YEREMIA 35 - Bibilia Kui Mdedie fo Kimochi

Yeremia na Warekabu

¹ Idedo lya Mndumii-Ruwa lilechea Yeremia kiheri kya wuchili wo Yehoyakimu mana o Yosia, mangi ya Yuda.

² Henda kanyi ko Warekabu, udede nawo. Kiidima uwaende kiidi kya kiṟiha kimuho kya mba yako inyi Mndumii-Ruwa, uwainenge mvinyo wanyo.

³ Kyasia ngaduo Yaazania mana o Yeremia, mana o Habazimia, na wana wa mae kimu na wana wake wose na kishari kyose kya Warekabu.

⁴ Ngawaende na mbenyi ya Mndumii-Ruwa, kiṟihenyi kya wana wa Hanani mana o Igdalia, mndu o Ruwa. Kiṟiha kyo kiwei kufui na ichangala lya wanene, huya ichangala lya Maaseia mana o Shalumu, mringi o ichangala.

⁵ Kiidima ngaende shirahu na mamboṟiko haichuo mvinyo oshangunyi lo Warekabu wo, ngawawia: “Nyonyi mvinyo.”

⁶ Kyaindi wo wakahaluo, “So lokenyo mvinyo-pfo, kipfa Yonadabu mana o Rekabu, mku odu, naleluwawasa adi, ‘Mlanyo mvinyo; mulanyo nyo muwenyi kyaanya ma wana wanu mlungana.

⁷ Mulawike mba, mulademe ndema, ma mulawade madema ha msabibu. Kyaindi mochikaa kiidi kya mahema mfiri yose ya moo yanu, kundu muwone mkonu ifoi kiidi kya oruka lo muikaapfo cha wahenu.’

⁸ So luleindia kitsitsi iwawaso lya mku odu Yonadabu mana o Rekabu, kya idedo lyo aleluwawasa. So lokenyo mvinyo ma nta pfo. So luwenyi lokenyo pfo ma waka wadu, ma wana wadu wa kisoṟo ang'u wa kika.

⁹ So lokewika mba tsekaa pfo. Luwode madema ha msabibu ma madema ha shilimu na iwaaya mbeu pfo.

¹⁰ So lokekaa mahemenyi na iindia mbonyi tsose lulewawasio nyi mku odu Yonadabu.

¹¹ Kyaindi Nebukadneza mangi ya Babeli kiheri alecha, isaṟikia oruka lo, luledumbuo kecha na Yerusalemu kundu luowe ichekeṟo lya Wakalidayo na lya Waashuru. Ko ikyo wulalu lui iya mṟinyi fo Yerusalemu.”

¹² Kyasia idedo lya Mndumii-Ruwa likachea Yeremia,

¹³ “Inyi Mndumii-Ruwa Menyi Matorito, Ruwa o Israeli, ngahamba njidi: Henda uwie wandu wa Yuda na wose wa ipfo Yerusalemu kuile: Ngesa nyo mochiidima iambia kiloshio kyako na madedo hako?

¹⁴ Iwawaso lilya Yonadabu mana Rekabu, aleinenga wana wake, ke walanyo mvinyo, waleliosha; nawo wekenyo mvinyo mṟasa mkonu fu fo inu pfo, kipfa waindia wuwawaso wo mku owo. Kyaindi inyi njilededa nanyo ngoseṟa na ngoseṟa; nanyo ma mulenjiadanyiapfo.

¹⁵ Ngaweduma waṟundi wako ngoseṟa na ngoseṟa wakeri nyi waikimbi wamuwie orio umu onu nade ohendo loke luwicho, nasae mawuto hake nalekane ipfo kioshionyi keṟundia maruwa hengi. Na mukawuta mudo mochikaa kiidi kya orukalu njileinenga waku wanu nanyo. Indi ma muledeha kudu konu na injiadanyia pfo.

¹⁶ Wana wa Yonadabu mana o Rekabu, walewada iwawaso waledeeyo na mku owo; indi nyo mulenjiindia pfo.

¹⁷ Ko ikyo inyi Mndumii-Ruwa o matorito, Ruwa o Israeli, ngahamba kudi. Njechimuendie wandu wose wa Yuda na wenyi wose wa Yerusalemu mawicho hose njilededa kyawo, kipfa inyi njilededa nawo, indi walanjiadanyie, njilewalaha, indi walanjiidikie.”

¹⁸ Kyaindi Yeremia nalewia adi Warekabu: Mndumii-Ruwa o matorito, Ruwa o Israeli nahamba adi: “Nyo Warekabu muleindia iwawaso lya mku onu, mkawada madedo hake mkaṟunda chandu alemuwawasa.

¹⁹ Ko ikyo inyi Mndumii-Ruwa o matorito ngahamba ke Yonadabu mana o Rekabu echituṟa ma kiheri kimu mana monjiṟundia kitsitsi pfo.”