YEREMIA 32 - Bibilia Kui Mdedie fo Kimochi

Yeremia ahuṟa dema

¹ Idedo lya Mndumii-Ruwa lilechea Yeremia maka fo ikumi fo wuchili wo Sedekia mangi o Yuda, fuwei maka fo ikumi na nyanya fo wuchili wo Nebukadneza.

² Mandi ho, wekapana shida wa mbahanyi tsa mangi o Babeli waletengetia mṟi fo Yerusalemu, na mwikimbi Yeremia nawembike mbenyi ya waringi iwei kanyi ko mangi o Yuda.

³ Kipfa Sedekia, mangi o Yuda nalepfunga Yeremia kehamba, “Kitewe uihamba wuikimbi ke: Mndumii-Ruwa nahamba adi: “Ambuya, inyi njechidambika mṟi fu mawokonyi ha mangi o Babeli, nao nechifuwinga.

⁴ Sedekia mangi o Yuda, echiidima ikushowa alechiwiko mawokonyi ha Wakaldayo pfo, nyi lohi nechidao mpfungo na mangi o Babeli, nechiwonana nao oshangu kwi oshangu na ideda nao kyamu ko kyamu.

⁵ Sedekia nechidao mṟasa Babeli, nao nechikaapfo mṟasa njikusaṟe kiwungi. Ma kokoya Sedekia nechikapana na Wakalidayo echiwingapfo.”

⁶ Yeremia kahamba, “Mndumii-Ruwa nalededa na inyi kahamba:

⁷ ‘Hanameli, mana o ndeo mtutu Shalumu, nechikuchea na ihamba: Huṟa dema lyako likeri Anathothi, kipfa iyo nyi manowama kichikichi, na nuwode wuidimi wusumhanyi wo ilitalaa.’

⁸ Kiidima mho oko Hanameli nalenjichea mbenyi ya waringi chandu Mndumii-Ruwa alenjiwia, ‘Huṟa dema lyako likeri Anathothi oruka lo Benyamini kipfa iyo kikuwaṟi nolitalae. Huṟa ko kiira kyapfo.’ Nalyo ng'u njilemanya ke na lohi liwei idedo lya Mndumii-Ruwa.

⁹ “Kyasia ngahuṟa dema lyo liwei Anathothi, liwuka ko mho oko Hanameli, ngamaa itaa wuhuru woke kiheo kya Shekeli ikumi na mfungade tsa fesa.

¹⁰ Ngaṟehia paruo yeoṟa, ngaikapa mhuri, ngalaha waṟingishi na ihesha fesa iya.

¹¹ Kiidima ngaduo paruo iya njileikapa mhuri, iwewode mbonyi tseṟingishia, hamu na ingi iwei pang'a.

¹² Ngainengia paruo iya yehuṟa Baruku mana o Neria mana o Mahseya oshangunyi lo mho oko Hanameli na wangochi waweṟehie oo paruonyi yehuṟa, na oshangunyi lo Wayuda wose wawedamie kiidi kya mba ya waringi.

¹³ Oshangunyi lo wandu wo wose ngainenga Baruku wuwawaso wu.

¹⁴ Mndumii-Ruwa menyi matorito, Ruwa o Israeli, nahamba adi: ‘Duo paruo tsose tsitsiwi, ii yeoṟa dema injiṟehie na itisiṟo na ii ingi ii pang'a notsiwike nungunyi kundu tsisuṟumo kiheri kileshe.’

¹⁵ Kipfa Mndumii-Ruwa Menyi Matorito, Ruwa o Israeli, nahamba adi: ‘Mba na madema, hamu na madema ha msabibu kiidi kya oruka lu hechihuṟo se.’”

Kiterewo kya Yeremia

¹⁶ Ngamemarisa idambikia Baruku mana o Neria paruo iya yeoṟa dema njileterewa Mndumii-Ruwa njechihamba:

¹⁷ Hoi Mndumii-Ruwa, nyi iyo kumonyi kwi pfinya tsapfo tsing'anyi na wuidimi wopfo, kulewumba ruwehu na oruka.

¹⁸ Iyo nokeloṟa osaṟio lopfo ko shiku sha wandu; indi kowehoṟuo wandu kipfa kya njonyamaṟo tsa waku-wawo. Iyo nyi Ruwa ang'anyi, menyi pfinya, Mndumii-Ruwa o matorito nyilyo rina lyapfo.

¹⁹ Iyo nokesaya kwi wuṟango na nyi okewuta ṟiho; njia tsa wandu tsi kitaṟe oshangunyi lopfo, noketaa orio mndu kihianyi na mawuto hake.

²⁰ Kulya orukenyi lo Misri nulewuta ngata tsing'anyi, na wudo uengeṟa iwuta mṟasa inu kiidi kya Waisraeli na kiidi kya mkambo ingi da, kindo kiinengie komanyika orio handu.

²¹ Kwi maṟiho na shichano uleowesha nasho Wamisri, kowuta wandu wapfo Misri ko pfinya tsapfo tsing'anyi na wuidimi wo pfinya.

