YEREMIA 27 - Bibilia Kui Mdedie fo Kimochi

Yeremia aṟaa ngada ya ipung'a

¹ Mawokioonyi ha wuitoṟi wo Sedekia, mana o Yosia mangi ya Yuda idedo likachea Yeremia liwuka ko Mndumii lyehamba,

² Mndumii nanjiwia adi, “Yeremia, akiṟa shilukuta na nira uṟae ipfo nzingonyi.

³ Nlyo ushidike ko mangi ya Edomu, mangi ya Moabu na mangi ya wana wa Amoni na mangi ya Tiro na mangi ya Sidoni ko owoko lo walya wawadume walya wahenda Yerusalemu ko Sedekia mangi ya Yuda.

⁴ Uwawase wahende ko wanene wawo na iwawia Mndumii menyi matorito, Ruwa o Israeli nahamba adi, mowia wanene wanu madedo ha.

⁵ “O inyi njilewika wuyana wu wandu na mando ha nja iwo wai kunu osehu lo oruka ko pfinya yako ing'anyi na ko owoko loko luluhoṟotse na inyi njekeinenga wandu chando ngakunda.

⁶ Na wulalu ngawika njoruka tsose mawokonyi ha Nebukadneza, mangi ya Babeli, mṟundi oko na mando ha ngeṟenyi ngamnenga naho hamuindie.

⁷ Na masanga hose wamṟundie o na wana wake na kishari kyake kiheri kechicha o amonyi na masanga hose na mangi tsing'anyi wechihaluka masinga.

⁸ “Na kechiwa isanga lyo na mangi ulya alakunda iṟundia Ndebkadreza mangi ya Babeli na iwika nzingo tsawo kiidi kya shipfungo sha mangi ya Babeli, inyi njechikapa isanga lyo ko oshu na ko njaa, na ko ndaṟe ya makokoi itane njechiwaarisa ko owoko loke.

⁹ Indi kipfa kyanu mulaadanyie, waikimbi wanu, na wahanga wekelodia ma ndodo tsanu, ma walya wekewona, ma wahanga wanu wekemuwia mochiṟundia mangi ya Babeli pfo.

¹⁰ Kipfa wekewadambuya wongo kundu wawawute ipfo mṟinyi konu njimufune muhende iarisika.

¹¹ Kipfa isanga lilya lyechiwika nzingo tsawo kiidi kya shipfungo sha mangi ya Babeli, na imṟundia, isanga lyo njechilida likae kiidi kya oruka lowo wawenyi, nyi Mndumii ahamba, nawo wechiludema na ikaa pfo.”

¹² Ngawia Sedekia mangi ya Yuda, kui mfanano fo madedo ho hose njemmbia, “Wikenyi nzingo tsanu kiidi kya shipfungo sha mangi ya Babeli, mumṟundie o na wandu wake kundu mukie.

¹³ Nki kitewe mukundi ipfa, iyo na wandu wapfo ko oshu na njaa na ndaṟe ya makokoi chandu Mndumii alehamba ko isanga lyo lyilakundi iṟundia mangi ya Babeli?

¹⁴ Ma mulaadanyie madedo ha waikimbi wakemuwia nyo ke mochiṟundia mangi ya Babeli pfo, kipfa wekemuwia wongo.

¹⁵ Chi inyi njekewaduma pfo nyi Mndumii ahamba kipfa wekeikimba wongo kui rina lyako kundu njimuwute nja, muhende iarisika nyo na waikimbi wo wekemuongoya.”

¹⁶ Njideda na wakohanyi na wandu wose njehamba Mndumii nahamba adi, “Adanyienyi madedo ha waikimbi wandu wekemuongoya wehamba ambuya shihia sha mba ya Mndumii, kiheri kiangu shechiendose shiwuka Babeli kipfa wekemuongoya wongo.

¹⁷ Mulawaadanyie, ṟundienyi mangi ya Babeli mukae na moo. Kipfa mṟi fu fochiwa fowa.

¹⁸ Koka wo nyi waikimbi, na koka idedo lya Mndumii lii kowo, waterewe Mndumii o Matorito ke shindo sho shiletsuhaa kiidi kya mba ya Mndumii na kiidi kya mba ya mangi ya Yuda na iya ya Yerusalemu shilahende Babeli.

¹⁹ Mndumii o Matorito nahamba adi, ‘Kyipfa kya ngo na kipfa kya ipalyipalyi na kipfa handu hehekia na kipfa kya shihia shitsuhae shiledeo kidi kya mṟi fu.

²⁰ Shilya Nebukadneza, mangi ya Babeli alaleshiduo lilya aleduo Yekonia mana o Yehoyakimu, mangi ya Yuda wokia Yerusalemu itane Babeli handu hamu na wanene wose wa Yuda na Yerusalemu.’

²¹ “Mndumii o Matorito Ruwa o Israeli nyi ahamba adi kipfa shombo shiletsuhaa kiidi kya mba ya Mndumii kiidi kya mba ya mangi o Yuda na Yerusalemu.

²² Nshedao itane Babeli nasho shechikaa pfo, itane mkonu njeshichea, nyi Mndumii ahamba. Nlyo njechishiendese na ishiwihiṟa iya.”