YEREMIA 30 - Bibilia Kui Mdedie fo Kimochi

Shaasa sha Ruwa ko wandu wake

¹ Idedo lilechea Yeremia liwuka ko Mndumii-Ruwa:

² “Inyi Mndumii-Ruwa, Ruwa o Israeli ngahamba njidi: Ṟehia kitapunyi madedo hose njilekuwia.

³ Kipfa kuwode mkonu ikeri icha njimuwihiṟie sia nyo wandu wako Israeli na Yuda na imuwihiṟa se kiidi kya oruka lulya njileinenga waku wanu, nawo waluoṟe. Inyi Mndumii-Ruwa ngahamba.”

⁴ Itsi nyitso mbonyi Mndumii-Ruwa alehamba kirianyi na wandu wa Israeli na Yuda:

⁵ “Nyi inyi Mndumii-Ruwa njihamba kudi: Koichio ofihiṟo na wuowu, ṟu leowesha manya chi ofoṟo pfo.

⁶ Kuwesenyi wulalu na imanya: Ngesa, mndu msoṟo nechiidima ifee mana? Wulalu kyawa kida, njiwonyi orio, msoṟo nawode kitsi cha mndu mka awodo nyi mawawio hefee? Na shamu shawo shikailachika fana?

⁷ Lohi, mkonu fo nyi fung'anyi, kuwode fungi cha ifo pfo; nyi mkonu fo kiwi ko wandu wa Yakobo; ma kudo wechikiṟo pfo.

⁸ “Mkonu fo ili fochishika, nyi inyi Mndumii-Ruwa menyi Matorito njideda, njechifunja ikidi lyeduo mbe njidumbuo na mshe yalyo.

⁹ Nawo wechiwa se masinga ha wahenu pfo, indi wechinjiṟundia inyi Mndumii-Ruwa, Ruwa owo, na mangi o kishari kya Dawidi ichu njechiwasambuṟia.

¹⁰ “Inyi Mndumii-Ruwa ngahamba njidi: ‘Ma kulaowuo iyo Yakobo mṟundi oko; ma kulauko madima, iyo Israeli; kipfa njechikukiṟa ipfo kuleshe ui, na oshari lopfo luwuke osamiṟonyi. Nochiwuya na ikaa olelenyi, ma kuwode mokuowesha pfo.

¹¹ Kipfa inyi njikeri hamu na iyo njikukiṟe. Inyi Mndumii-Ruwa ngahamba. Njechirumatsa piu mkambo yose, njilekurahanyitsa koyo; indi iyo njechirumatsa pfo. Njechikuhoṟuo chandu kikuwaṟi njechikuda uhende njilakuhoṟuopfo; Nyi inyi Mndumii-Ruwa ngahamba.’

¹² “Inyi Mndumii-Ruwa ngahamba njidi: Shifaṟe shapfo shichiapfo, matiinga hapfo hechichiapfo.

¹³ Kuwode motahambanyia mbonyi tsapfo-pfo, kifaṟe kyapfo kiwode mdi-pfo, iyo ochichia pfo.

¹⁴ Wakunde wapfo wose wakuhadimie, wasaṟie kindo kyapfo kyose pfo, ngakukapa ngapo ya mkituwa, kokapo kulawode isaṟia, kipfa deko lyapfo nyi ling'anyi; njonyamaṟo tsapfo nyi tsifoi mnu.

¹⁵ Kitewe uifihiṟa kipfa kya kifaṟe kyapfo nki? Mawawio hapfo hesia-pfo. Ngakuwutia isho shose kipfa, kya deko lyapfo ling'anyi, njonyamaṟo tsapfo nyi tsifoi mnu.

¹⁶ Kyaindi iwo wose wakurumatsa, wechirumatso. Na wakituwa wapfo wose wechidao osamiṟonyi, wekulaaya njechiwalaaya.

¹⁷ “Njechikuwihiṟia oru lopfo, na matiinga hapfo njechihachiṟa, ma chandu walekulaha “Namkumbe, ‘Mṟi fo Sioni fulawode mofuambuya!’

¹⁸ “Mndumii-Ruwa nahamba adi: Njechiwihiṟa se sia tsa kanyi ko Yakobo, na isaṟia kanyi koke; mṟi fochiwiko wuhya huye ya handu hawunduo, na mṟi fo mangi fochihoṟoka alya handu fuwei.

¹⁹ Kochiichio-pfo shiimbo sheana na maṟu ha walya wechihiyo. Njechiwaengeṟa ma wechiwa waangu pfo, njechiwainenga kiṟumi manya wechimino-pfo.

²⁰ Wana wawo wechiwa chandu wawei ilyi mboko, na kisanzio kyawo kechiwanga oshangunyi loko, njechiwahoṟuo wose wewatuura.

²¹ Msongoru owo nechiwa umu owo, mowaitoṟia nechiwuka kiidi kyawo. Njechimeende na afui nanjicheye; ee da, nyiu echikaria injisembelia kwi pfinya tsake, Nyi inyi Mndumii-Ruwa ngahamba.

²² Nyo nyi mochiwa wandu wako, na inyi njechiwa Ruwa onu.”

²³ Ambuya kiwiriwiri king'anyi kiwukie ko Mndumii-Ruwa! Nyashi yado, cha kiwiriwiri kya masinanu, kechipaṟikia mdohu fo mndu mnyamaṟi.

²⁴ Nyashi ya Mndumii-Ruwa yechiwuya ndumapfo, mṟasa nainutsie kilya aṟeheṟie mrimenyi foke. Maheri hechicha mochimanya isho shose necha.”