YEREMIA 33 - Bibilia Kui Mdedie fo Kimochi

Kyasa kingi kya mkusirie

¹ Idedo lya Mndumii-Ruwa likachea Yeremia-se lingi kiheri awei mpfunge kulya mbenyi ya waringi.

² Mndumii-Ruwa ichu alewumba wuyana. Mndumii-Ruwa aleṟundia na iikara wuyana ichu rina lyake nyi Mndumii-Ruwa nalenjiwia,

³ “Njilaha na inyi njechiidikia na ikuwia mbonyi tsing'anyi tsa kiṟikenyi ulalemetsiwone.

⁴ Kipfa, inyi Mndumii-Ruwa, Ruwa o Israeli ngahamba ke mba tsa mṟi fo Yerusalemu na mba tsa wamangi wa Yuda tsilewunduyo kipfa kya itengetio na isaṟikio.

⁵ Wandu wechiheṟia ikoyana na Wakalidayo indi ikyo kechiwa wulya, kipfa maṟungu haichuo mnying'a ya wandu iwo njechiwawaha kipfa kya nyashi yako na tuke yako. Kipfa watana wuwicho wu wose, inyi njechida mṟi fu.

⁶ “Manya kudo, inyi njechikiṟa mṟi fu na iinenga wandu wa oru, njechiwainenga iwemba na ikaa kipuo.

⁷ Njechiinenga wandu wa Yuda oru na wandu wa Israeli wechiwanga chandu wawei ili mbooko.

⁸ Njechisanja njonyamaṟo tsawo tsose na iwahoṟia wuwicho wowo na imina lyawo.

⁹ Mṟi fu fochiwa kitewe kya sia yako, mṟi fo kiṟumi na ifuda oshangunyi lo wandu wa wuyana iwo wechiicho mecha hose njilewawutia. Mkambo ya wandu wechiowuo na idedema kipfa kya mecha na sia njechiendie mṟi fo Yerusalemu.”

¹⁰ Mndumii-Ruwa nahamba: “Kiidi kya mṟi fu muihamba fui wukiwa fulawode wandu ma shuma, ee, kiidi kya mṟi ya Yuda na kiidi kya mtandara ya Yerusalemu itso tsilawode wandu ma shuma, kochiichio se maṟu na seko, maṟu ha sia,

¹¹ maṟu ha wali na sia, maṟu ha waimbi kiheri waiende mwano yeana kiidi kya mba ya Mndumii-Ruwa: ‘Anenyi Mndumii-Ruwa menyi matorito, kipfa Mndumii-Ruwa nai mcha kipfa woloru woke wokaa mlungana.’ Njechiwihiṟia orukalu mboṟa iya yake ya mboko. Inyi Mndumii-Ruwa ngahamba.”

¹² Mndumii-Ruwa menyi matorito nahamba adi, “Handu ha nyi nuka ya msanga ilawode wandu manya shuma na kiidi kya mṟi yake yose, kochiwada maṟa helisa handu walisi wechilisia ho machondi hawo.

¹³ Kiidi kya mṟi ya oruka luwode mafumvu, kiidi kya mṟi ya Shefela na kiidi kya mṟi ya nuka lya Negebu, kiidi kya oruka lo Benyamini, mbai ya mṟi fo Yerusalemu na kiidi kya mṟi ya Yuda, wandu wechiitala machondi hawo. Inyi Mndumii-Ruwa ngahamba.”

¹⁴ Mndumii-Ruwa nahamba: “Mkonu yecha mandi njechiinutsia kyasa kyako njilewikiana na wandu wa Israeli na wandu wa Yuda.

¹⁵ Kiidi kya mkonu yo, ee da, mandi ho, njechioṟisha njana njihoṟotsu kiidi kya oshari lo Dawidi. Njana yo yechiwuta sha wusumhanyi kiidi kya isanga.

¹⁶ Mandi ho isanga lya Yuda lyechikiṟo na mṟi fo Yerusalemu fochikia. Na mṟi fo fochilaho ‘Mndumii-Ruwa nyi Okiṟo lodu.’

¹⁷ Kipfa inyi Mndumii-Ruwa ngahamba njidi: Kochiwuṟika ma indi mofeo nyi Dawidi echiitoṟia Israeli pfo.

¹⁸ Kake na Wakohanyi wa oshari lo Lewi wechikaapfo kitsitsi injihidia wechinjiwutia mwano yemaya modonyi na mwaano ya mso na injiinengia mwano yedasa mlungana.”

¹⁹ Idedo lya Mndumii-Ruwa lilechea Yeremia:

²⁰ “Chandu mulechiidima ifunja mkundana foko njilewika kirianyi kio na mfiri, ke kio na mfiri shilakae chando inyi njileshiwika,

²¹ wudo nanyo mochiidima ifunja mkundana foko njilewika na mṟundi oko Dawidi pfo. Njilewika mkundana na Dawidi ke ipfo koke kochifeo moitoṟia handu hake. Kake, kochikaa pfo wakohanyi wa oshari lo Lewi kitsitsi wechinjihidia.

²² Chando nyenyeri tsa nginehu na msanga fo mbai ya ipalyipalyi fulechiwa itala, nyi wudo njechiengeṟa itala lya wufee wo mṟundi oko Dawidi na wakohanyi wa kishari kya Lewi na wudo wechiengeṟeka.”

²³ Idedo lya Mndumii-Ruwa lilechea Yeremia:

²⁴ “Ngesa, kulemeicho chandu wandu-wa wekehamba inyi Mndumii-Ruwa njilekumbalia kuleshe wandu wa Israeli na wandu wa Yuda, wandu wa mba tsiwi njiletsisambuṟa? Walemina wandu wako, mṟasa iwawona chi mkambo pfo.

²⁵ Kyaindi inyi Mndumii-Ruwa ngahamba njidi: Inyi njilewika mkundana kirianyi na mfiri na kio na iwika njowawaso tsa ruwehu na oruka.

²⁶ Kyasia, nyi wudo kikeri da: njechikumba wafeo nyi Yakobo na Dawidi, mṟundi oko pfo. Njechihoṟotsa umu o kishari kyake naitoṟie wa oshari lo Abrahamu, Isaki na Yakobo. Kipfa njechiwawihiṟia sia yawo na iwasaṟia.”