YEREMIA 21 - Bibilia Kui Mdedie fo Kimochi

Ilemo lya Yerusalemu lyadedo

¹ Ili nyi idedo lilechea Yeremia liwuka ko Mndumii, ili mangi Sedekia lilya aledaaya Pashuri mana o Malkia na Sefania mana o Maseya mkohanyi kehamba,

² “Luwese mbonyi ko Mndumii, kipfa Nebukadneza mangi ya Babeli naira shida naso, kofia Mndumii. Nechiluwutia chando maṟunda hake hai ha kiṟiha kundu nahende nalude.”

³ Kyasia Yeremia kawawia: “Wienyi Sedekia:

⁴ Idedo li-Mndumii-Ruwa o Israeli nahamba adi, ‘Ambuya njechiindutsia mrima shisha sha shida shi mawokonyi hanu isho mui kapana na mangi o Babeli na Wakaldayo iwo waimtengetia nja ya njomombo.

⁵ Inyi njimonyi njechikapana nanyo kui owoko luhoṟuo na kui owoko lwapfinya ee kui nyashi na owawo na kui kitusu king'anyi.

⁶ Njechikapa wenyi mṟi fu, wandu na mando hai na moo wechipfa kui ndaṟe ing'anyi ya makokoi .

⁷ Numa ya isho Mndumii ahamba, njechiwika Sedekia mangi ya Yuda na waṟundi wake na wandu wose waletsuhaa kiidi kya mṟi fu numa ya ndaṟe iya ya makokoi na oshu na njaa kiidi kya owoko lo Nebkadireza mangi ya Babeli, na kiidi kya mawoko ha wakituwa wawo, na kiidi kya mawoko ha wandu walya waishiha moo yawo, wechiwawaha kui oshu echiwalekia, ma iwasaṟia ma iwaichio wukiwa pfo.’”

⁸ Na iyo wia wandu-wa, Mndumii nahamba adi, “Ambuya ngawika njia tsiwi oshangunyi lonu, njia ya moo na njia ya opfu.

⁹ Mndu ose mokaa kiidi kya mṟi fu nechipfa kui oshu na njaa, na ndaṟe ya makokoi; kyaindi ulya echikure pfo kawadana na Wakalidayo iwo wamutengetie nechideo ai na moo.

¹⁰ Kipfa oshangu loko lui kiidi kya mṟifu njifuendie mawicho ma chi mechapfo, ‘Nyi inyi Mndumii, ngahamba.’ Ambuya fui kiidi kya owoko lo mangi ya Babeli nao nyi echifurumatsa.

Mwanduye huya mba ya wumangi wo Yuda

¹¹ “Na ko mbonyi tsa mba ya mangi ya Yuda, ‘Adanyienyi idedo lya Mndumii,

¹² lyo mba ya Dawidi! Mndumii nahamba adi; Anduonyi mwanduye ya wusumhanyi ngamenyi, mukiṟe iwo walewonyio, na iliso wukiwa kui owoko lo ichu alewuta ado, kundu nyashi yako ilawone yechiaka cha modo ikoṟe, ilawode mndu morumisha, kipfa kya wuwicho wo mawuto hanu.’

¹³ “Ambuya inyi njii nanyo, wandu wa pichili pfo, ma iṟaṟa lya rendewelenyipfo, Mndumii ahamba nyo mokehamba; ‘Nyiu echisoka nakapane naso, ang'u nyiu echiida kiidi kya kyoṟa kyadu?’

¹⁴ Njechimukapa kihianyi na ndunda tsa mawuto hanu; Inyi Mndumii-Ruwa ngahamba, ‘Njechiatsa modo, kiidi kya mashidi hake hafoi, furumatse orio kindo kiṟingichie.’”