YEREMIA 37 - Bibilia Kui Mdedie fo Kimochi

Sedekia ahenda iterewa oloho ko Yeremia

¹ Mangi Nebukadneza o Babeli naleshimbuo Sedekia mana o Yosia, nawe mangi ya Yuda handu ha Konia mana o Yehoyakimu.

² Kyaindi Sedekia na wanene wake na wandu wa Yuda walekunda iicho wuikimbi wo Mndumii-Ruwa alewudeda kwi dumbu lya mwikimbi Yeremia pfo.

³ Mangi Sedekia kaduma Yehukali mana o Shelemia, hamu na mkohanyi Sefania mana o Maasela ko mwikimbi Yeremia, wamterewe nawaterewie ko Mndumii-Ruwa, Ruwa owo.

⁴ Mandi ho Yeremia nawewode mkuachie fochumia kiidi kya wandu, kipfa awemekumbo kipfungonyi pfo.

⁵ Kake wandu wa mbahanyi wa Farao wawekure Misri, na wandu wa mbahanyi wa Wakaldayo wawetengetie mṟi fo Yerusalemu wekiicho mbonyi tso wakakure-pfo.

⁶ Nalyo idedo lya Mndumii likachea mwikimbi Yeremia lyehamba:

⁷ “Inyi Mndumii-Ruwa, Ruwa o Israeli, ngahamba njidi: Nochiwia kudi mangi ya Yuda, ichu aleduma unjiterewe handu hake: ‘Ambuya! Wandu wa mbahanyi wa Farao walecha ikutarama, wai kufui iwuya na Misri kowo.

⁸ Na Wakalidayo wechiwuya icha isaṟikia mṟi fu. Wechiwada mṟi fu wupfungo na ifurumatsa ko modo.

⁹ Inyi Mndumii-Ruwa ngahamba mulakulembe muwenyi na ihamba ke wandu wa mbahanyi wa Wakalidayo wechikure, na kya lohi wechikure pfo.

¹⁰ Manya muwechiwinga mamiingi fose fo Wakalidayo waikapana nanyo, wakatsuhaa wa shifaṟe tupu kiidi kya mahema hawo, iwo wawode shifaṟe wechikure warumatse mṟi fu ko modo.’”

Yeremia awado

¹¹ Wandu wa mbahanyi wa Wakalidayo wekiwuka Yerusalemu ikushowa na wandu wa mbahanyi wa Farao wawei hafui,

¹² Yeremia kawuka Yerusalemu kahenda oruka lo Benyameni kundu naambie kenga kya kyoṟa kyake.

¹³ Akeri kichuminyi kya Benyameni, mringi umu elaho nyi Iriya mana o Shelemia, mana o Hanania, kawada Yeremia kambia, “Iyo nyi uidicha woowa uhende ikulunga na Wakalidayo!”

¹⁴ Yeremia kambia, “Ikyo nyi wongo! Inyi njidicha ma ihenda ikulunga na Wakaliayo pfo.” Indi Iriya aleidikia madedo ha Yeremia pfo. Kyasia kambada kamduo ko wanene.

¹⁵ Wanene wakanyashiko kya Yeremia mnu, wakamkapa kiidima wakamkumba kipfungonyi kiidi kya mba ya mṟehi Yonathani iwenjihaluo mba ya wapfungo.

¹⁶ Yeremia kekikaa kipfungonyi mfiri sa ifoi,

¹⁷ mangi Sedekia kamlaha na koke kamwaambia. Mangi kambia handu ha kisekenyi wai mbenyi yake: “Ngesa kuwode idedo lyose liwukie ko Mndumii-Ruwa?” Yeremia kamhaluo, “Yee! Kaengeṟa imbia, ‘Iyo nochidambiko mawokonyi ha mangi ya Babeli.’”

¹⁸ Kiidima Yeremia kawesa mangi Sedekia, “Kiki njiledeko ang'u ngadekio waṟundi wapfo ang'u wandu wapfo, itane onjikumba kipfungonyi?”

¹⁹ Weku waikimbi walehamba, “Mangi ya Babeli echikusaṟikia iyo ma orukalu pfo?

²⁰ Wulalu ngakuterewa unjiadanyie, hoi Mndumii-Ruwa oko mangi. Kulakuso oidikie kiterewo kyako. Hoi mlanjiwihiṟe se kipfungonyi mbenyi ya mṟehi Yonathani, njilache ipfiia pfo.”

²¹ Kyasia, mangi Sedekia kawuta iwawaso ke Yeremia nawiko kiidi kya mba ya waringi kawa moinengo mkate orio mkonu fuwuka ko wekahaṟa itane kiheri iledeka mṟinyi kose. Kyasia, Yeremia kakaa kulya mbenyi ya waringi.