YEREMIA 25 - Bibilia Kui Mdedie fo Kimochi

Mkituwa awuka ora lo mtsudu

¹ Idedo lilechea Yeremia kya mbonyi tsa wandu wose wa Yuda, maka fo kana fo Yehoyakimu, mana o Yosia, mangi ya Yuda maka fo kuwoka fo Nebukadneza, mangi ya Babeli.

² Idedo Yeremia alewia wandu wose wa Yuda na wengi wose wa Yerusalemu, kehamba.

³ Wokia maka fo ikumi na kaṟaṟu fo wumangi wo Yosia mana o Amoni mangi ya Yuda, mṟasa mfiri fu fo inu, maka ii makumi hawi na iṟaṟu (23) idedo lya Mndumii lechinjichea na inyi ngadeda nanyo, njechikure ngamenyi otuko na ihamba; kyaindi nyo mulenjiadanyiapfo.

⁴ Nao Mndumii nadumie konu waṟundi wake wose waikimbi wo kekure otuko na iwaduma, kyaindi nyo mulawaicho ma ideha madu hanu muwaadanyie mulakunde.

⁵ Kahamba wuyenying'u wulalu orio mndu nade ohendo loke luwicho na mawuto hanu mukae kiidi kya oruka lu Mndumii alemuinenga nyo na wandeanu wokia kacha mṟasa mlungana.

⁶ Manya mulaoshe maruwa hengi mochihaindia ma ihaṟundia, ma mulanjisuiṟe kui maṟunda ha mawoko hanu nahong'u njechimuendie ngapo yosepfo.

⁷ Kyaindi mulemsuiṟa ko sanamu tsilya mulekusungusia nyo muwenyi, na koikyo mukakuendie ngataṟa nyo muwenyi.

⁸ Mndumii Menyi Matorito nahamba adi kipfa mulakunda iindia madedo ho hako,

⁹ “Ambuyenyi njechidika wandu wechiduo wandu wa kishari kya ora lo mtsudu. Mndumii ahamba, ‘Koikyo, njechilaha mkambo yose ya ora lo mtsudu, handu hamu na mṟundi oko Nebukadneza Mangi o Babeli. Njechiwaende wapufukie oruka lu na wenyi oruka lu handu hamu na mkambo yoose ya mṟasenyi. Njechiwarumatsa piu, na iwatana wawe kindo kya wusutsu, na ikapo mang'ang'o na isalucho mlungana.

¹⁰ Njiwewaima maṟu ha seko na sia ya menyi wali na mana moaliko, ṟu lya iho lyesea na ngela ya mshumaa.

¹¹ Oruka lu lochiwa msefu na kindo kiṟihishie wandu wa mkambo fu wechisingia mangi ya Babeli maka makumi mfungade (70).

¹² Maka yo makumi mfungade ikamesia njechihoṟuo mangi ya Babeli na mkambo fulya kipfa kya mawuto hawo mawicho na oruka lo Wakalidayo nalo lochiwa lo wukiwa mlungana.

¹³ Ambuyenyi njichiwaendie madedo halya hako hose njilededa huyawo, ee da halya haimaṟehie kiidi kya kitapu ki, halya Yeremia aleikimba kya mkambo yose.

¹⁴ Kipfa wandu wafoi wa mkambo na wamangi wanene wechiwatuura, nawudo njechiwataa kiṟinganyi na mawuto hawo na maṟunda ha mawoko hawo.’”

Mwanduye fo Ruwa huya wandu wa mkambo

¹⁵ Nyi wudi Mndumii-Ruwa o Israeli anjiwia, “Ambia kirahu kya mvinyo fo nyashi ii owokonyi loko, norutse wandu wose wa mkambo iwo njechikuduma kowo.

¹⁶ Wo wechinyo, na inango, na iwado nyi wusuko, kipfa kya oshu njechidika kowo.”

¹⁷ Nalyo ngaambia kirau kilya owokonyi lo Mndumii, ngarutsa wandu wa mkambo yose, walya Mndumii alenjiduma kowo;

¹⁸ Wai Yerusalemu na mṟi ya Yuda na wamangi wawo na wandu wang'anyi kundu wahaluke wakiwa na kindo kiṟihishie na italuka, na oseso chando kui na inu.

