YEREMIA 15 - Bibilia Kui Mdedie fo Kimochi

Ngapo ya wandu wa Yuda

¹ Kyasia Mndumii-Ruwa kanjiwia, “Makokoya Mose na Samweli wawechihoṟoka oshangunyi loko na injiterewa njisaṟie wandu wa, njiwewasaria-pfo. Wawute iya oshangunyi loko. Waleke wakuhendie kowo.

² Wakakuwesa, ‘Luhende ku?’ Iyo nowahaluo ke inyi Mndumii ngahamba njidi: ‘Wai wateṟie opfu lo ndaṟe, wechipfa kui ndaṟe; wai wateṟie opfu lo oshu, wechipfa kui oshu; wai wateṟie opfu lo njaa, wechipfa kui njaa; na wai wateṟie idao wapfungo, wechidao wapfungo.’”

³ Inyi Mndumii-Ruwa ngadumbuo iende mbaṟi tsina tsa orumatso: shida yechiwawaha, shite shewatufuo tufuo, ndehe tsewatona, mando ha ngeṟenyi hewadapfuna na iwamarisa.

⁴ Njechimuhaluo kindo keowesha kiidi kya wamangi wose wa wuyana, kipfa kya mbonyi tsa Manase mana o Hezekia, alewuta ipfo Yerusalemu lilya awei mangi ya Yuda.

⁵ Nyiu echimusaṟia nyo wandu wa Yerusalemu? Nyiu echikapa kilio huye yanu? Nyiu echihoṟoka iwesa mbonyi tsanu?

⁶ Nyo mulenjileha inyi, ngahamba inyi Mndumii-Ruwa; mkanjida mkawuya nduma. Ko ikyo ngahoṟotsa owoko loko imurumatsa; ngalehela imusaṟia.

⁷ Njilemuela na njonyi yeela, orio mṟi fo oruka; ngarumatsa wandu wako, ngawaaha wana wawo, manya kudo walade mawuto hawo mawicho.

⁸ Ambuya wakusu wawo wafoi, kota mlelya fo ipalyipalyi. Orio mndu mka o wana wai wakoho, ngawaendie mrumatsi mfiri. Ngatewa mawawio na ngataṟa, shiwahoye kui kitusu.

⁹ Mndu mka aleṟumisho kui wana mfungade; kusaṟe awode manya umupfo. Nawuta mṟufu foke fo ifurumia, Mnengeri foolokia kui mfiri, nahoyo nsonu na isalucho, walya wadeo na moo, wearisika kui oshu lo wakituwa wawo. Nyi inyi Mndumii-Ruwa ngahamba.”

Yeremia anunuwia Ruwa

¹⁰ Ochia loko wama oko ke nulenjifee! Inyi ngawa mndu o Ngano. na ngapano na orio mndu orukenyi kose! Inyi njilemeakuo ang'u iakuyo na mndu pfo. Kyaindi orio mndu nainjilisiṟa nyamu.

¹¹ Kyasia ng'u Mndumii-Ruwa kudee njosesotso tsinjikoye kokoya njilakurundia necha na kokoya njilalekuterewa kipfa kya wakituwa wako kiheri wawei wukiwenyi na waale.

¹² Ngesa mndu nechiidima ifunja menya, menya iwukie mtsudu, ang'u aṟeṟa?

¹³ Mndumii-Ruwa ahamba, “Njechihaluo masaa hanu na shisa shanu shidao cha shawado shidenyi kulawode itao kindo kyose kipfa kya wunyamaṟi, wonu mulewuta orio handu orukenyi.

¹⁴ Njechimuhaluo masinga ha wakituwa wanu kiidi kya oruka mulaluichi kipfa nyashi yako yaaka modo fulechiruma mlungana.”

¹⁵ Na inyi ngahamba kyaindi iyo Mndumii-Ruwa noichi; unjikumbuo uche injitarama. Njitaaya kiṟache kyako ko watuuri wako. Iyo nui mtirisi ulanjide njiarisike. Kumbuo njirumo kipfa kyapfo.

¹⁶ Njilewona madedo hapfo ngahalya, ngameṟa hakanjiinenga sia ing'anyi, hakaloda mrimenyi foko. Kipfa inyi njimanyikie kui rina lyapfo. Lyo Mndumii-Ruwa menyi matorito.

¹⁷ Njiledamia na wachihie-pfo, manya njilefuda nawo pfo, Njiledamia njimonyi kipfa owoko lopfo, luwenjilemia, kipfa nolenjiichura nyashi yapfo.

¹⁸ Nkili maturo hako halasia? Kitewe shifaṟe shako shilachia, manya shikundi iṟundiopfo? Na kya lohi onjilemba? Cha kimeda kiumiaumia!

¹⁹ Mndumii-Ruwa kahaluo: “Kokoya ochiwuya njechikuwihiṟia chando uwei mboko, na iyo unjiṟundie-se. Kokoya odeda madedo hawode wuṟango halai ha wutondo, nochiwa mdedi oko. Wandu wecha ikusanza na iyo ma chi iyo ochihenda iwasahia pfo.

²⁰ Oshangunyi lo wandu wa, njechikuhaluo omombo luikare lo aṟeṟa. Wechikapana na iyo, kyaindi wechiidima ikuwinza pfo, kipfa inyi njii hamu na iyo, ikukiṟa na ikuashuo. Nyi inyi Mndumii-Ruwa ngahamba.

²¹ Njechikukiṟa mawokonyi ha wandu wanyamaṟi, na ikuashuo njaenyi tsa wandu wanesi.”