YEREMIA 18 - Bibilia Kui Mdedie fo Kimochi

Yeremia ai kanyi ko wesungusia shinungu

¹ Idedo lilechea Yeremia liwuka ko Mndumii lyehamba,

² Kure nosoke mṟasa mba yesungusia shinungu na ipfo njiwode madedo njechikuwia.

³ Kyasia ngasoka itane mba ya shohyo ngakoya kechiṟunda na shidenga.

⁴ Na kilya awekisungusia kui teri kikanyamaṟika ma kudo kawesungusia kindo kingi kilai cha kilya kya kuwoka kilenyamaṟika, chando alekukundia ulya mowumba.

⁵ Nalyo idedo lya Mndumii likanjichea lyehamba,

⁶ “A ngesa nyo wa mba ya Israeli njechiidima imuwutia chando ichu mosungusia alewuta? Mundumii ahamba. Ambuyenyi chando teri ii owokonyi lo mowumba nyi wudo nyo mui owoko nyi loko iyo mba ya Israeli.

⁷ Kiheri kyose njechionguo mbonyi ko mkambo na mbonyi tsa wumangi ikuṟuo na ifunja na irumatsa.

⁸ Kokoya mkambo fulya njilefuhamba fukahaluka na ida mawicho hafo njechiilacha mahio hako njilechiwuta chando mbekusirie iwuta.

⁹ Na kiheri kyose njechionguo mbonyi tsa mkambo na mbonyi tsa wumangi iwaya na iwika.

¹⁰ Kokoya wechiwuta mawicho oshangunyi loko walaindie ṟu lyako. Kyasia njechiilacha mahio hako njilechiwuta mecha halya mbekusirie iwuta.

¹¹ Kyasia wulalu henda wia wandu wa Yuda na wenyi wa Yerusalemu ochihamba Mndumii nahamba adi njechiwumba mawicho huyanu, na makusaṟo huyanu, wuyenyi wulalu orio mndu nade mawicho, sungusienyi njia tsanu na mawuto hanu.

¹² Kyaindi wo walehamba kuwode kikusirio kyose pfo, kipfa so lochiosha mahio hadu luwenyi, orio mndu nechiwuta kui wukahari wo ngoo yake shilya shii kiidi kya mrima foke mbicho.”

Wandu waleha Ruwa

¹³ Kui kipfa kya isho Mndumii nahamba adi, “Wulalu wesenyi kiidi kya mkambo: nyiu aleicho mbonyi cha itsi, wandu wa Israeli walewuta mbonyi tsa wusutsu mnu.

¹⁴ Ale, mafumvu ha Lebanoni haletsitsa manzaho ? Ang'u shimeda sha mṟinga shiwukie mafumvunyi hake shekeumia?

¹⁵ Kipfa wandu wako walenjihadima, wakapfaamiṟia maruwa hawo uvumba; wakakukahaṟa na injihadima, wakahalukia mkao yawo ya kuwoka, kundu waide kihadi kundu kulaikusungusie.

¹⁶ Wahaluo oruka lowo kiṟihisho, naitaluka lilatsitsa, orio mndu moida kufui nalo nyi echiṟihio, na iwada dumbu na isingisa mdo foke.

¹⁷ Ambuya njechiwarahanyitsa oshangunyi lo wakituwa, kui otanu lo ora lo ngamenyi. Njechiambuya ngomi tsawo, chi shamu shawo pfo kiheri kya ngataṟa tsawo.”

Kyama kyewaha Yeremia

¹⁸ “Nalyong'u wakahamba njonyi ludede kya Yeremia, kipfa wuwawaso wochidekia mkohanyi pfo na wulaanyi wodekia menyi wuṟango pfo, ma idedo lechidekia Mwikimbi pfo. Njonyi lumkape kui idedo lyake amonyi, ma lulaadanyie idedo lyake ma limu.”

¹⁹ Njiambuya hoi Mndumii, uicho ṟu lya iwo wakeri irekiana na inyi.

²⁰ Ngesa mawicho hatao handu ha mecha? Kipfa wasumia mrima foko rina. Ambuya chando njilehoṟoka oshangunyi lopfo, kundu njidede mecha kipfa kyawo, ngahaluo nyashi yapfo ilawakoye.

²¹ Kui kipfa ikyo leka wana wawo wapfe njaa, leka oshu lowo luwahoye, waka wawo wapfiio nyi wana wawo, wawepfio nyi wamii wawo, wasoṟo wawo wawaho nyi ndaṟe mbicho, wanake wawo wawahiyo shidenyi. Kui oshu.

²² Kifihiṟo kiichio kiwuka mbenyi tsawo, ili ochiende ichekeṟo lya wasoki liche huyeyawo faṟa, kipfa wanjiwikie mshihodi funjiwade, wakawefuala kundu fuwade madende hako.

²³ Kyaindi iyo Mndumii, noichi chila tsawo tsose huyako tsenjiwaaha; kulawahoṟie wuwicho wowo, ma kulasanje wunyamari wowo mesonyi hapfo. Kyaindi wawone ngataṟa oshangunyi lopfo, nokapane nawo kiheri kya nyashi yapfo.