YEREMIA 14 - Bibilia Kui Mdedie fo Kimochi

Kwari kuṟihishie

¹ Idedo lya Mndumii likachea Yeremia, kui mbonyi tsetuṟa mvuo

² “Yuda yakapa kilio, mongo yake yaṟengeṟa; Wadamie wanda waṟee kanyiki; na kifihiṟo kya Yerusalemu kyado huye.

³ Wanene wawo wakeduma waṟundi wawo mṟingenyi; Wekeshika nduwenyi walawone mṟinga; wekewuya na shihiya shilawode kindo, wasingidie na iawo nyi moo, na ishikia mdo yawo.

⁴ Kipfa kya oruka lupaṟikie, Kuwode mvuo inosie oruka-pfo; wedema wawodo nyi wuowu, na ishikia mdo yawo.

⁵ Ee da, ndehe nayo yada shiwana, kipfa kulawode maṟa.

⁶ Nzoi ya ngeṟenyi ikahoṟoka kitonyohu kya fumvu, yeelo cha kisii, meso hayo hawonyi necha-pfo, mipfa kulawode maṟa.

⁷ “Wandu wakahamba; ‘Manya chandu wunyamaṟi wodu woluṟingishia, iyo Mndumii noṟunde kipfa kya rina lyapfo, kipfa wunyamaṟi wodu nyi wufoi mnu wukatana woṟihisha.

⁸ Iyo nyi kikusirio kya Israeli, mkiṟa odu kiheri kya kiwi, nki kitewe ukeri cha mhenu orukenyi lodu, ang'u mndu o kyaṟo alaa kio kimu tupu.

⁹ Nkili owa cha mndu alaichi kilya aiwuta, kowa cha mbahanyi alechiidima ikiṟa? Kyaindi iyo Mndumii nyi ui kiidi kyadu, lolelaho kui rina lyapfo ulaluleke.’”

¹⁰ Mndumii nawia adi wandu-wa, “Nyi udi walekunda iṟahaṟaha; walaidime ikukarisha, kyasia na Mndumii echiwaambia-pfo, na wulalu nechikumbuo wuwicho wowo, nechiwuwuya njonyamaṟo tsawo.”

¹¹ Nao Mndumii kanjiwia, “Kulaterewie wandu-wa mboṟa.

¹² Manya wakakuotoya njechiicho kiterewo kyawo-pfo, wakawuta mwano na shidaso shemaya madonyi hamu na shilimu njechiambilia-pfo, njechiwarumatsa kui oshu, na njaa na ndaṟe ya makokoi.”

¹³ Kyasia ngahamba, “Ambuya Mndumii-Ruwa waikimbi waiwia wandu ke, kochiwada oshu manya njaa-pfo; kochiwada oforo, luwanzi handu-ha.”

¹⁴ Nalyo Mndumii kanjiwia, “Waikimbi-wo waikimba kui rina lyako wongo, inyi njilewadumapfo, njilewawasapfo manya njilededa nawopfo, wakeri imuwia mbonyi tsa wongo na makusaro ha wongo, na wulashi na mdambuye, na orio idedo lya ulya lya shilya wakusaṟa wawenyi.

¹⁵ Kyasia Mndumii nahamba adi, kui mbonyi tsa iwo waikimba wongo njilawadumie, kyaindi wakahamba ke oshu na njaa shechichea orukalupfo; oshu na njaa shechirumatsa waikimbi wo.

¹⁶ Kiidima na iwo waleambia wuikimbi-wo wo wongo wechikumbo nja ipfo mṟinyi fo Yerusalemu njienyi tsing'anyi wai mnying'a kipfa kya oshu na njaa kulechiwoneka mowaṟika. Isho shewakoya wo wawenyi, waka wawo, wana wawo wa kika na kiumi, kipfa nyi njechiwaletsia wuwicho wowo wawenyi.

¹⁷ Nyi udi ochiwawasa: ‘Kima meso hako hawechifuha mfiri puti hetonyitsa mchenyeṟe, kipfa wandu wako wawawike shifaṟe shiwicho, na ngapo ing'anyi mnu.

¹⁸ Ngahenda nja mndeminyi. Ngakoya mnying'a ya wandu wawahe shidenyi, ngaida na mṟinyi ngakoya mnying'a iwaahe nyi njaa! Waikimbi na wakohanyi watambahanyia mbonyi tsawo orukenyi, walamanye kindo waiwuta.’”

Wandu wafiiṟia Ruwa

¹⁹ Hoi Mndumii-Ruwa, naho oleha Yuda piu? Mrima fopfo fosuiṟo nyi Sioni, Nki kitewe ulukape kudi owicho? Luwekusihiye ofoṟo indi, Lulawone kicha kyose, Luwewedia ikia, indi lukahoya sheluowesha.

²⁰ Lotocha njonyamaṟo tsadu, Hoi Mndumii-Ruwa, Lotocha njonyamaṟo tsa wafee wadu, Kipfa nyi lokudekio iyo,

²¹ Kulalukumbe, kui kiṟumi kya rina lyapfo. Kulamine loṟika lo wuchili na wuitoṟi wopfo. Nokumbuo mma fopfo naso, kulafutehie.

²² Ngesa maruwa ha wongo ha mkambo heidima iende mvuo? Ang'u ngina itonyitse meṟa? Chi iyo Mndumii-Ruwa odu, kui kipfa kya ikyo luikuweda, kipfa iyo nyi uwikie shindo shose.