YEREMIA 36 - Bibilia Kui Mdedie fo Kimochi

Yehoyakimu akoṟa paruo injiṟehiye nyi Baruku

¹ Maka fo kana fo wumangi wo Yehoyakimu mana o Yosia, mangi ya Yuda, idedo lya Mndumii-Ruwa likachea Yeremia.

² “Duo kitapu noṟehie pfo madedo hose njilekuwia kya Israeli, kya Yuda na mkambo yose, wokia mafiri halya njilewoka ideda na iyo, kiheri Yosia awei mangi mṟasa inu.

³ Kofia wandu wa Yuda wechiicho kya mawicho halya hose njikusirie iwawutia, kundu orio umu nade ohendo loke luwicho, na inyi njiidime iwahoṟia madeko hawo na wunyamaṟi wowo.”

⁴ Kyasia Yeremia kalaha Baruku mana o Neria. Baruku kaṟehia kiidi kya kitapu madedo hose Yeremia alededa iho Mndumii-Ruwa awemmbie.

⁵ Kiidima, Yeremia kainengia, Baruku mawawaso ha. “Inyi njiwode momu fohenda mbenyi ya Mndumii-Ruwa pfo.

⁶ Indi kiheri kya mfiri fo kuwoka fo ikuotoya, iyo nochihenda oshangunyi lo siṟi yose ya wandu mbenyi ya Mndumii-Ruwa, usome paruo iya njileshe ya madedo ha Mndumii-Ruwa njilekuwawasa uiṟehie chandu njilehadeda. Nochisoma madedo ho hose ipfo kiidi kya siṟi yose ya Yuda waleshika wawuka mṟinyi yawo.

⁷ Kofia orio umu owo nechida ohendo loke luwicho kipfa kwi nyashi na tuke njiwawo.”

⁸ Baruku mana o Neria, kainutsia shose alewio nyi mwikimbi Yeremia kesoma madedo ha Mndumii-Ruwa mbenyi ya Mndumii-Ruwa kuwuka kiidi kya kitapu kyo.

⁹ Nahong'u maka fo katanu fo wuchili wo Yehoyakimu, mana o Yosia, mangi ya Yuda, kiidi kya meri fo kenda, wenyi wose wa Yerusalemu na wandu wose waleshika Yerusalemu wawuka mṟinyi ya Yuda, walehamba mfiri fo ikuotoya oshangunyi lo Mndumii-Ruwa.

¹⁰ Kyasia Baruku kasoma madedo ha Yeremia halya hawei kiidi kya kitapu kilya oshangunyi lo siṟi yose ya wandu mbenyi ya Mndumii-Ruwa, kiṟihenyi kya Gemaria mana o Shafani awei mṟehi. Kiṟiha kyo kiwei kichangalenyi kya huye, kuwode Mongo mhya fo mba ya Mndumii-Ruwa.

Wanene wasomio paruo injiṟehie

¹¹ Mikaia mana o Gemaria, mana o Shafanyi, kekiicho madedo ha Mndumii-Ruwa halesomo hawuka kitapunyi,

¹² nalehenda mbenyi ya mangi kiidi kya kiṟiha kya mṟehi kundu wanene wose wawedamie. Mṟehi Elishama, Delaya mana o Shemaya, Elnata mana o Akbori, Gemaria mana o Shafanyi, Sedekia mana o Hanania na wanene wose.

¹³ Mikaia kawawia madedo hose alehaicho kiheri Baruku alesoma kitapu kilya oshangunyi lo siṟi ya wandu.

¹⁴ Kyasia wanene waleduma Yehuli mana o Nethania, mchuku o Shelemia, njukuṟi ya Kushi, uwie kudi Baruku: “Duo paruo iya injiṟehie uleisoma oshangunyi lo wandu uche nayo iya.” Kyasia Baruku mana o Neri kaduo paruo iya owokonyi loke kawahendia.

¹⁵ Nawo wakambia: “Damia, uisome” Baruku kawasomia.

