YEREMIA 24 - Bibilia Kui Mdedie fo Kimochi

Shikunja shiwi sha ndunda tsa mkuyu

¹ Nebukadneza, mangi ya Babeli amemaa isamiṟa Yekonia mana o Yehoyakimu mangi ya Yuda hamu na wasongoru wa Yuda, waaria wa nganya kuwuka Yerusalemu na iwaduo Babeli. Mndumii-Ruwa kanjilora kiwonesio ki. Shikunja shiwi sha ndunda tsa mkuyu shii oshangunyi lo hekalu lya Mndumii-Ruwa.

² Kikunja kimu kiwewode mkuyu njicha mnu cha kiheri kesambuo mkuyu ya kuwoka. Kikunja kya kawi kiwewode mkuyu njiwicho mnu tsilechiwa ma iliyo.

³ Kyasia Mndumii kanjiwesa. “Yeremia nkiki uwonyi.” Inyi ngamhaluo, “Njiwonyi mkuyu. Tsilya njicha nyi tsiinjicha mnu na tsilya tsiwicho nyi tsiwicho mnu manya tsechiwa ilyapfo.”

⁴ Nahong'u idedo lya Mndumii-Ruwa likanjichea.

⁵ “Inyi nyi Mndumii-Ruwa o Israeli ngahamba njidi, chandu ndunda tsi tsa mkuyu tsii njicha, nyi wudonjechiwona wandu wa Yuda ke wai wecha, iwo njilewawuta handu ha na iwaduo osamiṟonyi orukenyi lo Wakalidayo.

⁶ Njechiwaringa kitsitsi na iwawihiṟa kiidi kya oruka lu. Njechiwahoṟotsa, njechiwalekia wahopfo, njechiwadonga ma chi iwakuṟuopfo.

⁷ Njechiwainenga mrima fomanya ke inyi nyi Mndumii-Ruwa. Wechiwa wandu wako na inyi njechiwa Ruwa owo kipfa wechinjichea na mrima yawo yose.

⁸ “Kyaindi inyi Mndumii-Ruwa ngahamba. Chandu ndunda tsilya tsiwei njiwicho tsilechiwa iliyo, nyi wudo njechiwutia mangi Sedekia o Yuda nawewode shidembo ipfo koke hamu na wandu wengi wose wa Yerusalemu waletsuhaa ipfo orukenyi, kimu na walya walesamia Misri.

⁹ Njechiwahaluo kindo kewichuṟa oshangunyi lo wamangi wose wai wuyanenyi. Wechiwa kindo kitalukie, kindo kekapa mang'ang'o, iseko na iseso orio handu wechidichia.

¹⁰ Njechiwaamtsia shida, njaa na ndaṟe njiwicho tsiwarumatse kichikichi wawuke orukenyi njilewainenga wo na wandeawo.”