YEREMIA 17 - Bibilia Kui Mdedie fo Kimochi

Wunyamaṟi na ngapo ya Yuda

¹ “Wunyamaṟi wo Yuda wui wurehie kui kalamu ya menya; kui sumi ya almasi wui wutoṟongochie kiidi kya mrima yawo na ndumbenyi tsa rasio tsawo.

² Wana wawo wakumburie rasio tsawo na masaa hawo kiidi kya orio ikidi huye ya shitoṟomoso;

³ Mafumvuhu kiidi kya oruka lulawode kindo. Njechiolaola wusuṟi na masaa hapfo hawe njoko ya wunyamaṟi wopfo wuingiki kiidi kya oruka lopfo lose.

⁴ Kyoṟa kyapfo kechidekadeka kiidi kya mawoko hapfo kumonyi, njechikuhaluo isinga lya wakituwa wapfo orukenyi ulaluichi kipfa modo fo nyashi yako fuaka na ikoṟa fulechiruma.”

Madedo maata ha wuikimbi

⁵ Mndumii nahamba adi: “Mndu mokusiria ungi namsese. Ulya mohaluo mndu o wandu nyi mringi oke, mrima foke fukakaa kihadi na inyi Mndumii-Ruwa.

⁶ Kipfa nechiwa mkiwa kiidi kya nuka, echiidima iwona mecha ma kokoya hachapfo, nechikaa nuka ya msanga ilawode mringa, oruka lo monyo lulakelao nyi wandu.

⁷ Nambikie ona mndu ulya mokusiria Mndumii, Ichu Mndumii ai kikusirio kyake.

⁸ Nyi ai cha ikidi liliwaye mbai ya mṟinga. Lidaye mri yake kufui na soka. Echiowuo kiheri kya kwari pfo. Maṟa halyo hechileheka. Maka fulawode mvuo ifoi. Fochida fulawika ndunda pfo.

⁹ “Mrima fo mndu fui mlembi kota shindo shose; fochiidima ichiṟo, ma kuwode sa echiidima ifumanya pfo!

¹⁰ Inyi Mndumii njekeṟisa mrima ngawehesha pfinya, tsa mbihu ngaweinenga orio mndu, ohawi lo njia tsake na kiheo kya mawuto hake.

¹¹ Chando ndehe yekesanyia maalea ilalehahalutsa, na wudo ai mndu ekewona masaa, halai ha wusumuhanyi, kiidi kya mfiri yake hechilekana nao, ifurumiaho nechiwa tondo.

¹² Kidi kya wuitoṟi kikiirie huye, wokia kuwoka nyiho hando hadu haele.

¹³ Hoi Mndumii mkusirie fo Israeli, iwo wose wekuda wechisonu iwo wechilehana, na iwo wechiṟehiyo kilulinyi kipfa wada, Mndumii ai soka ya mṟinga fo moo.”

Yeremia aterewa ndarama ko Ruwa

¹⁴ Unjichiṟe hoi Mndumii na inyi njechichia, unjikiṟe na inyi njechikia: kipfa iyo nyi ui kiṟumi kyako.

¹⁵ Keambuya wakeri injiwia: idedo lya Mndumii lyeku? Licheng'u.

¹⁶ Inyi njiledicha iṟunda lyapfo lyewa mringi pfo, manya njilelanga mfiri ya wukiwapfo. Iyo noichi shilya shilewuka dumbunyi lyako shiwei oshangunyi lopfo.

¹⁷ Ulawe kitewe kya wuowu koko; iyo ui modichia kiheri kya mawicho.

¹⁸ Wahutsio sonu wose wainjipfulutsa, indi inyi njilahutsio sonu. Wawado nyi wuowu wung'anyi, indi inyi njilaowuo noende huyawo, mkonu ya wukiwa nowarumatse wakombeke kombi.

Iindia Sabato

¹⁹ Mndumii kanjiwia adi, “Henda uhoṟoke o kichuminyi kya Benyamini kekeido nyi wamangi wa Yuda na iwuya na kiidi kya shichumi shose sha Yerusalemu.

²⁰ Nowawie adanyienyi idedo lya Mndumii nyo wamangi wa Yuda wose, nanyo mokekaa Yerusalemu, nyo mokeida kiidi kya shichumi shi.

²¹ Mndumii nahamba adi, ‘Kuṟisenyi mrima yanu mulakudike mhanda fose mfiri fo sabato ma mulafuende kichuminyi kya Yerusalemu.

²² Ma mulawute mhanda kiidi kyamba tsanu mfiri fo sabato ma mulaṟunde iṟunda lyose; indi mochitana mwele mfiri fo sabato-chando njilewawasa wandeanu.

²³ Ma kudo waleadanyia ma ideha madu hawopfo waleumiṟa nzingo tsawo kundu walaadanyie ma iambia kiloshio.’

²⁴ “Nakyo kechiwa kokoya mochinjiadanyia inyi na macha hose. Mndumii ahamba mulaitse mhanda fose kidi kya shichumi sha mṟi fu mfiri fo sabato mofutana mwele, mfiri fo sabato mulaṟunde iṟunda lyose.

²⁵ Nalyo wamangi wang'anyi wechiida mongonyi fo mṟi fu wadamie loṟikehu lo wuitoṟi wo Dawidi wechidoya magari ha frasi tsawo na wanene wawo wandu wa Yuda na wenyi wa Yerusalemu na mṟi fu fochikaa mlungana.

²⁶ Wo wechiwuka mṟinyi ya Yuda na handu ha njoṟa tsa Yerusalemu na oruka lo Benyameni na Shefela na oruka lo mafumvu na ora lo Negebu wechiende mwano yeana mkonu ya Mndumii.

²⁷ Indi kokoya mulakundi injiadanyia itana mwele mfiri fo sabato mulechiduo mhanda na iida kichuminyi kya Yerusalemu mfiri fo sabato nahong'u njechiatsa modo wokia mongonyi na irumatsa mba tsa wuitoṟi tsa Yerusalemu fuake fulechiruma.”