YEREMIA 20 - Bibilia Kui Mdedie fo Kimochi

Kiloyo kya Yeremia na mkohanyi Pashuri

¹ Kyasia Mkohanyi Pashuri mana o Imeri, awei mkohanyi awei mnene mohoṟokia mba ya Mndumii-Ruwa, naleicho Yeremia kechihamba wuikimbi wo madedo ho.

² Nalyo Pashuri kakapa Yeremia, kampfungia itimbenyi liwei kichumnyi kya ora lo huye lo Benjamini, liwei mbenyi ya Mndumii-Ruwa.

³ Ngamenyi, Pashuri cho kapfunguo Yeremia kiidi kya itimba lilya, naalyo Yeremia kambia, “Mndumii akulahase Pashuri pfo, indi,” Ṟiho njora tsose.

⁴ Kipfa Mndumii nahamba adi, “Njechikuamtsia wuowu wung'anyi kopfo iyo, na mbuya tsapfo tsose wechioloka kui oshu lo wakituwa wawo na meso hapfo hechiwona isho, na inyi njechidambika Yuda yose mawokonyi ha mangi ya Babeli, nawaduo wapfungo wa shida nawawahe kui oshu.

⁵ Ngoseṟa, masaa hose ha mṟi fu na shilya shekewoneka pfo na shindo sha wuhuru na shisa shose sha wamangi wa Yuda, njechishiwika mawokonyi ha mkituwa owo wechiwawada wapfungo, na iwaduo mṟasa Babeli.

⁶ Na iyo Pashuri na wandu wose wa mba yapfo, mochihenda wusingenyi na iyo nochishika Babeli, napfo ochipfia na iṟiko, iyo na mbuya tsapfo ulewaikimbia madedo ha wongo.”

Yeremia anunuwa ko Ruwa

⁷ “Hoi Mndumii nolenjipiṟa na inyi ngapiṟika, iyo nowode pfinya kota inyi kowinga, ngawa kindo kesetsa mfiri puti, orio mndu nanjimina.

⁸ Kipfa orio mandi ngadeda njikapa kitohio, njifihiṟa. ‘Iwonyio! Irumatso! Kipfa idedo lya Mndumii, lilewa kituuro koko na imino mfiri puti.

⁹ Wulalu ngahamba ke njechimsenda pfo, ma njechidedase kui rina lyake pfo, kyasia kechiwa cha ili kuwode modo, sa fuiaka kiidi kyako fui fupfinyike, kiidi kya mafuo hako inyi ngalehela itirisia, ma njechiidima ikarishia pfo.

¹⁰ Kyipfa ngaicho italuo lya wandu wafoi!’ ‘Wuowu wui njora tsose!’ Wambuya, wako wose wanjilaaya njitisiki: Wehamba, ‘Mkumbenyi! Naso lochimkumba.’ ‘Kofia nechipiṟimka, naso lochimilama, lochitaa kiṟache koke.’

¹¹ Kyaindi Mndumii nai na inyi cha mbahanyi ioweshie. Ko ikyo iwo wanjiwonyia wechikapa mtulia, ma wechiwinga pfo, wechisonu mnu, kipfa walaleṟunda kui wuṟango, wechiwado sonu ya mlungana ilechihadimika.

¹² Kya indi iyo Mndumii Menyi Matorito, iyo nokehesha wenyi wusumhanyi, nokewona shi mrimenyi na mahionyi ha wandu, onjitarame njiwone kiṟache kyapfo huye ya wakituwa wako, kipfa ngakutambaṟuya idedo lyako.

¹³ Imbienyi Mndumii-Ruwa Menyi Matorito, ṟumishenyi Mndumii-Ruwa, kipfa nachiṟa ngoo ya ulya ahuṟi, kiidi kya mawoko ha wandu wa mkika.

¹⁴ Mfiri fulya njilefeo fudeo oseso! Fulawikio ona mfiri fulya wama oko alenjifee,

¹⁵ Mndu ulya aleendie wande oko mbonyi tsa iwoneka lyako, kechihamba, ‘Komefeo mana o womi,’ kemchihiṟa, naolotsio oseso.

¹⁶ Mndu cho nafanane na mṟi, iya Mndumii aleirumatsa nalasaṟe; naicho kipfihiṟo ngamenyi, kifahio kya mesa mfiri.

¹⁷ Kipfa alalenjiwaha lilya njilewuka wusunyi. Ko ikyo wama nawechiwa kipfu, kyako, na ilemio mfiri yose njilemeri.

¹⁸ Njilewuka wusunyi kipfa kya iki? Kundu njiwone wukiwa na fowa, na mkonu yako inyamaṟike kiidi kya sonu?”