¹⁶ Wekiicho madedo ho hose, wakaambuyana wawodo nyi wuowu. Wakawia Baruku, “Kiluwaṟi luwie mangi madedo ha hose.”

¹⁷ Kiidima wakawesa Baruku, “Keluwie, kilewa kida koṟehia madedo ha hose? Ngesa Yeremia nalededa, na iyo kohaṟehia?”

¹⁸ Baruku kawahaluo, “O nalededa, na inyi ngahaṟehia ko wino kiidi kya paruo ii.”

¹⁹ Kiidima wanene wo wakawia Baruku, “Iyo henda muhende iowa kimu na Yeremia, ma kulawade mndu oose echimanya handu mui.”

Mangi akoṟa kitapu

²⁰ Kyasia wanene wechiwika kitapu kilya kileshe kiṟihenyi kya Elishama mṟehi o mangi, walehendia mangi ichangalenyi wakamwongoya mbonyi tsose.

²¹ Nahong'u mangi kaduma Yehudi nahende iende paruo iya Yehudi naleiduo aiwuta kiṟihenyi kya Elishamua mṟehi, kasomia mangi na wanene wose wawehoṟoki kufui na mangi.

²² Maheri ho hawei meri fo kenda, na mangi nawei mbenyi yake kiheri kya mbeo, kechioda modo fo makaa.

²³ Nahong'u kudi Yehudi kekisoma ndambu ya kaṟaṟu ang'u ya kaana ya paruo yo inleshe, mangi kadumbuo ndambu tso ko oshu katsiṟukuta kya modonyi fo makaa. Kawuta ado mṟasa paruo yo yose ikasenekia.

²⁴ Ma chandu mangi na waṟundi wake waleicho madedo ho hose waleowuo ma iranduo maṟao hawo ko wukiwa pfo.

²⁵ Ma chandu Elnata, Delaya na Gemaria waleterewa mangi nalakoṟe paruo iya, mangi alewaicho pfo.

²⁶ Mangi kawawasa Yerameeli mana o Seraya mana o Azrieli na Shelemia mana o Abdeli, wahende iwada Baruku mṟehi na muikimbi Yeremia. Kyaindi Mndumii-Ruwa nawewaowishie.

Yeremia naṟehia paruo ingi injileshe

²⁷ Mangi amekoṟa parua iya iwenjiṟehie nyi Baruku chandu aleongoyo nyi Yeremia, idedo lya Mndumii-Ruwa likachea Yeremia:

²⁸ “Duo paruo ingi njileshe, noṟehie madedo hose hawei kulya paruonyi ya kuwoka iho Yehoyakimu, mangi ya Yuda, aleikoṟa modo.

²⁹ Na Yehoyakimu cho mangi ya Yuda iyo nochimbia ke inyi Mndumii-Ruwa ngahamba njidi; o nakoṟa paruo yo na modo na iwesa nki ili Yeremia aṟehia ke mangi o Babeli nechicha inyamaṟa oruka lu na imamiṟa wandu na mando hai na moo hose!

³⁰ Kyasia, inyi Mndumii-Ruwa ngahamba njidi, kirianyi nao ke Yehoyakimu mangi ya Yuda: O echiwada mana modamia loṟikehu lo wuitoṟi lo Dawidi pfo, na mnying'a foke fochikumbo nja kundu kuwode mrike mfiri na mbeo njiwawo kio.

³¹ Na inyi njechimhoṟuo o na oshari loke hamu na waṟundi wake kipfa kya wuwicho wowo. Njechiendie wandu wose wa Yerusalemu, hamu na wandu wose wa Yuda mawicho halya hose mbehambie kyawo ma walasaṟe.”

³² Nalyo Yeremia kaduo paruo ingi njileshe, kainengia Baruku mṟehi mana o Neria nyio aleṟehia madedo hose Yeremia alemwongoya halya hawei paruonyi iya ya kuwoka iya ilekoṟo nyi Yehoyakimu mangi ya Yuda. Madedo hengi cha iho haleengeṟo.