YEREMIA 4 - Bibilia Kui Mdedie fo Kimochi

Ndaho ye dumbuya

¹ Kokoya okunda iwuya, iyo Israeli, Mndumii ahamba, “Nochiwuya na koko inyi; na kokoya okunda iwuta ngafu ii kidi kyapfo, ilakae kufui na iyo nyi ochikia.

² Na iyo nyi wudi ochilya nyamu kui Rina lya Mndumii kui wukilohi, wusumuhanyi na wuhendeli, kochihamba, ‘So Mndumii ai na moo, Nlyondi mkambo fo wandu wechiwikio ona nyio, nawo wechimṟumisha.’”

³ Nyi wudi Mndumii awia wandu wa Yuda na Yerusalemu: “Henda demenyi shahu shanu, ma mulawaaye mshenyi.

⁴ Halukienyi Mndumii cha wandu wadine mrima nyo wandu wa Yuda na wenyi Yerusalemu; nyashi yako ilamkooye cha modo, ikaaka kulawode mndu moirumisha, kipfa kya wuwicho wo mawuto hanu.”

Yuda yaowesho nyi ipufukio

⁵ Hambenyi kiidi kya Yuda, onguonyi kiidi kya Yerusalemu, na ihamba, “Kapenyi iranda kiidi kya oruka, fahiya mnu na ihamba sanzenyi handu hamu, luide kidi kya mṟi iwode omombo.”

⁶ Irienyi bendeṟa huye mhende Sioni; dichenyi mulakeleo, kundu lukukae kipuo; kipfa njiende mawicho wokia mtsudu, na orumatso lung'anyi mnu.

⁷ Mwiso fowoka kiṟaṟonyi kyafo, nyi fo forumatsa mkambo fo wandu; fowoka ihenda ipfo na ipfo, fowuka handu fuichiwie; fochiende wukiwa wung'anyi, na oruka lochideo mrapu kulawode modeo-ho.

⁸ Kokoya mbonyi nyi wudo tsii, ṟaenyi nguo tsa masaṟa; fihiṟenyi na ikuinadia hamu na ikuotoya; kipfa nyashi njiwawo ya Mndumii ilakunda iololia na iluda.

⁹ Kipfa mfiri-fo, Mndumii ahamba, “Mrima fo mangi fochideka na mrima fo wanene wa wandu wake, na wakohanyi wechiṟihiyo, na waikimbi wechisaangia.”

¹⁰ Na inyi ngahamba, “Hoi Mndumii-Ruwa! Na kya lohi omelemba mnu wanduwa na Yerusalemu kochiwawia! Mochiwada ofoṟo; indi oshu lomeida kiidi kya mrima ya wandu-wa!”

¹¹ Mandi halya wandu wa Yerusalemu wechiwio idedo-li, “Otanu lo modo luwukie owerihu lo nuka kuhoye olele lochihendia mana o waka o wandu wako, lochiwa otanu loela ma otanu loilisha-pfo.

¹² Nyi otanu sa luapfinya kota tsose lochicha kipfa kyako; wulalu inyi njechianduo kipfa kya ikyo.”

Yuda nyi amṟingichie nyi wakituwa

¹³ Ambuya! Mkituwa opfo nechido huye cha mapuchi, na magari hake ha shida hechiwa cha kiwiriwiri, farasi tsake tsiichi iwikia mteṟa kota owishi. Ochia lodu! Kipfa lunyamaṟikie.

¹⁴ Iyo Yerusalemu sanja mrima fopfo ulawade wuwicho, kundu uidime ikia. Mahio hapfo mawicho hechikaa kiidi kyapfo ushike indii?

¹⁵ Kipfa njiichuo ṟu lyeedia mbonyi wokia Dani, ihamba ideko kuwokia shitoṟomoso sha Efraimu;

¹⁶ Wienyi wandu wa mkambo mbonyi; ambuyenyi, onguonyi kya Yerusalemu, Wakituwa wacha wawuka oruka lo kuleshe waideda kya mṟi ya Yuda.

¹⁷ Cha wandu wairinga mdemi, wafutengetie riti, kipfa walenjileha inyi, Mndumii ahamba.

¹⁸ Mawuto hapfo na ohendo lopfo lokuendie ishi, iwu nyiwo wuwicho wopfo, kipfa wui wuwawo, nylohi wushikie kiidi kya mrima fopfo.

Fowa ya Yeremia ko wandu wake

¹⁹ Mawawio! Mawawio! Ngawawio kiidi kya mrima foko! Mrima foko fuiṟewe kiidi kyako njiidima itsiapfo kipfa fuicho ṟu lya iranda lya shida.

²⁰ Orumatso numa ya orumatso lomehambo, kipfa oruka lose lunyamaṟikie; mahema hako hawado shidenyi na shitambaa sheshikia matiṟishenyi shadao kui oweṟe.

²¹ Njiambuye bendeṟa mṟasa indii, njiicho ṟu lya iranda mṟasa indii?

²² Kipfa wandu wako nyi matondo, wanjiichi-pfo; nyi wana wawuṟie wuṟango, walaidima imanya wai waṟango iwuta mawicho; indi iwuta mecha wawode wurango-pfo.

Mawonesio ha Yeremia ha orumatso luicha

²³ Njileambuya oruka kuwewode kindo maomndupfo; Njileambuya ngina, tsiwewode sa-pfo.

²⁴ Ngaweambuya Mafumvu naho haweidedema, naho hawetandauka ipfo na ipfo.

²⁵ Ngaambuya njilawone mndu ma umu, ndehe tsose tsihendie kuwodeho ma imu pfo.

²⁶ Ngaweambuya-se mdemi fuweṟee mnu fui mrapu, na mṟi iya yose iwundukie oshangunyi lo Mndumii, kipfa kya nyashi yake njiwawo.

²⁷ Kipfa Mndumii nahamba adi “Oruka lochikapa kilio na ngina tsiiwuo;

²⁸ kipfa inyi ngadeda isho na ikusaṟa iinutsia, manya njechihamba samanya ma njiambuye numa njide-pfo.”

²⁹ Mṟi fose fodicha kipfa kya mtiṟi fo frasi tsa shida na wenyi mfi yelasa; wedichia ngeṟenyi wadoya ngaṟahambenyi tsa maho; orio mṟi fui fusame, kuwode ma umu mokaapfo-pfo.

³⁰ Na iyo ili ochidao wupfungo, Nochiwika kuda Manya koṟaa nguo tsa kimande, na ikuchopa woṟaa sahabu, na ishia meso hapfo wuiwu nyi ukuloṟa ke nyi ui mcha kya wulya; wakunde wapfo wakumina na ikupiṟa waishiha ikusoka moo.

³¹ Kipfa ngaicho ṟu lya ifihiṟa cha mndu mka kiheri kyake kya mawawio, ṟu lya mndu aiwawio, cha mndu mka afee mana oke o kuwoka, ṟu lya mana o waka o Siyoni, aikuwanza naidime isanyia pfinya, na ihoṟuo mawoko hake kechihamba, ochia loko wulalu, kipfa ngalehela oshangunyi lo wawaahi.