YEREMIA 29 - Bibilia Kui Mdedie fo Kimochi

Paruo ya Yeremia ko Wayuda wai Babiloni

¹ Madedo ha nyi sa mwikimbi Yeremia aledika iwuka Yerusalemu, ko iwo waletsuhaa, wa wanene waledao kifungonyi ko wakohanyi na ko waikimbi na ko wandu wose walya Nebukadneza alewaduo wusingenyi wawuka Yerusalemu mṟasa Babeli.

² Lilya walewuka Yerusalemu Yekonia mangi na mae o mangi na manzenge wanene wa Yuda na Yerusalemu na waaria wewika mba na wanganya.

³ Ko owoko la Ehasa mana o Shafani na Gemaria mana o Hilkia, sa Sedekia mangi ya Yuda alewaduma Babeli ko Nebukadneza mangi o Babeli ihamba.

⁴ Mndumii menyi matorito Ruwa o Israeli nawia adi wandu wose waledao wusingenyi, “Njilewada wadao iwuka Yerusalemu ntane Babeli.

⁵ ‘Wikenyi mba mukae pfo, demenyi madema mulye ndunda tsake.

⁶ Alikenyi waka mufee wana wa kika alikienyi wana wanu mualikie wana wa kisoṟo wana wa waka wafee wana wa kika muengeṟe ifo.

⁷ Fulangienyi ofoṟo mṟi fulya njiletewa wadao wusingenyi mufuterewie ko Mndumii ko kipfa kya mṟi fo mochiwona ofoṟo.

⁸ Kipfa Mndumii menyi matorito Ruwa o Israeli nyi ahamba adi, waikimbi wai kiidi kyanu na walodia ndodo walamulembe nyo ma mulaadanyie ndodo tso.

⁹ Kyamba ko rina lyako wekeonguo madedo ha wongo konu, inyi njilemewadume pfo nyi Mndumii ahamba.’”

¹⁰ Kipfa Mndumii nyi ahamba adi, “Babeli kamarisa maka makumi mfungade (70) njechimchea nyo na iawutsia idedo lyako licha konu na imuwihiṟa handu ha.

¹¹ Kipfa njiichi makusaṟo njikusaṟa kyanu, Mndumii ahamba nyi makusaṟo ha ofoṟo ma chi mawicho pfo, imuinenga nyo mkusirie mafiri hanu hefurumia.

¹² Nyo nyi mochinjilaha, mochinjiterewa na inyi njechimuicho.

¹³ Mochinjishiha na injiwona, mukanjishiha na mrima yanu yose.

¹⁴ Mochinjiwona inyi njechimuwihiṟia moo na imusanyia kiidi kya mkambo iya ya wandu njilemuwingia napfo. Njechimuwihiṟa na handu halya njilemuwuta ho, ngamuduo osamiṟonyi. Nyi Mndumii-Ruwa ngadeda.

¹⁵ “Nyo nyi mokeidikia waikimbi wo mokehamba ke Mndumii-Ruwa amuendie ipfo Babeli.

¹⁶ Adanyienyi kindo njihamba inyi Mndumii-Ruwa kirianyi na mangi chu adamie loṟikehu lo wuitoṟi lo Dawidi, kiwerianyi na wandu wose wakeri kiidi kya mṟi fu, hamu na wana wa maanu walalehenda nanyo osamiṟonyi.

¹⁷ Inyi Mndumii-Ruwa Menyi matorito ngahamba kudi, “Ambuya njimudikia oshu, njaa na ndaṟe mbicho; njechimuhaluo cha mkuyu njiwicho mnu tsilechiwa iliyo.

¹⁸ Njechimulatia na oshu, njaa na ndaaṟe mbicho. Njechimuhaluo muwe kindo kisukiṟie ko wuitoṟi wose kiidi kya oruka, ee da, kindo cha oseso, kichano, omino na kindo kepiṟo kiidi kya mkambo iya yose njilemufunyia-pfo.

¹⁹ Njechiwuta njido kipfa mulaleadanyia madedo hako njilemuwia orio kiheri kwi madumbu ha waṟundi wako na waikimbi nanyo mukaleha iwaicho. Nyi inyi Mndumii-Ruwa ngahamba.

²⁰ Nyo mose njilemuwuta Yerusalemu, ngamuduo osamiṟonyi Babeli, adanyienyi idedo lyako inyi Mndumii-Ruwa.”

²¹ Mndumii-Ruwa Menyi matorito, Ruwa o Israeli nahamba adi ko Ahabu, mana o Kolaya, na kya Zedekia mana o Maasea, walemuikimbia wongo ko rina lyake. “Njechimudambika mawokonyi ha Nebukadneza, mangi ya Babiloni, nao nechimuwaha mochiwona na meso hanu muwenyi.

²² Kipfa iki kechimukoya, wandu wose walesamiṟio Babeli wuka Yerusalemu wechihamba madedo ha hesesa. Mndumii-Ruwa naluwutie cha Zedekia na Ahabu, iwa walekoṟo na modo nyi mangi ya Babeli.

²³ Kimarete nyi walewuta mbonyi tsa sonu kiidi kya Israeli. Waleṟuhuya na waka wa wamṟasa wawo, na ihamba madedo ha wongo ko rina lyako, kindo njilawewadumie wawute wado. Inyi njiichi isho; njileṟingishia. Inyi Mndumii-Ruwa ngahamba.”

Paruo ya Shemaya

²⁴ Mndumii-Ruwa nalenjiwawasa njiwie Shemaya o Nehelamu.

²⁵ Mndumii-Ruwa Menyi Matorito nahamba adi: “Nodika paruo ko rina lyapfo ko wandu wose wa Yerusalemu na ko mkohanyi Sefania mana o Maaseia na ko wakohanyi wengi wose kiidi kya paruo yo nyi wudi kulewia Sefania:

²⁶ ‘Mndumii-Ruwa nakuhaluo iyo Sefania uwe mkohanyi handu ha mkohanyi Yehodaya, uwe mnene o mba ya Mndumii-Ruwa. Nyi kyapfo iyo umkumbe mbenyi ya wapfungo, na impfunga na mshe icho ose awodo ni waṟumu ekehamba shisuku.

²⁷ Kitewe kuladedie Yeremia nki wuka Anathothi ekehamba shisuku.

²⁸ Kipfa naleduma mbonyi ipfo Babeli ke osamiṟo lonu lochiwa lo kiheri kileshe, na ihamba muwike mba, mkaepfo wadenyi madema mudeme, wayenyi mbeu mulye shilimu shaho.’”

²⁹ Mkohanyi Sefania nalesoma paruo ya oshangunyi lo mwikimbi Yeremia.

³⁰ Naalyo Mndumii-Ruwa kawia Yeremia!

³¹ “Dikia wandu wose wakeri osamiṟonyi ndumi ii. Inyi Mndumii-Ruwa njihamba njidi kya Shemaya o Mnehelamu: Shemaya nadeda kisuku chi inyi njimdumiepfo, kikatewa mukaidikia wongo tsake.

³² Ko ikyo inyi Mndumii-Ruwa ngahamba njechihoṟuo Shemaya o Nehelamu hamu na oshari loke. Kuwode mndu ma umu o wandu wake echideo ho na moo nawone mecha ho njechiwutia wandu wako pfo, nyi kipfa asengeṟia wandu wako na iwatusa kundu wanjidekio inyi Mndumii-Ruwa. Inyi Mndumii-Ruwa ngahamba.”