YEREMIA 26 - Bibilia Kui Mdedie fo Kimochi

Yeremia aendo mwanduyenyi

¹ Mawokioonyi ha wumangi wo Yehoyakimu mana o Yosia Mangi ya Yuda. Idedo lya Mndumii likahamba,

² Mndumii nyi ahamba adi, “Hoṟoka osehu lo mba ya Mndumii udede na mṟi yose ya Yuda, iwo wekecha iwika wuindi kiidi kya mba ya Mndumii.” Deda nawo madedo hose njikuwawasa iwawia, ulade idedo ma limu.

³ Kofia weicho na ida mawuto hawo mawicho, kundu njide mawicho njiwekundi iwawutia kipfa kya mawicho ha mawuto hawo.

⁴ Iyo nyi ochiwawia: Mndumii nyi ahamba adi, “Koka mulakundi imwicho na ihenda kiidi kya mawawaso njiwikie kiidi kyanu,

⁵ iadanyia madedo ha waṟundi wako waikimbi njilewaduma konu, njekure owinyi iwaduma; kyaindi nyo mulawaicho.

⁶ Njechihaluo mba i iwe cha Shilo, na mṟi fu njifuhaluo fuwe oseso njoshari tsose tsa oruka.”

⁷ Na walaanyi na waikimbi na wandu wose wakaadanyia Yeremia o handu elehambia madedo ho kiidi kya mba ya Mndumii.

⁸ Yeremia ammaa ihamba madedo hose Mndumii alembawawasa nawie wandu wose, nlyo walaanyi na waikimbi na wandu wose wakambada, wakahamba, “Nyi kya lohi nyi ochipfa!

⁹ Kitewe oonguo ko rina lya Mndumii, ochihamba, mba i yechiwa cha Shilo. Na mṟi fu nyi fochiwa fowa. Mndu echikaa pfopfo. Wandu wose wakaṟingichia Yeremia kiidi kya mba ya Mndumii.”

¹⁰ Wanene wa Yuda wameicho mbonyi tso wakawuka kiidi kya mba ya mangi. Wakado mṟasa mbenyi ya Mndumii. Wakadamia o handu wandu wekeida wehenda mba ya Mndumii, Mongo mhya fo mba ya Mndumii.

¹¹ Walaanyi na waikimbi wakawia wanene wa wandu wose wehamba: “Mndu chu nyi awaṟi ipfa, kipfa nyi aonguo kya mṟi fu. Chando moicho na madu hanu muwenyi.”

¹² Nlyo Yeremia kawia wanene wose na wandu wose kehamba, “Mndumii nyio alenjiduma njimuongoe kya mba i, na kya mṟi madedo hose mohaicho.

¹³ Wulalu sungusienyi ohendo lonu na mawuto hanu, muadanyie ṟu lya Mndumii-Ruwa onu, na Mndumii nyi echida mawicho alededa kyanu.

¹⁴ Kyaindi oinyi ambuya njii mawokonyi hanu njiwutienyi ikyo mowona nyi kicha na lohi ipfo kiidi kya meso hanu.

¹⁵ Kyaindi manyenyi ke mukanjiwaha mokuendie huye yanu samu ilawode mti, yechiwa huye yanu na huya mṟi fu na huye ya wandu wapfo. Kipfa nyi lohi Mndumii alenjiduma konu, iwawia shose muleshiicho.”

¹⁶ Nlyo wanene wa wandu wakawia walaanyi na waikimbi, wakahamba, “Mndu chu awaṟi ipfa pfo, kipfa nadeda naso ko rina lya Mndumii-Ruwa odu.”

¹⁷ Nlyo wandu maata kiidi kya wameku wa mṟi wakahenda wakadeda na mamiingi fo wandu wakahamba,

¹⁸ Mikaya Mmorashti, nyi aleonguo kiheri kya Hezekia mangi ya Yuda. Kadeda na wandu wose wa Yuda, ke Mndumii o matorito nahamba adi: “Sayuni yedemo cha dema lyedema, na Yerusalemu yewa mrapu na fumvu, lya mba lyechiwa cha hando kukuirie ngeṟenyi.

¹⁹ Ngesa Hezekia mangi ya Yuda na wandu wose wa Yuda, walewaha Mikaya? Ngesa aleindia Mndumii na iterewa Mndumii nawahoṟie na Mndumii kada nalawawutie mawicho halya alehamba kyawo? Naso luwewuta mawicho hang'anyi kiidi kya mrima yadu.”

²⁰ Kuwode mndu aleikimba kiidi kya rina lya Mndumii Uria mana o Shemaya, o Kiriath-yearimu. O nao naleikimba kya mṟi fu na huya isanga lyose. Cha madedo hose ha Yeremia.

²¹ Na Yehoyakimu mangi na wandu waṟango wose na wanene wose wamiicho madedo ho, mangi kakunda imbaha. Uria amicho mbonyi tso kaowuo mnu, kadicha kahenda Misri.

²² Mangi Yehoyakimu kaduma wandu wahende Misri, Elinathani, mana o Akbori, handu hamu na wandu wengi.

²³ Wakawihiṟa Uria iwuka Misri wakamduo ko Mangi Yehoyakimu. Mangi kambaha ko oshu, kaṟika mnying'a foke kiidi kya shipfu shilawode kiṟumi.

²⁴ Kyaindi owoko lo Ahikamu, mana o Shafani, luwei handu hamu na Yeremia nalakilekie wandu wambahe.