YEREMIA 16 - Bibilia Kui Mdedie fo Kimochi

Yeremia aimo sia na ikuinadia lyake

¹ Idedo lya Mndumii-Ruwa likanjichea lyehamba:

² “Iyo ochialika ma ochifee wana handu ha-pfo.

³ Kipfa inyi Mndumii-Ruwa ngahamba njidi kya wana wa kika na wa kiumi wechifeeyo iya na wafee wawo.

⁴ Iwo wechipfa kui ndare njiwicho kulechiwoneka mowafihiṟia ma iwaṟika. Mnying'a yanu yechikuala cha kyala kya oruka. Wechiarisika kui oshu na njaa: Mnying'a yawo yechiwa kelya kya ndehe na mando hai na moo malang'a.

⁵ “Kipfa inyi Mndumii-Ruwa ngahamba njidi: Ma kulaide na mba ya kilio ma kulahendepfo ifihira na ikapa kilio. Inyi nyi ngawuta ofoṟo loko, wucha woko na osaṟio loko kiidi kya wandu wa.

⁶ Wose wang'anyi na watutu wechipfa. Kiidi kya orukalu; wechiṟiko-pfo, kochiwoneka mowakapia kilio pfo, kuwode mokusaṟasaṟa na iwuta njui tseawuka pfo.

⁷ Kuwode moinenga ichu ampfie kelyapfo, manya mringa fommbihiṟia moo nanyo kipfa kya ipfiio nyi ndeye angu mae-pfo.

⁸ “Kulaide kiidi kya mba iwode mfuho noladamie ilya na inyo nawo.

⁹ Kipfa inyi Mndumii-Ruwa menyi matorito, Ruwa o Israeli ngahamba njidi. Njechiwika kishingo na mtsitsionyi fo maṟu ha sia na ngululu hamu na maṟu ha menyi wali na moaliko ishi shose njechishiwuta muwonyi na pata.

¹⁰ Na iyo ili ochiwia wandu-wa madedo ha hose wo wechikuwesa! Kitewe Mndumii-Ruwa nahambe madedo mawicho hadi kipfa kyadu nki? Deko lida lulewuta? Nyi wunyamaṟi wuda lulewuta. Mndumii-Ruwa Ruwa odu?

¹¹ Na iyo nochiwahaluo ke inyi Mndumii-Ruwa ngahamba njidi, wandeanu walenjida wakaosha maruwa hengi, wakahaṟundia na ihaindia. Walenjida na waleindia mawawaso hako pfo.

¹² Nyo muletana owicho kota wandeanu kipfa orio umu onu nyi awode orikiki na makusaṟo mawicho mokenjiadanyia pfo.

¹³ Ko ikyo njechimkumba kuleshe na oruka lu muhende oruka lulaweichio nyi wandeanu ma nyo muwenyi ipfo mochiindia maruwa hengi mfiri na kio ma njechiwasaria pfo.”

Iwuya kuwuka usamiṟonyi

¹⁴ “Ambuya mkonu iicha nyi inyi Mndumii-Ruwa ngahamba, wandu walechikaa walye nyamu wehamba, ‘So Mndumii-Ruwa menyi moo,’ alewuta wandu wa Israeli orukenyi lo Misri.

¹⁵ Indi wechilya nyamu na ihamba, ‘So Mndumii-Ruwa menyi moo, alewuta Waisraeli orukenyi lo mtsudu na wuka njoruka tsose alewafunyia pfo kipfa njechiwawihiṟa wawuye orukenyi lowo njiweinengie waku wawo.’”

Ngapo iicha

¹⁶ Mndumii-Ruwa ahamba: “Ambuya njechilaha wadehi wafoi wache iwada wandu wa, kiidima njilahe welasa wache iwalasa kiidi kya shitoṟomoso, na mbakonyi tsa maṟaṟa.

¹⁷ Kipfa inyi njiwonyi mawuto hawo hose kuwode kindo kiṟike kokopfo. Madeko hawo hose hai pata koko.

¹⁸ Njechitaa kiṟache ka ikumi, kipfa kya njonyamaṟo tsawo na madeko hawo kipfa wafanyitsa ngafu oruka loko, kui mnying'a ya maruwa hawo hasuiṟie, wakaichuṟa oruka lu loko isuiṟa lyawo.”

Mkusirie fo Yeremia

¹⁹ Iyo Mndumii-Ruwa! Iyo nyi pfinya yako na opanga loko kopfo, nyi kidichionyi kiheri kya ngataṟa. Njoshari tsose tsa wuyana tsekuchea tsechihamba, “Waku wadu wawewode kindo pfo shila maruwa ha wongo, shindo sha mai shilawode kiira.

²⁰ Ngesa, mndu owandu nyi echiidima isungusia ruwa oke? Koko iwo chi ruwa manyalepfo.

²¹ Ko ikyo Mndumii-Ruwa ahamba, “Mandi ha njechiwalosha wamanye necha na pata pfinya tsako na wuidimi woko nawo wemanya ke rina lyako nyi Mndumii-Ruwa.”