YEREMIA 39 - Bibilia Kui Mdedie fo Kimochi

Iwado lya mṟi fo Yerusalemu

¹ Kushikie meri fo ikumi fo maka fo kenda fo wuchili wo Sedekia mangi ya Yuda, Nebukadneza mangi ya Babeli kashika na ichekeṟo lya shida lyose icha isaṟikia mṟi fo Yerusalemu, kafutengetia.

² Na kiidi kya mfiri fo kenda fo meri fo kana, maka fo ikumi na limu fo wuchili wo Sedekia, ora lo omombo lo mṟi lulewunduyo.

³ (Kyasia wanene wa wandu wa wa mangi ya Babeli waleida na ikaa kiidi kya mongo fo makidi hawi: Nergal-Sharera, Samgar-nebo, Sar-sekimu mnene o wanzenge na Nergal-shareza mnene o Walasha, kimu na wanene wengi wose wa mangi ya Babeli.)

⁴ Sedekia mangi ya Yuda na Waasikari wake wose wekiwawona, wakasheṟuka. Wakawuka nja ya mṟi kio, wechiidia mdeminyi fo mangi, kichuminyi kya makidi hawi ha njomombo tsiwi, wakahenda ora lo Araba.

⁵ Indi ichekeṟo lya Wakalidayo walewaosha wakawada Sedekia mpfungo rendewelenyi ya Yeriko. Wekimduo wakamshitsa ko Nebukadneza, mangi ya Babeli ipfo Ribla, orukenyi lo Hamathi, nao kamwanduya.

⁶ Ipfo ipfo Ribla, mangi ya Babeli kawaha wana wa Sedekia oshangunyi lo ndeawo. Kawewaha wanene wose wa Yuda.

⁷ Kiidima kakuṟuo meso ha Sedekia kampfunga na mshe, kundu namduo Babeli.

⁸ Wakalidayo walekoṟa mba ya mangi na modo, na mba tsa wandu; wakawunduo njomombo tsa Yerusaleumu.

⁹ Kyasia Nebuzaradani, mnene o waringi wa mangi, kaduo osamiṟonyi Babeli, wandu wawetsuhee mṟinyi na walya walekudambika koke na wandu walya wose waweipfo.

¹⁰ Kyaindi Neburadani mnene o waaskari waringi, naleda wandu maata wakiwa walawewode kindo kyose orukenyi lo Yuda, kawahawia madema ha mzabibu wakaweinengo handu hedema kiheri nakyo.

Yeremia apfunguyo

¹¹ Nebukadneza mangi ya Babeli naweinengie Nebuzaradani mnene o waringi, iwawaso lirianyi na Yeremia.

¹² “Duo Yeremia umringe necha ma kulambike kifaṟe; umbutie chandu echikuwia.”

¹³ Kyasia Nebuzaradani mnene o waṟingi, Nebushani, Nergal-shereza hamu na wanene wasongoru wose wa mangi ya Babeli, wakaduma wandu wawute Yeremia kulya mbenyi ya waringi.

¹⁴ Wakadambika Yeremia ko Gedalia mana o Ahikamu, mchuku o Shafani, namduo kanyi koke. Yeremia kakaa na wandu wengi wenyi oruka.

Kikusirio kya Ebedmeleki

¹⁵ Idedo lya Mndumii-Ruwa lilechea Yeremia kiheri awempfungie mbenyi ya waringi.

¹⁶ “Henda uwie kudi Ebedmeleki, mndu o Ethiopia: Mndumii-Ruwa menyi matorito, Ruwa o Israeli nahamba adi: Ambuya inyi njechiinutsia, mbonyi tsilya tsose njilehamba tsirianyi na mṟi fo ma chi mbonyi njicha pfo. Mbonyi tso tsechiinukia mfiri fo ochiwona kumonyi.

¹⁷ Kyaindi mkonu fo njechikukiṟa iyo, ma ochidambiko mawokonyi ha wandu uwaowoe pfo.

¹⁸ Nyi kya lohi njechikukiṟa ma ochiwohio shidenyi pfo; nochiiṟimiṟa ochiashuo moo fopfo kipfa kya injiidikia inyi. Nyi inyi Mndumii-Ruwa ngahamba.”