulakunde imwindia, kindo ki kyamutowokia .

⁴ Kyasia! Inu njipfunguo msheyo mawokonyi hapfo. Kokoya kekuchihiṟa ihendesana na inyi mṟasa Babeli, naho luhende kimu, inyi njechikuringa necha. Indi kowona kilakuchihiṟa ihendesana na inyi mṟasa Babeli, kulache. Umanye ke nochiidima ihenda kundu kose kiidi kya oruka lu; kyasia kuhendie kose owona kukucha ihenda.

⁵ Kodumbuo ikaa iya, naho uwuye ko Gedalia mana o Ahikamu, mchuku o Shafani, ichu mangi o Babeli alemneenga wuitoṟi wo mṟi yose ya Yuda, ukae nao kiidi kya wana wawama wengi. Sile kudo, henda kose owona nyi kikicha ihenda.” Kyasia mnene ulya o waringi kainenga Yeremia shemtarama na shindo sha nga, kiidima kamda nakuhendie.

⁶ Kyasia Yeremia kahenda Mispa ko Gedalia mana o Ahikamu, kakaa kimu nao na waletsuhaa kulya orukenyi.

Gedalia mchili o Yuda

⁷ Wanene wose wa matorito wai wado kulya orukenyi, wekiicho ke mangi o Babeli naleshimbuo Gidalia mana o Ahikamu, nawe mnene o oruka, na naledambikio wasoṟo, waka na wana, wai wandu wakiwa walawode kindo manta kiidi kya oruka lulaledao osamiṟonyi lo Babeli,

⁸ wakahendia Gedalia ipfo Mispa. Wandu wo nyi Ishmaeli mana o Nethania, Yohanani na Yonathani wana wa Karea, Seraya mana o Tanhumethi, wana wa Efai awuka Netofa, na Yezania mana o Maakathi; wose waleoshana na wandu wawo.

⁹ Gedalia kalya nyamu oshangunyi lowo na matorito hawo kechihamba: “Mulaowuo iṟundia Wakalidayo. Kaenyi orukenyi muṟundie mangi ya Babeli, na mbonyi tsanu tsechimuhendia necha.

¹⁰ Inyi njechikaa Mispa njiwe mwongochi onu ko Wakalidayo iwo waicha na kodu, indi onyo sanyienyi mvinyo na ifuringa necha, ndunda tsa kwari na mafuda, mkae kiidi kya mṟi yo muiitoṟia.”

¹¹ Kake wandu wa Yuda wawei orukenyi lo Moabu na kiidi kya Waamoni na orukenyi lo Edomu na njoruka tsingi, wekiicho ke mangi ya Babeli naweinengie momu wandu wa Yuda wengi wakae Yuda na ke nawewikie Gedalia mana o Ahikamu, mchuku o Shafani nawe mwuitoṟi owo,

¹² wose walewuya kulya kundu wawerahanyikie na ihenda orukenyi lo Yuda ko Gedalia ipfo Mispa. Walehaa sabibu na ndunda tsa kwari tsifoi mnu.

Gedalia awoho

¹³ Kyasia Yehonani mana o Karea hamu na wasongoru wose wa matorito hawuka mṟinyi, haleshika ko Gedalia, ipfo Mispa wakambia,

¹⁴ “Ngesa, na uichi mbonyi ke Baali mangi ya Waamoni, nadumie Ishmaeli mana o Nethania nakuwahe?” Kyaindi Gedalia mana o Ahikamu, nalaidikie madedo hawo.

¹⁵ Kiidima, Yohanani mana o Karea, kadeda na Gedalia kiṟika ipfo Mispa kambia, “Leka njihende iwaha Ishmaeli mana o Nethania, ma kuwode mndu oose echimanyapfo. Kitewe o nakuwahe nki na wandu wose wa Yuda wakusanzie iya warahanyike na Wayuda waletsuhaa waarisike?”

¹⁶ Indi Gedalia mana o Ahikamu, kawia Yohanani mana o Karea, “Kulawute kudo! Mbonyi tso uitsihamba kya Ishmaeli chi tsa lohi pfo!”