YEREMIA 23 - Bibilia Kui Mdedie fo Kimochi

Mkusirie fo mkonu icha

¹ “Ochia lo walisi wainyamaṟa po lyako lya machondi na iharahanyitsa.” Mndumii ahamba!

² Kui kipfa ikyo Mndumii o Israeli nahamba adi, “Kya walisi wa wandu wako, mulerahanyitsa po lyako na iwawingia ma mulehenda iwaambuyapfo; na wulalu njechiwuwuya wuwicho wonu. Mndumii ahamba.

³ Na inyi njechisanyia mtsuhaṟo fo po lyako, kiidi kya njoruka tsilya tsose njilewafunyiapfo, njiwawihiṟese na mfiṟihenyi yawo; naho hechishaa na iengeṟeka.

⁴ Njechiwika walisi wechilisa necha ma hechiowuosepfo ma iwado nyi fowapfo, kuwode ma limu lechidekapfo. Mndumii ahamba.

⁵ “Ambuya mkonu ikeri icha, Mndumii ahamba, ‘Njechidosia Dawidi njana ya wulohi nayo yechichilia; mangi echiṟunda na wulaanyi na njechianduo kui wulohi kiidi kya oruka.’

⁶ Kiidi kya mkonu yake, Yuda nechikiṟo na Israeli nechikaa kipuo, na rina lyake echilaho nyi ili, ‘Mndumii nyi wulohi wodu.’”

⁷ Ko ikyo ambuya mkonu ikeri icha, Mndumii ahamba walechihamba, “So Mndumii ai na moo,” alewuta wana wa Israeli orukenyi lo Misri.

⁸ Kyaindi, “So Mndumii ai na moo” alewadosa kasongoya mba ya Israeli wuka oruka lo mtsudu na wuka njoruka tsilya njilewafunyia; wo wechikaa orukenyi lowo wa wenyi.

Waikimbi wawicho

⁹ Ko mbonyi tsa waikimbi, njilepfa mrima, mafuo hako hose haṟengeṟi, ngawa cha mndu mnanzi, cha mndu amrohie mvinyo; kipfa kya Mndumii na kipfa kya madedo hake maele.

¹⁰ Kipfa oruka luichuo waṟuhui, kipfa kya ilya nyamu oruka luifihiṟa, maṟa ha nuka hauma; ohendo lu luluwicho, na pfinya tsawo chi tsa wusumhanyi pfo.

¹¹ Kipfa mwikimbi na mkohanyi wose wawawi wakudosa; ee da kiidi kya mba yako ngawona wuwicho wowo. Mndumii ohamba.

¹² Kipfa kya isho, njia yawo yechiwa cha kundu kuirendia meemenyi, wechisotsoho na ioloka; kyamba njechiende mawicho, maka fowo fowakapa fukoshika. Nyi inyi Mndumii-Ruwa ngahamba.

¹³ “Njiwonyi wutondo kiidi kya waikimbi wa Samaria; wakahamba shisuku ko rina lya Baali, wakadekesha wandu wako Israeli.

¹⁴ Kiidi kya waikimbi wa Yerusalemu, ngawona idedo liwichuṟie mnu mnu; wekeṟuhuya, wakachumia wawode wongo, wakawanza mawoko hewuta wunyamṟi; kulakaepfo ma umu awuya na ida wuwicho woke; wose piu wakawa cha Sodoma, Koko na wenyi wawo cha Gomora.

¹⁵ Kyasia Inyi Mndumi, menyi matorito ngahamba kudi kiidi kya waikimbi, ‘Ambuya njechiwarutsa maṟa mawawo, na mṟinga fo wuṟoi wanyo kipfa kya waikimbi wo wa Yerusalemu. Ikushela lyawo lyaida kiidi kya oruka lowo lose.’”

¹⁶ Mndumii menyi Matorito nahamba adi, “Mulaadanyie madedo ha waikimbi wehamba shisuku; wekelosha wongo, wekededa shilya wawonyi wawenyi shiwukie ko Mndumii pfo.

¹⁷ O mkonu wekewia iwo wanjiminyie, Mndumii nahamba mochiwada ofoṟo wakawewia orio mndu akuiwitie mrima foke. Kuwode kindo kemupaayapfo, kuwode kiwicho kyosepfo.”

¹⁸ Kipfa nyiu ulya alehoṟoka mengenyi ya Mndumii, mṟasa imanya idedo lyake na iliicho. Nyiu alewada idedo lyako na mrima na iliadanyia.

