YEREMIA 2 - Bibilia Kui Mdedie fo Kimochi

¹ Idedo lya Mndumii likanjichea lyehamba,

² “Henda noonguo mbonyi kya Yerusalemu ochihamba, Mndumii nahamba adi: ‘Njikumburie, mecha ha uwanake wopfo, ikunda lya wupora wopfo; Chandu ulenjiosha kulya nuka ya olele, Oruka lulalewayo mbeu.

³ Israeli wawei waele wa Mndumii; Shilimu sha kuwooka sha oshari loke; iwo wechimlya wechihutsio owingo; ngataṟa tsechiwachea Mndumii ahamba.’”

Wunyamaṟi wo waku wa Israeli

⁴ Adanyienyi idedo lya Mndumii, nyo wa mba ya Yakobo na nyo wa njoshari tsose tsa Israeli.

⁵ Mndumii nahamba adi, “Nkiki wandeanu walewona koko itane walekana na inyi wakaosha mbonyi tsa maai wakawa maai?”

⁶ Ma walehamba, “Nyiku ai Mndumii ulya aleluwuta Misri; kalusongoya kulya nuka ya msanga. Oruka luumu luichuo marina, oruka lo nyoda na ria lya opfu, lulekeido nyi mndu ma ilao nyi wandu?”

⁷ Inyi ngawawika kiidi kya oruka luichuo kando, mulyepfo ndunda na mecha hose haipfo, indi nyo kiheri kilya muleida kiidi kya oruka lulya, mulefanyitsa oruka lulya loko na kyooṟa kyako mkakihaluo kindo kisuikie.

⁸ Wakohanyi walehamba, “Oku Mndumii-pfo;” Manya wa kanyi walenjimanyapfo, walisi wakanjida, waikimbi wakahalukia Baali wakaikimba kyake, wakaosha mbonyi tsa wulya.

Mondu fo Ruwa na wandu wake

⁹ Kyasia kipfa kya isho njechisumkia kyanu, “Mndumii ahamba, na njechisumkia kya wachuku wapfo.

¹⁰ Keambadenyi mushike oruka lulya luluṟingichie, nyi mṟinga njora tsose lokelaho nyi Kitimu, muwone; dumenyi wandu wahende Kedari, kusaṟenyi mnu; muwone kokoya kindo cha iki kilemekaapfo kiheri kyose.

¹¹ Ngesa wandu wa mkambo wailacha maruwa hawo, ma chandu halawei Maruwa! Kyaindi wandu wako wailacha wuitoṟi wowo, ko kindo kilechiwatarama.

¹² ‘Lanye ngina ṟihiyonyi kipfa kya kindoki, mulaowuo kipfa nyi kindo kiendie sonu mnu,’ Mndumii ahamba.

¹³ Kipfa, wandu wako wawuta mawicho kawi, walenjida inyi njii soka ya mṟinga fo moo wakasuma nduwa tsawo wamenyi, nduwa tsiifuna, tsilechiidima iwada mṟinga.”

Ndunda tsa iwuṟa wuhendeli ko Waisraeli

¹⁴ “Ngesa Israeli nyi isinga ang'u namfee wusingenyi? Nyi wuda adao mpfungo?

¹⁵ Miiso njikoho tsiṟuṟuma kipfa kyake, tsapoṟohoṟa mnu na ṟu ling'anyi; tsikatewa oruka lukadeo mrapu, Mṟi ikasaramaya ilawode wandu.

¹⁶ Ngoseṟa wana wa Nofu na Tahapanesi, watocha ododo lo mdo fopfo.

¹⁷ Ishi shilekuchea cha uwekunda kumonyi, kipfa kuleda Mndumii-Ruwa opfo, lilya alekusongoya njienyi?

¹⁸ Na wulalu nochiwuta kuda kiidi kya njia ihendie Misri, inyo mṟinga fo Shihori Ang'u nochiwuta kuda kiidi kya njia ihendie Ashuru, inyo mṟinga fo meda fulya?

¹⁹ Wuwicho wopfo wochikuwuuya, madedo hapfo hechikukapa; umanye, kyasia uwone ke nyi kindo kiwicho mnu na kiendie wusutsu ida Mndumii-Ruwa opfo, ma kiidi kya mrima fopfo kuwode injiowuopfo Mndumii ahamba; Mndumii menyi matorito.”

