YEREMIA 19 - Bibilia Kui Mdedie fo Kimochi

Nungu ipaṟikie

¹ Mndumii nahamba adi, “Henda huṟa nungu ya teri. Uhende urie wameku maata kiidi kya wandu na wakohanyi maata.

² Uhende itane pichi lya mana o Hinomu, lii hafui na kichumi kya mba tsa shohyo uonguopfo madedo njechikuwia.

³ Nochihamba adanyienyi idedo lya Mndumii nyo wamangi wa Yuda, na nyo wenyi wa Yerusalemu Mndumii menyi matorito Ruwa o Israeli nahamba adi, ‘Ambuyenyi njechiende mawicho huye ya handu ha mndu ose, moicho mbonyi tso madu hake hechisakia.

⁴ Kipfa walenjida inyi na ihaluo handu ha hakawa hahenu nawo wakapfaamiria uvumba maruwa hengi walawehaichi, ma chi wo tupupfo na wandeawo ma wa mangi wa Yuda wakatana waichuṟa samu ya wandu walai na mti.

⁵ Wakawikia Baali mba handu ha huye kiidima wakakoṟa wana wawo mwano, cha fomaya modonyi kipfa kya Baali kindo njilalewawasa inyi ma ikideda, ma liwei mrimenyi foko pfo.

⁶ Kyasia ambuyenyi mkonu ikeri icha, Mndumii ahamba, kidi kya mkonu yo handu ha hechilahose Tofeti, ma pichi lya mana o Hinomu pfo, nyi kolaho pichi lyewahia.

⁷ Na inyi njechiilacha idedo lya Yuda na Yerusalemu handu ha, njechiwaolotsa kwui oshu oshangunyi lo wakituwa wawo na kui owoko lo wandu weshiha moo yawo. Mnying'a yawo yechiinengo ndehe tsa nginehu na mando malang'a ha orukenyi iwe kelya kyaho.

⁸ Njechihaluo mṟi fu fuwe kindo keṟihisha; wandu na italuka orio moida kufui nechiṟihio na italuo kipfa kya ngapo yafo.

⁹ Njechiwatikiria walye nyama ya wana wawo, na ya wana wa waka wawo. Nawo wechilya nyama ya orio mndu na mbuya yake kiheri kya kiwi, walya wai wakituwa wawo wandu walya waishiha moo yawo wawaendie fowa.’

¹⁰ “Nahong'u ochipaṟa nungu iya oshangunyi lo wandu walya warianyi na iyo.

¹¹ Kochiwawia Mndumii nahamba adi, ‘Nyi wudi njechipaṟa wandu wa mṟi fu cha mndu mopaṟa kihiya kya teri, kilechiwase isungusia kichie cha kuwooka, nawo wechiṟika wandu kiidi kya Tofethi mṟasa kulechiwoneka se handu heṟika.

¹² Nyi wudo njechiwutia handu ha, Mndumii ahamba, na wose waipfo, na ihaluo mṟi fu fuwe cha Tofethi.

¹³ Na mba tsa Yerusalemu na mba tsa wumangi wa Yuda, tsilefanyitso ngafu tsechiwa cha handu ha Tofeti ee da, mba tsose sa kai tsatso wandu walepfamiṟia uvumba itoṟito lyose lya ruwehu, na iletsia maruwa hengi mwano ya mvinyo.’”

¹⁴ Kiidima, Yeremia kawuka ipfo Tofeti, ipfondu Mndumii-Ruwa alemduma nahende iduopfo wuikimbi, nao kahoṟoka osehu lo mba ya Mndumii-Ruwa, kawia wandu wose kechihamba:

¹⁵ “Mndumii Menyi Matorito Ruwa o Israeli nahamba adi, ‘Ambuya njechiendie mṟi fu na shihongo shafo mawicho halya hose njilededa kipfa kyafo, kipfa waumiṟa nzingo tsawo kundu walaadanyie madedo hako.’”