YEREMIA 34 - Bibilia Kui Mdedie fo Kimochi

Ndumi ko Sedekia

¹ Idedo lya Mndumii-Ruwa lilechea Yeremia kiheri kya Nebukadneza, mangi o Babeli, hamu na wandu wose wa mbahanyi na waitoṟi wose wawei wuyana wawei wanda yake kake na wandu wose wawekeri isaṟikia mṟi fo Yerusalemu na mṟi ingi yose ya mṟasenyi:

² “Mndumii-Ruwa, Ruwa o Israeli ahamba adi: Henda udede na Sedekia, mangi o Yuda mmbie ke inyi Mndumii-Ruwa ngahamba njidi: Ngadambika mṟi fu mawokonyi ha mangi o Babeli, nao nechifukoṟa na modo.

³ Na iyo ochiidima idicha mawokonyi hakepfo, indi nochiwado mpfungo na idao koke; nochiwonana na mangi o Babeli meso ko meso, na ideda nao kyamu ko kyamu, kiidima nochihenda Babeli.

⁴ Indi iyo Sedekia, mangi ya Yuda, inyi Mndumii-Ruwa ngahamba njidi kyapfo: Iyo ochiwooho ko oshu shidenyi pfo.

⁵ Nochipfa kwi ofoṟo. Na, chandu wandu walekoṟa ubani wechiṟika wanene wawo wawei wamangi, na wudo wechikukoṟia iyo ubani na ikukapia kilio wechihamba, ‘Too! Mangi odu napfa!’ Nyi inyi Mndumii-Ruwa ngahamba.”

⁶ Kiidima, mwikimbi Yeremia kaongoya Sedekia, mangi ya Yuda, madedo ho hose ipfo Yerusalemu,

⁷ kiheri ichekeṟo lya mangi ya Babeli, liwekeri isaṟikia mṟi fo Yerusalemu hamu na mṟi ya Lakishi na Azeka, iwekeri mṟi iwetsuhae injiiṟihe nyi omombo.

Mkuachie fo masinga fulawode pfinya

⁸ Ili nyi idedo lilechea Yeremia liwuka ko Mndumii-Ruwa mandi mangi Sedekia amemaa iwika mkundana na wandu wose wa Yerusalemu iinenga mkuachie

⁹ masinga hawo ha Kiebrania ha kisoṟo na ha kika, kundu mndu oose o Kiyuda nalahaluo mano mae isinga.

¹⁰ Wasongoru wose na wandu wose walewika mkundano fu waleidikiana ke walekia masinga ho ha kisoṟo na kika wakuachie, na mndu ose nalawahaluo se masinga. Waleidikiana, wakawalekia wakakuachia.

¹¹ Kyaindi koida ho kiheri wakailacha makusaṟo hawo wakawawada wawe masinga wa kisoṟo na wa kika walya wawewainenge mkuachie, wakawahaluo masinga.

¹² Naaho idedo lya Mndumii-Ruwa likachea Yeremia.

¹³ “Inyi Mndumii-Ruwa, Ruwa o Israeli, ngahamba njidi: Njilewika mkundana foko na waku wanu mandi halya njilewawuta orukenyi lo Misri wai masinga, ngawawia:

¹⁴ ‘Orio maka fo mfungade, orio umu onu nechiinenga manomae mkuachie Myuda amkumbe kawa isinga ko maka iṟandaṟu. Kimuwaṟi muwalekie, walamuṟundie-se! Kyaindi waku wanu walenjiadanyia ma ideha kudu kowo pfo.

¹⁵ Indi mafiri ha kufui nyo nyi mulehaluka, mukawuta chando kiwaṟi oshangunyi loko, mukainenga mkuachie Waisraeli. Wodoyanu na iwika mkundana oshangunyi lomba yako.

¹⁶ Kyaindi oweṟe mukahaluka, mukafanyitsa rina lyako ngafu, kiheri muleduo walya walya mulewalekia wa kisoṟo na wa kika wakakuachia chando wawekundi, mukawatukia iwa se masinga.’

¹⁷ Kwi kipfa kya ikyo inyi Mndumii-Ruwa ngahamba njidi: ‘Nyo mulenjiindia kirianyi na mkuachie fo wanawamaanu Waisraeli-pfo. Kyaisa, na inyi njechimuinenga mkuachie; mkuachie fo iwoho kwi oshu shidenyi, iwoho kwi ndaṟe na njaa. Njechimuhaluo muwe kiṟihisho kiidi kya mangi tsose wuyanenyi.

¹⁸ Wandu waletehia mkundana foko wakaweleha iosha wuwawaso wo mkundana fo wulewikiana na inyi, njechiwawutia cha kilya waletana ihache lilya walelidumbuo makidi hawi na iida kiidi kyalyo.

¹⁹ Wandu wo nyi wo wawei wanene wa Yuda, na wanene wa mṟi fo Yerusalemu, wanzenge, wakohanyi, hamu na wandu njora tsiwi.

²⁰ Wechedambiko mawokonyi ha wekunda iwawaha. Mnying'a yawo yechilio nyi ndehe tsa ruwehu na mando ha ngeṟenyi.

²¹ Na Sedekia mangi ya Yuda, hamu na wasongoru wake, njechiwadambika mawokonyi ha wakituwa wakundi iwawaha; mawokonyi ha ichekeṟo lya mangi ya Babeli lilya lilekure na ida iwasaṟikia.

²² Inyi Mndumii-Ruwa ngahamba: Njechiwawasa nawo wechiwuya mṟi fu. Wechifusaṟikia, wafuwade na ifurumatsa na modo. Mṟi ya Yuda njechiihaluo iwe mrapu ilawade mndu.’”