YEREMIA 28 - Bibilia Kui Mdedie fo Kimochi

Yeremia na mwikimbi Hanania

¹ Kiidi kya maka fulya fulya, mawookionyi ha wumangi wo Sedekia mangi ya Yuda maka fo kana meri fo katanu Hanania mana o Azuri, mwikimbi o Gibeoni kadeda na inyi kidi kya mba ya Mndumii kiidi kya wakohanyi na wandu kehamba.

² “Mndumii o Matorito Ruwa o Israeli, nyi ahamba adi ngafunja pfinya tsa mangi ya Babeli.

³ Kulameshike maka iwi njechiwihiṟa na iya shihia shose sha mba ya Mndumii shilya Nebukadneza mangi ya Babeli aleshiwuta iya kashiduo Babeli.

⁴ Na inyi njechiwihiṟa Yekonia mana o Yehoyakimu mangi ya Yuda handu hamu na walya wawapfunge wose wa Yuda walehenda Babeli, Mndumii ahamba kipfa njechifunja shipfungo shose sha Babeli.”

⁵ Nlyo mwikimbi Yeremia kawia mwikimbi Hanania kiidi kya wakohanyi na kiidi kya wandu wose walehoṟoka kiidi kya mba ya Mndumii.

⁶ Nlyo mwikimbi Yeremia kahamba, “Mndumii nawute ado! Mndumii nainutsie madedo hapfo uleonguo iwihiṟa shombo sha mba ya Mndumii na wandu wose wai wapfungo wokia Babeli mṟasa iya.

⁷ Kyaindi wulalu adanyia idedo njideda madunyi hapfo na madunyi ha wandu wose,

⁸ Waikimbi waweipfo kacha waleonguo kya mṟi ifoi na huye ya mangi tsing'anyi mbonyi tsa shida na sha mawicho na kya ndaṟe ya makokoi.

⁹ Mwikimbi aonguo kya ofoṟo idedo lya mwikimbi lyikaawukia lyechimanyika ke nyi Mndumii amduma lohi lohi.”

¹⁰ Nlyo mwikimbi Hanania kaira kipfungo kilya kiwei nzingonyi ko Yeremia kakifunja.

¹¹ Nlyo Hanania kadeda kidi kya wandu wose, kahamba, Mndumii nahamba adi, “Nyi wudo njechifunja pfinya ya Nebukadneza mangi ya Babeli kulameshika kiidi kya maka iwi na iwuta nzingonyi ko masanga hose.” Nlyo mwikimbi Yeremia kahenda.

¹² Idedo lya Mndumii likachea Yeremia lyehamba kyaituma Hanania mwikimbi ipfunja shipfungo shilya shiwei nzingonyi ya Yeremia kahamba,

¹³ “Henda wia Hanania ohamba Mndumiii nyi ahamba adi nyi ulefunja oṟo tsa mashidi wulalu nyi osungusia tsa menya.

¹⁴ Kipfa Mndumii o matorito Ruwa o Israeli nyi ahamba adi, ‘Ngawika oṟo ya menya kidi kya nzingo ya masanga hose kundu waṟundie Nebukadneza mangi ya Babeli. Njechimnenga mando ha ngeṟa hose na ha oruka.’”

¹⁵ Nlyo mwikimbi Yeremia kawia mwikimbi Hanania, “Adanyia wulalu o iyo Hanania Mndumii alekudumapfo kyaindi nuwia wandu madedo ha wongo.”

¹⁶ Mndumii nahamba adi, “Ngakuduma uwuke huya ya oruka maka fu nyi ochipfa kipfa nyi ulededa madedo mawicho huya ya Mndumii.”

¹⁷ Nlyo mwikimbi Hanania kapfa maka fulya fulya meri fo mfungade.