²² Kowainenga orukalu uweteṟie waku wawo oruka luisotsa wuki na maruwa.

²³ Nawo waleshika wakaluwada na iluikolonyia. Indi walekuadanyia, manya iosha mawawaso hapfo-pfo. Walewuta chandu ulewawiapfo. Nyi kyo kyatewa wakoyane na mawicho ha.

²⁴ Ambuya, Wakalidayo wasuma maṟungu wotengetia mṟi; wawika wado kundu wafuduo wupfungo; wafusaṟikia. Shida, njaa na mawawio shechitewa mṟi fu fuwado na wandu wo. Nyi lohi mbonyi tsilya kuleikimba tsahoya. Nuwonyi kumonyi.

²⁵ Kyaindi hoi Mndumii-Ruwa nyi iyo ulenjiwia: “Huṟa dema ko fesa nowike wangochi, Ma chandu mṟi fu fowado nyi Wakalidayo.”

²⁶ Nalyo idedo lya Mndumii-Ruwa likachea Yeremia, likahamba,

²⁷ “Ambuya inyi nyi Mndumii, Ruwa o wandu wose; Ngesa! Kuwode kindo kiumu kyose kechiidima injilema?

²⁸ Ko ikyo, Inyi Mndumii-Ruwa ngahamba njidi: Njechiinenga mṟi fu ko Wakalidayo na ko Nebukadneza mangi o Babeli, nao nechifuduo.

²⁹ Wakalidayo wekesaṟikia mṟi fu wechiida napfo na ifukoṟa modo itane fosaramaya hamu na mba wawekedutsia Baali ubani na shidaso shemaya modonyi na iletsia maruwa hengi mvinyo ipfo mbehu ya mba-tso, kundu wanjisohuo mondu.

³⁰ Kipfa Waisraeli na wandu wa Yuda walewuta kindo kyose oshangunyi loko pfo, sile nyi wuwicho tupu wokia uwanake wowo; wandu wa Israeli walewuta kindo kyose pfo, shile nyi injisuiṟa kwi mawuto hawo. Nyi inyi Mndumii-Ruwa ngahamba.

³¹ Mṟi fu fodosa nyashi yako na injilisa wukiwa wokia fowiko itane inu. Koikyo njechifuwuta kuchu oshangunyi loko,

³² kipfa kya wuwicho wose wulewuto nyi Waisraeli na wandu wa Yuda, kimu na wamangi na wasongoru wawo, walekanyi na waikimbi wawo, na weenyi wa Yerusalemu.

³³ Walenjikumba mhongo handu ha shamu shawo; ma kikawa ngamewalosha kitsitsi walanjiadanyie ma iambia shiloshio shako.

³⁴ Walewika sanamu tsa maruwa hawo hesuiṟa kiidi kya mba i imanyikie ko rina lyako wakaifanyitsa ngafu.

³⁵ Wakawikia Baali ruwa o wongo rasio pichinyi lya mana o Hinomu, kundu wawutie ruwa Moleki wana wa kisoṟo na wa kika wawe shidaso, njilewawia ma ikusaṟa ke wawechiwuta kudo pfo, wakatewa wandu wa Yuda wawute wunyamaṟi.”

Kyasa kiwode mkusirie

³⁶ Na wulalu, Mndumii-Ruwa, Ruwa o Israeli, nahamba adi: “Yeremia, wandu wa wahamba ke koshida, njaa na ndaṟe, mṟi fu fochiwiko mawokonyi ha mangi o Babeli. Indi ngahamba:

³⁷ Njechisanyia wandu wawuke kiidi kya njoruka tsose ipfo kundu walerahanyika kipfa kya nyashi yako na isuo, njiwawihiṟe se handu ha wakae kipuo.

³⁸ Wo wechiwa wandu wako na inyi njechiwa Ruwa owo.

³⁹ Njechiwainenga mrima fumu na mhie fumu, waidime injiindia inyi kiheri kyose, kipfa kya kiira kyawo wawenyi na kya wana wawo wechiosha.

⁴⁰ Njechiwika nawo mkundana fo mlungana, njechida njilakuwutia mecha pfo, njechiwika ipfo mrimenyi fowo wuowu na wuindi kundu walanjide se.

⁴¹ Njechichihio iwawutia mecha, njechiwadonga kiidi kya orukalu na iwawutia kya sumhana.

⁴² “Chandu njilewaendie mawicho wandu wa, nyi wudo njechiwaendie mecha chandu ngawika kyasa.

⁴³ Madema hechihuṟo kiidi kya oruka, lu ilo mokehamba oruka lu lui wukiwa luwode wandu ma shuma pfo na Wakaldayo waleduo.

⁴⁴ Wandu wechihuṟa madema ko fesa, wechiteseheṟa paruo tseoṟa, wechitsikapa mhuri, na iwika wangochi kiidi kya mṟi ya Yuda, kiidi kya oruka lo mafumvu, oruka lo mṟi ya Shefela, na kiidi kya mṟi ya nuka ya msanga ya Negebu. Kipfa njemsuṟisha se. Inyi Mndumii-Ruwa ngahamba.”