¹⁹ Ambuya otanu lo Mndumii, nyiyo nyashi yake yacha, nyi otanu lurie masinano hang'anyi, yechiduikia mdohu ya wandu watahachi wose.

²⁰ Nyashi ya Mndumii yewuya nduma pfo, na itane aawutsie kilya awekusirie mrimenyi foke. Mkonu ya ifurumia mochimanya idedo li nakamu.

²¹ Mndumii-Ruwa nahamba adi: “Inyi njileduma waikimbi wo pfo, kyaindi walewikia mteeṟa; njilewawia kindo kyose pfo, kyaindi walehamba shisuku.

²² Indi kokoya walehoṟoka mengenyi yako le, wawechimanyishia wandu madedo hako, na iwahalutsa wade mawuto hawo mawicho, na njia tsawo njiwicho.

²³ “Inyi nyi Ruwa, njii afui chi Ruwa njii haleshe pfo.

²⁴ Ngesa kuwode mndu echiidima iowa handu ha kiṟika njilechimmbona? Mndumii ahamba. Ngesa muichi ke inyi Mndumii-Ruwa njii handu hose ruwehu na wuyanenyi?

²⁵ Njileicho isho waikimbi walehamba shisuku sha wongo kui rina lyako wehamba, ‘Ngalodia ndodo! Ngalodia ndodo!’

²⁶ Madedo ho hechikaa kiidi kya mrima ya waikimbi wehamba shisuku sha wongo itane indii, waikimbi walembi kiidi kya mrima yawo wawenyi?

²⁷ Wakusaṟie ke wechitewa wandu wahadime rina kui ndodo tsawo, waongoya orio mndu na wamṟasa oke, chandu wandeawo walehadima rina lyako kipfa kya Baali.

²⁸ Mwikimbi awode ndodo nahambe ndodo yake; na ulya awode idedo lyako nahambe idedo lyako kui wuhendeli. Muulu nyi kiki kota Ngano?” Mndumii ahamba.

²⁹ Idedo lyako chi cha modo? Mndumii ahamba; Cha kiria kepaṟa maho shipeṟengupeṟengu.

³⁰ “Kyasia kui kipfa kya ikyo inyi njii huye ya waikimbi wo.” Mndumii ahamba, “Wekesoka wandu orio mndu na wamṟasa oke madedo hako.”

³¹ Ambuya njii huye ya waikimbi, Mndumii ahamba, “Wekehamba kui njolimi tsawo wehamba, ‘Oo nahamba.’”

³² Ambuya inyi njii huye ya iwo wekehamba shisuku sha wongo. Mndumii ahamba, “Na idetsa wandu wako kui ndodo tsawo na ikushela lyawo lya wutondo, indi inyi njiwadumiepfo, ma njilewawasapfo, manya wechitarama wandu manya kitutupfo. Nyi inyi Mndumii ngahamba.”

Idedo lya Mndumii-Ruwa nyi mhanda?

³³ Kokoya wandu wa ang'u mwikimbi ang'u mkohanyi kakuwesa ke, “Mhanda fo Mndumii nyi kiki? Naalyo ochihamba, ‘Mhanda fuhya?’ Mndumii ahamba njechiwakumba kuleshe.

³⁴ Na kui mbonyi tsa mwikimbi na mkohanyi na wandu wechihamba mhanda fo Mndumii nyi njechihoṟuo mndu-cho na wa mba yake.

³⁵ Mochihamba kudi orio mndu na wamṟasa oke, na orio mndu na manomaye, Mndumii nawehaluo mndu, Mndumii nahamba ada?

³⁶ Na mhanda fo Mndumii mochifusendasepfo, kipfa orio idedo lya mndu ulya lechiwa mhanda foke, kipfa nyo modetsa idedo lya Ruwa ai na moo, Mndumii menyi Matorito, Ruwa odu.

³⁷ Na iyo nochiwia kudi mwikimbi, nkiki Mndumii akihaluo na Mndumii nahamba ki?

³⁸ Kyaindi mukahamba mhanda fo Mndumii kyasia Mndumii nahamba adi, kyamba mokehamba idedo li, ‘Mhanda fo Mndumii;’ na inyi ngaduma mndu namuwie mulahambe mhanda fo Mndumii.

³⁹ Kyasia ambuyenyi njechimuhadima piu, njimukumbalie kuleshe hamu na mṟi fu njileinenga wandeanu, nanyo njilamuwone kui meso hako.

⁴⁰ Njechiende wusutsu wukae huye yanu mlungana na wukiwa wulechihadimika.”