YEREMIA 38 - Bibilia Kui Mdedie fo Kimochi

Yeremia ai ṟungunyi lya mṟinga

¹ Shefatia mana o Matani, Gedalia mana o Pashuri, mana o Malkia, waleicho madedo Yeremia aleongoya wandu wose kechihamba,

² “Mndumii-Ruwa nahamba adi: Mndu ose echitsuhaa kiidi kya mṟi fu nechipfa ko shida, njaa na ndaṟe; kyaindi ulya echikure na ikudambika ko Wakalidayo, nechikaa na moo. Nechiwa nambade shidenyi na nechikaa na moo.

³ Mndumii-Ruwa nahamba kya lohi mṟi fu fochidambiko mawokonyi ha mbahanyi ya Mangi ya Babeli na idao wupfungo.”

⁴ Wanene wakawia mangi, “Kiwaṟi mndu chu nawoho kipfa naifunja mrima ya Waaskari wo wawade mṟinyi kimu na wandu wose, ko ihamba madedo cha iho. Ichu alangie wandu wa mecha pfo, indi nyi mawicho.”

⁵ Mangi Sedekia kahamba, “Kyasia mndu-chu nai mawokonyi hanu; inyi njechiidima imuima-pfo.”

⁶ Kyasia wakahenda wakawada Yeremia wakamsotsia ṟungunyi lya mṟinga lya Malkia mana o mangi liwei kiidi kya mba ya waringi: Wakasotsa Yeremia ko kiwoho. Ipfo ṟungunyi kuwewode mṟinga pfo kyaindi nyi opuṟu, Yeremia kasoṟowia kulya opuṟunyi.

⁷ Indi Ebedmeleki, mnzenge mndu o Ethiopia awekeṟunda mbenyi ii ya mangi, kawio mbonyi ke walesotsia Yeremia ṟungunyi kiheri kyo mangi nawechumia kufui na kichumi kya Benyameni.

⁸ Nahong'u Ebedmeleki kahendia mangi, kambia,

⁹ “Mndumii oko mangi, wandu wa wawuta kindo kiwicho mnu nakamu. Wasoṟowitsia mwikimbi ulya Yeremia ṟungunyi na kyalohi nechipfa kipfa kya njaa kipfa kuwodese kando mṟinyi pfo.”

¹⁰ Nalyo mangi kawia Ebedmeleki mndu ulya o Ethiopia, “Duo wandu waṟaṟu wuka iya uhende iwuta Yeremia kulya ṟungunyi, alamepfa.”

¹¹ Kyasia, “Ebedmeleki kaduo wandu wo kahenda kimu nawo mṟasa mbenyi ya mangi wakaida na kikumbinyi kya mba ya mangi. Ebedmeleki kaira nguwo tsilemeṟao na masaṟa kasotsia Yeremia kulya ṟungunyi na kiwoho.

¹² Kiidima Ebedmeleki ulya o Ethiopia kawia Yeremia, ‘Wika masaṟaho makahonyi hapfo nduma uitse kiwoho kyo wanda ya masaṟaho,’ Yeremia kawuta ado.

¹³ Kiidima wakakuruo Yeremia na kiwoho kilya wakambuta kulya ṟungunyi. Numa ya isho, Yeremia kakukaya kiidi kya mba iya ya waringi.”

Sedekia aterewa mbonyi ko Yeremia

¹⁴ Kuwewode kiheri mangi Sedekia awekundi iwona muikimbi Yeremia. Kyasia kaduma wandu wahende ilaha Yeremia nache naide mongo fo kaṟaṟu fo hekalu lya Mndumii-Ruwa. Mangi kawia Yeremia, “Njikundi ikuwesa idedo liliwe; ma kulanjiṟike kindo manya kimu.”

¹⁵ Yeremia kahaluo Sedekia, “Ngesa, ngakuwia lohi ochinjiwaaha? Na kokoya ngakuinenga oloho ochinjiadanyiapfo.”

¹⁶ Nahong'u mangi Sedekia kaliia Yerusalemu nyamu ko kiṟika kechihamba, “So Mndumii-Ruwa menyi moo, njechikuwaha ma ikudambika mawokonyi ha iwo wakundi ikuwaha pfo.”

¹⁷ Kyasia Yeremia kawia Sedekia, “Mndumii-Ruwa Menyi Matorito, Ruwa o Israeli, nahamba adi: ‘Kokoya okuuta kumonyi na ikudambika mawokonyi ha wanene wa mangi ya Babeli, nochikiṟa moo fopfo na mṟi fu fochirumatso na modo pfo, na iyo na wandu wa kishari kyapfo mochideo na moo.

¹⁸ Kyaindi ulamekuuta kumonyi na ikudambika mawokonyi ha wanene wa mangi ya Babeli, nahong'u, mṟi fu fochiwado shida na Wakalidayo nawo wechifurumatsa na modo, na iyo ochiidima ikuletsa mawokonnyi hawo pfo.’

¹⁹ Mangi Sedekia kawia Yeremia, ‘Njiowoye Wayuda waledichia ko Wakalidayo. Njechiidima idambiko kowo wakanjilisa wukiwa.’”

²⁰ Yeremia kambia, “Ochidambiko kowopfo. Wulalu iyo india iki Mndumii-Ruwa ahamba, chandu njikuwia, na mbonyi tsapfo tsechichia na moo fopfo fochikia.

²¹ Kyaindi koleha ikudambika kowo iyo kumonyi na mawokonyi hawo, ishi nyisho shiwonesio Mndumii-Ruwa amenjiloṟa.

²² Ipfo shiwonesionyi, njilewona waka waletsuhaa mbenyi ya mangi ya Yuda wechidao ko wanene wa mangi ya Babeli. Nawo wawehamba wadi: ‘Mbuya tsapfo uwetsiidikie tsakulemba, nawo wakuwinza, kipfa madende hapfo hasoṟowie opuṟunyi, wakahaluka wakakuda.

²³ ‘Waka wapfo wose na wana wapfo wechidao ko Wakalidayo, ma iyo kumonyi ochikiapfo. Nochidao mpfungo na mangi ya Babeli na mṟi fu fochikoṟo na modo.’”

²⁴ Sedekia kawia Yeremia, “Mndu ose nalamanye mbonyi tsi, na iyo ochiwoho pfo.

²⁵ Kokoya wasongoru walaicho ke ngadeda na iyo, numa wakacha ikuwesa, ‘Keluwie kiki ulededa na mangi. Ulaluṟike kindo kyose naso lochikuwaha pfo;’

²⁶ iyo nochiwawia kudi, ‘Njiweiterewa mangi ko ikunyiiṟa mnu nalanjiwihiṟe mbenyi ya wapfungo kanyi ko Yonathani, njilapfiie pfo.’”

²⁷ Kiidima wasongoru walya wakachea Yeremia wakammbesa mbonyi tso, nao kahaluo chandu mangi alempfunda. Nalyo wakada ideda nao kipfa kulawewode mndu alewaicho sumu tsilya tsawo.

²⁸ Yeremia naledeo kiidi kya mba iya ya waringi mṟasa mfiri fulya mṟi fo Yerusalemu fulewado shidenyi.