YEREMIA 3 - Bibilia Kui Mdedie fo Kimochi

Waisraeli wutuṟa wuhendeli

¹ Mndumii-Ruwa nahamba, “Kokoya mndu ada mka oke, kahenda kawa na mka o mndu ungi, ngesa msoṟo ulya nechemwambiase? A orukalo lochiwangafu? Iyo Israeli naawo kulewa mmeluki na wambuya wafoi, na iyo ngesa nochinjichea inyi daa?” Mndumii ahamba.

² Iria meso hapfo noambuye huya mafumvu! Na shitoṟomoso shose nyi hanga walalelaa na iyo mbai ya njia kulewedia. Udamie cha Mwarabu nuka ya msanga aiweda mbucha, itane ohaluo orukalu ngafu kipfa kya wumeluki wopfo na wuwicho wopfo.

³ Kipfa kya ikyo luleimo mlewi, manya kuwode mvuo ya fuli pfo, ma kudo nuwode meso ha wumeluki, koleha idumbuya ma kulawado nyi sonu.

⁴ “Ngesa wokia wulalu chi ochinjifihiṟia, ‘Hoi ndeako, iyo nyi msongoru oko wokia wukoho woko?’

⁵ Nyechiwada nyashi yako mlungana Naiwada itane matsitsionyi: Ambuya nohamba kudo, indi nowuta shindo shiwicho, noosha njia yapfo kumonyi.”

Israeli na Yuda kiwawaṟi wadumbuye

⁶ Koikyo Mndumii kanjiwia maheri ha mangi Yosia, “Omewona mawuto ha Israeli ichu modeko? Nadoye huye ya orio fumvu lileshe kahenda pfo iṟuhuya, na wanda ya orio ikidi liwode maṟa mawishi!

⁷ Na inyi njilehamba numa ya iwuta isho shose nechinjiwuuya inyi, indi nalawuye; na mshiki oke, Yuda awode mtambo, kawona isho.

⁸ Na inyi ngawona, kiheri kilya njileda Israeli menyi wunyamaṟi ngamnenga paruo yemsama kipfa kya iṟuhuya lyake, mshiki oke, Yuda awode mtambo, nalasaṟe ma nta;

⁹ indi o nalehenda kawewa mmeluki oruka lukafana ngafu, nao kaṟuhuya na maho na mashidi kechihaindia.

¹⁰ Kyaindi hamu na isho shose mshiki oke, Yuda ichu awode mtambo alemeche na koko na mrima foke fose-pfo, nalecha na makulembetseṟe.” Mndumii ahamba.

¹¹ Mndumii kanjiwia, “Israeli ai mdeko nakuloṟa ke nawode wusumhanyi kota Yuda menyi mtambo.

¹² Henda onguo madedo ha woambuya ora lo mtsudu nohambe, wuya, iyo Israeli modeko, Mndumii ahamba, njechikuambuyase na nyashi-pfo, njiwode isaṟia, Mndumii ahamba, njechiwada nyashi mlungana-pfo.

¹³ Tocha njoyamaṟo tsapfo tsose ke nyi uledekio, Mndumii-Ruwa opfo, na njia tsapfo ihendia wahenu, wanda ya orio ikidi liwode maṟa mawishi ma ulakunde iicho ṟu lyako.” Mndumii ahamba.

¹⁴ “Wuyenyi nyo wenyi mtolo nyo wana wedeko; Mndumii ahamba, kipfa inyi nyi mii onu; na inyi njechiwuta mndu umu, o mṟi fumu na wawi wa mba imu, na inyi njiwaende mṟasa Siyoni.

¹⁵ “Na inyi njechimuinenga walisi wanjichihiṟie mrima foko, wechimlisa na wuṟango na wulaanyi.

¹⁶ Nalyo kechiwa ili mandi mochiengeṟeka na ifo kiidi kya oruka,” Mndumii ahamba, Mandi ho wechihamba-se, “Isanduku lya Mkundana lya Mndumii-pfo,” Ma lyechiida na mrimenyipfo; ma wechilikumbuopfo, ma ilisahia-se-pfo ma kuwode ma kimu kechiwutikapfo.

¹⁷ Mandi ho wechilaha Yerusalemu, “Kidi kya wuitoṟi kya Mndumii,” na wandu wa mbaṟi tsose wechikoyana Yerusalemu; iindia Mndumii-Ruwa. Ma wechihenda-se na orikiki lo mrima yawo njiwichopfo.

¹⁸ Mafiri halya mba ya Yuda wechicha kimu, wuka oruka lo mtsudu mṟasa oruka lulya njileinenga wandeanyu luwe kyoṟa kyawo.

Wuṟuhui wo wandu wa Ruwa

¹⁹ Kyaindi na inyi njilewehamba, Israeli, njechiidima njida imuwika kimu na wana, na imuinenga oruka lui lucha, kyora kicha kya wandu wa mkambo na inyi ngahamba mochinjilaha, “Ndeako,” Mochida mulanjioshapfo.

²⁰ Lohi, chando mka alai mhendeli ekeda mii oke, nyi wudo mulenjiwutia inyi kulawode wahendeli wose; Iyo mba ya Israeli, Mndumii ahamba.

²¹ “Ṟu liichio huya shitoṟomoso, nyi ofuho lowo na shiterewo sha wana wa Israeli; kipfa wadetsa njia yawo, wakahadima Mndumii-Ruwa owo.

²² Wuyenyi nyo mui wewuta shindo shilachihiṟa, inyi njechichiṟa mawuto hanu mawicho. “Nanyo mohamba, ‘Ambuya locha kopfo; kipfa iyo nyi Mndumii-Ruwa odu.

²³ Na lohi da, ngaya iwaṟi iwuke kuleshepfo, cha fumvuhu; kisanzio kiwode mtiṟi huya fumvu; nyi lohi okiṟo lo Israeli nyi kiidi kya Mndumii-Ruwa, Ruwa odu.’

²⁴ “Kyaindi kindo kya sonu kyalya irunda lya wandeadu wokia uwanake wodu, mapo hawo ha machondi na mmbe, wana wawo wa kisoṟo na wa kika.

²⁵ Lulae na sonu tsadu, iṟenze lyadu lilushikie; kipfa luledekio Mndumii-Ruwa odu, so na wandeye wadu, wokia wukoho wodu itane inu, ma luleindia ṟu lya Mndumii-Ruwa odu-pfo.”