¹⁹ Farao mangi ya Misri na waṟundi wake na wanene wa wandu wake wose.

²⁰ Na wandu wose walesangana hamu na wamangi wose wa oruka lo Uzi, na wamangi wose wa oruka lo Wafilisti, na Asheri, na Gaza na Ekroni na mtsuhaṟo fo Ashdodi.

²¹ Edomu na Moabu na wana wa Amoni.

²² Na wamangi wose wa Tiro na wamangi wose wa Sidoni na wamangi wose wai oruka lulya lulutengetie nyi mṟinga ora lo kyukanyi lo ipalyipalyi.

²³ Dedani na Tema na Buzi na wandu wose wekeoda kilodi.

²⁴ Na wamangi wose wa Uarabu na wamangi wose walesangana wekekaa nuka ya msanga.

²⁵ Na wamangi wose wa Zimri, na wamangi wose wa Elamu, na wamangi wose wa Umedi.

²⁶ Na wamangi wose wa mtsudu wa kuleshe na kufui wose handu hamu na wamangi wose wa wuyana na mangi o Sheshaki nechinyo wo wakamemaa.

²⁷ Na iyo nochiwawia kudi Mndumii menyi Matorito, Ruwa o Israeli nahamba adi, “Nyonyi munango na idaika, na iomboka mulakurese kipfa kya oshu njechidika konu.

²⁸ Na kokoya waleha iambilia kirau kilya owokonyi lopfo wanyo nlyondi ochiwawia Mndumii menyi matorito nahamba adi. Naate munyo.

²⁹ Kipfa ambuyenyi ngawoka iwuta mawicho kiidi kya mṟi fumlahe kui rina lyako. Ngesa mochideo mulechihoṟuyo? Mochideo mulechihoṟuyopfo, kipfa njechiende oshu lulya lukape wose wa wuyana. Mndumii menyi Matorito ahamba.’

³⁰ “Kyasia iyo ikimba kui kisuku madedo ha hose nowawie, ‘Mndumii nechiringona awuka huye, Nao nechiwuta ṟu lyake wuka, handu hake haele, Nechiringona mnu kiidi kya mfiṟiha foke, Nechifahia cha mndu akama msabibu, huya wandu wose wa wuyana.

³¹ Mtiṟi fochishika mtsitsionyi fo wuyana, kipfa Mndumii nahodana na mkambo fo wandu, nechianduo na wose wawode mbihu, na wawicho nechiwawuta wawoho kui oshu! Mndumii ahamba.’”

³² Mndumii nahamba adi, “Ambuya wuwicho wochihoya mkambo itane mkambo, otanu lung'anyi lochicha kuwuka matsitsionyi ha wuyana.

³³ “Na walya walewoho nyi Mndumii mkonu fulya wechikaapfo wokia ora lumu lo oruka itane ora lo kawi. Kuwode mowafihiṟia pfo, ma iwasanyia, ma iwaṟika; wechiwa kyala huya oruka.

³⁴ “Kapenyi kelewui nyo walisi, fihiṟenyi na ikuturunja ifunyi nyo wanene wa ipo; Kipfa kiheri kyanu kepfa kyatikiria, inyi njechimufunja shiteeno teeno, nanyo mochiomboka cha kihia kya mfuho.

³⁵ Walisi wechiwona kodichiapfo, ma walya wai ngohoda kiidi kya poo wechikiapfo.

³⁶ Ṟu lya kifihiṟo kya walisi, na ṟu lya kilio kya wanene wa po, kipfa Mndumii anyamaṟa shelya sha poo lilya.”

³⁷ Koka kuwewode wai olele wakanyamaṟo, kui nyashi ya Mndumii-Ruwa.

³⁸ Mndumii-Ruwa nadee handu hake heowa, cha mwiso fudeye opanga lofo, oruka lowo lui nuka ya msanga tupu, kipfa kya shida ya wandu wawicho, na nyashi ing'anyi ya Mndumii-Ruwa iaka.