Israeli yaleha iindia Mndumii-Ruwa

²⁰ “Kipfa wokia mbooko iyo kuleleha isongoyo nyi inyi; koweleha injiindia na injiadapfuma. Kipfa huye ya kitoṟomoso kileshe, na wanda ya ikidi liwode maṟa mawishi nolehongoma kowuta mbonyi tsa wumeluki.

²¹ Inyi nyi njiwekudongie, msabibu mcha, mbeu njicha njisambuṟe; nulehaluka kuda kowa msabibu fo ngeṟenyi mesonyi hako?

²² Kipfa ma kotambahana isamba na mbala na sabunyi tsa mbaṟi tsose, ochiidima iwuta oko lo wuwicho ulewuutapfo,” Mndumii-Ruwa ahamba.

²³ “Nyi wuda ochiidima ihamba ke, njifanyi ngafu-pfo, ma njileosha Mabaali-pfo?” Ambuya njia yapfo pichinyi, umanye shilya uwutie, iyo nyi ngamia njiangu idicha, yekeida njienyi tsake;

²⁴ Nzoi ya ngeṟenyi iichiwie kundu ko nuka yekeṟufuṟa na mbuo ikawa cha otanu kiidi kya lango tsayo nyiu echiidima iihalutsa. Wose walya wechiishiha wechikulisa wukiwa wawenyi pfo; kiidi kya meri fumu wechiiwona.

²⁵ Ringa odende lopfo lulauṟe kyadu, na oṟoo lopfo kulaangae, kyaindi iyo nyi ulehamba, “Kuwode kikusirio-pfo; kipfa njilekunda maruwa ha wahenu, na inyi ngawaosha.”

Israeli wawaṟi wahoṟuyo

²⁶ Chando inyinyi lyekeṟenze ili lyawado, na wudo mba ya Israeli yechiṟenze; wo na wamangi wawo, na wanene wawo, na wakohanyi wawo na waikimbi;

²⁷ Wekewia ituṟuma lya ikidi, “Iyo nyi ndeako,” na iwia iho iyo nyi ulenjifee; kipfa nyi walenjikumba mhongo manya walakunde iambuyana na inyi; kyaindi maheri hakiwi wechihamba, “Horoka ulukiṟe!”

²⁸ “Kyaindi heku maruwa halya hapfo ulehawika? Hahoṟoke luhawone kokoya hechiidima ikukiṟa kiheri kya kiwi kyapfo; kipfa itala lya maruwa hapfo nyi kimu na itala lya mṟi yapfo iyo Yuda.

²⁹ Nkili mukundi injipfulutsa nyashi nyo mose mulenjidekio, Mndumii ahamba.

³⁰ Njilekapa wana wapfo kya wulya; waleleha ilosho kui ngapo; oshu lonu muwenyi lulewaaha waikimbi wapfo, cha mwiso fokenyamaṟa.

³¹ Lanye kishari keambuyenyi idedo lya Mndumii. Ale, nyi ngawa nuka ya msanga ko Israeli Ang'u oruka kuwode meema riti Nkili wandu wako wahamba, so lulekusheṟuo lukundi icha na kopfo-pfo.

³² Alewo mpora nechiidima ihadima shilya shekuchopa? Ang'u moaliko nahadime nguo yake ya wali? Indi wandu wako wanjihadimie mfiri ifoi ilechiwa itala.

³³ Chando kulesungusia njia yapfo kundu noshihe mbuya, nkyo kitewe ma waka walya wawicho nulewalosha njia tsapfo.

³⁴ Kukawewono na samu ya walya walawode mti ipfo, kilemiyonyi kya nguo tsapfo; Manya njileiwona handu hengi-pfo ma ya wandu wengi-pfo na oo tupu.

³⁵ Kyaindi na kulewehamba ke, ‘Inyi njiwode kita-pfo; kofia nyashi yake ihutsie kawenjida. Ambuya, njehenda kianduyonyi hamu na iyo,’ kipfa nuihamba, ‘Njilewuta wunyamṟi inyi-pfo.

³⁶ Nkili uiṟahaṟaha kudi kundu noilache ohendo lopfo. Nochiṟeenze kipfa kya Misri, chandu kuleṟeenze kipfa kya Ashuru.

³⁷ Ma kudo nochiwuka koke na mawoko hapfo mdohu kopfo. Kipfa Mndumii naleha iwo wose kulewadichilia, ma ochiwona kiira kowo pfo.’”