YEREMIA 22 - Bibilia Kui Mdedie fo Kimochi

Ndumii ya Yeremia ko mba ya wumangi wo Yuda

¹ Mndumii nahamba adi, “Soka na mbenyi ya mangi ya Yuda nohambe idedo-li.

² Keadanyia idedo lya Mndumii iyo mangi ya Yuda, iyo okedamia loṟika lo wuitoṟi wo Dawidi, iyo na waṟundi wapfo na wandu wapfo wose wekeida na shichumi shi.

³ Mndumii nahamba adi, ‘Anduonyi kui wulohi na wusumhanyi, henda ashuonyi ichu alewonyio na iliso wukiwa, mulawutie mhenu mawicho, ma ngoeda, ma mkusu, ma iduo shindo sha pfinya, ma mulapusuo samu ya mndu alawutie kindo kiwicho handu ha.

⁴ Kipfa kokoya mowuta mudo lohi mukaindia madedo ha, nlyong'u shichumi shi shechiitsa wamangi wechidamia loṟikehu lo wuitoṟi wo Dawidi, wechihenda na magari na wehenda kimu na iwo wadoye frasi na waṟundi wake na wandu wake.’

⁵ Kyaindi kokoya mulakundi iicho madedo ha, inyi ngalya nyamu yako Mndumii ahamba, ‘Mba i yechiwa ya wukiwa.’

⁶ “Kipfa Mndumii nahamba adi kiidi kya mba ya mangi ya Yuda. Iyo nyi ui Gileadi koko, na mdo fo Lebanoni, Kyaindi njechikuhaluo nuka ya msanga, na mṟi ilechilao nyi wandu.

⁷ Njechiṟeheṟa wandu wenyamaṟa orio mndu na kisha kyake. Nawo wechimanya meresi yapfo njisambuṟe, na iikumba modonyi.

⁸ “Wandu wa mkambo ifoi wechiida hafui na mṟi fu wechihamba orio mndu na wamṟasa oke. ‘Nkiki iki Mndumii alewutia mṟifu fung'anyi fudi?’

⁹ Nawo wechihaluo, ‘Kipfa waleda mkundana fo Mndumii-Ruwa owo wakaindia maruwa hengi na ihaṟundia.’”

Ndumi huya Shalumu

¹⁰ Mulafuhiye mndu apfie, ma mulambikie kilio. Indi fuhenyi kya icho ahendie kuleshe, kipfa echiwuyasepfo, Manya echiwona oruka amfeye-pfo.

¹¹ Kipfa Mndumii nahamba adi, kiidi kya mbonyi tsa Shalumu, mana o Yosia, mangi ya Yuda; aleitoṟia handu ha Yosia ndee, icho alewuka handu ha echiwuya se kunu pfo.

¹² Na handu halya aledao wupfungo hondu echipfia, manya echiwona oruka lu ma indii pfo.

Ndumi ya Yeremia huya Yehoyakimu

¹³ “Ochia lo mndu mowika mba yake na wuwicho, na shiṟiha shake na mtambo, motewa ungi naṟunde alawode wueri, ma nalamnenge wueri woke.

¹⁴ Mohamba, ‘Njechiwika mba yako njilandari na shiṟiha shilandari nao kawewika matiṟisha, mawanda hamashikie nyi mashidi mecha, na ishiyo fana ya kimande.

¹⁵ Alewo! Nochichilia kipfa kehodana, na wandu kiu mashidi ha meresi? Ndeo nalelya na inyo, na ianduo, kya sungusihu nyi hondo aleiṟimiṟa.

¹⁶ Naleanduo madedo ha mkiwa na ulya ahuṟi; nyi hondo aleiṟimiṟa. Ngesa ikyo chikyo injimanya? Mndumii ahamba.

¹⁷ Kyaindi meso hapfo na mrima fopfo, fuwode kindo kyosepfo shila nyi lango, na ipusuo samu ilawode mti, na iwonyia na iwuta kui wuminyi.’”

¹⁸ Kyasia Mndumii nahamba adi, “Kirianyi na Yehoyakimu mana o Yosia mangi ya Yuda, wechikapa kilio wehamba, ‘Wui msacha oko! Ang'u Wui mshiki oko!’ Wechikapa kilio kipfa kyake kehamba, ‘Wui Mndumii oko! Ang'u, wui wuitoṟi!’”

Ndumi ya Yeremia ya shindo shechiwutikia Yerusalemu

¹⁹ Nechiṟiko alawode kiṟumi cha nzoi, nechikuruyo na ikumbo kuleshe, nja ya shichumi sha Yerusalemu.

²⁰ Henda mṟasa Lebanoni, noirie ṟu lyapfo kiidi kya Bashani; nokoṟoṟome wuka Abarimu, kipfa wambuya wapfo waarisika.

²¹ Inyi njilededa na iyo kiheri uleṟimiṟa, indi iyo kohamba, “Njechiadanyiapfo.” Ifu nyi fuwei mkao fopfo, wokia wukoho wopfo uleindia ṟu lyakopfo.

²² Otanu lochiida luwiwite walisi wapfo, na wakunde wapfo wechidao wapfungo. Mandiho wechiṟeenze na inenewuka, kipfa kya wunyamaṟi wonu wose mulewuta,

²³ lyo okekaa Lebanoni, okewika sungu yapfo kiidi kya mashidi ha meresi, nochikaa kui mosaṟio mnu, nochiwawio cha mndu mka ai kufui na ifee.

Mwanduye fo Ruwa huya Konia

²⁴ Chando nji menyi moo Mndumii ahamba, na kokoya Konia mana o Yehoyakimu, mangi ya Yuda, awewa rachi iwode fana ya owoko loko lo kulyo njiwekukuṟuo ho iyo,

²⁵ na inyi njikuwike mawokonyi ha walya waikushiha iyo wakusoke moo, na mawokonyi ha walya uwaowoye, kiidi kya mawoko ha Nebukadneza, mangi o Babeli na kiidi kya mawoko ha Wakalidayo.

²⁶ Ambuya njechikukumba nja iyo na mayo mokufee, muhende oruka lungi mulawafeeye pfo mukae pfo.

²⁷ Oruka lulya walangie iwuya napfo wechiluwuuya ma ntapfo.

²⁸ Mnducho Konia, nyi kihia kimine kifunjikie. Nyi kihia kilachihiṟie. Kitewe wakumbo o na oshari loke kuleshe, orukenyi walaluichi nki?

²⁹ Ee oruka, “Oruka: ‘Oruka!’ Ichong'u idedo lya Mndumii.

³⁰ Mndumii nahamba adi, ‘Ṟehienyi mbonyi tsa mnduchu ke awode wanapfo, manya mfiri ya moo foke fose echiiṟimiṟapfo; kipfa kuwode ma umu o oshari loke, echiiṟimiṟa nadamie loṟikehu lo Dawidi, nachilie kiidi kya Yudapfo.’”