YEREMIA 13 - Bibilia Kui Mdedie fo Kimochi

Kiṟota kya kitanyi

¹ Mndumii-Ruwa kanjiwia adi, “Henda huṟa kiṟota kya kitani na ukupfunge kitsinyi, ulakikape mṟingenyi.”

² Kyasia ngahenda ngahuṟa kiṟota chando njilewawaso nyi Mndumii-Ruwa, ngakupfunga kitsinyi.

³ Kyasia idedo lya Mndumii-Ruwa likanjichea lya kawi.

⁴ “Duo kiṟota-ki ulehuṟa ikyo ukupfungie kitsinyi uhende medenyi fo Eufrate na ikiṟika opangenyi lo iho.”

⁵ Ngawehenda na iṟika kiṟota kilya kufui na meda fo Eufrate chando Mndumii-Ruwa alenjiwawasa.

⁶ Kyasia komeida mfiri ifoi Mndumii-Ruwa kanjiwia, “Kure nohende mṟasa meda fo Eufrate, nohende iende kiṟota kilya njilekuwia nohenda ikiṟika.”

⁷ Ngahenda mṟasa Eufrate ngasuma alya handu njileṟika ngawona kiṟota kilya kilenyamaṟika, kewa ikupfungase-pfo.

⁸ Idedolya Mndumii likanjichea lyehamba.

⁹ “Mndumii nahamba adi, ‘Chandu uwonyi kiṟota-kyo kinyamaṟikie inyi nyi wudo njechinyamaṟa orikiki lo Yuda na orikiki lung'anyi lo Yerusalemu.

¹⁰ Wandu-wa wawicho waleha iadanyia madedo hako, wahenda wakahaṟie mrima yawo na iosha maruwa ha wongo, ihaṟundia na ihaindia, wechifanana na kiṟota kyo kinyamaṟikie.

¹¹ Kipfa chando kiṟota kiwadanyi na kitsi kya mndu, nyi wudo ndewanza mba ya Israeli yose, na mba ya Yuda, kundu wamanyike kui rina lyako, wanjiichike na injinenga kiṟumi. Kyaindi wo walakunde injiicho. Nyi inyi Mndumii-Ruwa ngahamba.’”

Nungu ya mvinyo na nyashi ya Mndumii

¹² Kyasia nochiwawia idedo li, Mndumii-Ruwa o Israeli nahamba adi, “Orio nungu ya mvinyo yechiichuṟo mvinyo nawo wechikuwia, so nyi ludekio ke orio nungu yechiichuṟo mvinyo?

¹³ Nalyo ochiwawia Mndumii nahamba adi, ‘Ambuya njechiichuṟa wunanzi wandu wenyi orukalu wose ma wamangi wadamie loṟikehu lo wuitoṟi wo Dawidi, na wakokanyi na waikimbi na wenyi wa Yerusalemu.

¹⁴ Njechiamtsa kiletsano kya mndu na odoe, ee nde o wandu, wana na wafee handu hamu. Mndumii ahamba; njechiwasaṟia-pfo ma ihoṟia ma iwaichio wukiwa njide njilawarumatsa.’”

Yeremia awawasa kya ikudosa

¹⁵ Adanyienyi nyo dehenyi madu hanu; mulawade orikiki kipfa Mndumii ahamba.

¹⁶ “Ichikenyi Mndumii-Ruwa onu, alameende mema madende hanu halamekapa tulio huya mafumvu ha meema. Kiheri muweiwedia saa, ilamehaluke kuwe meema rambatanyi.

¹⁷ Indi kakoya mulakundi iicho, mumuyo foko fochifihiṟa ko kiṟika, kipfa kya orikiki lonu, riso lyako, lyechifihiṟa na itonyitsa mchenyeṟe ifoi, kipfa mamiingi fo Mndumii fodao fui mpfunge.”

Ndumi ya Ruwa ko oshari lo kimangi

¹⁸ Wienyi mangi na mae o mangi, “Kunyiṟenyi na idamia wanda; Kipfa oṟo tsanu njicha tsammbuka mdonyi yanu.

¹⁹ Mongo ya mṟi ya Negebu injishinge; kuwode moidima iṟuhuopfo, Yuda nadeo ai mpfunge, nadao piu aimpfunge.

²⁰ “Iria meso hapfo, iyo Yerusalemu, uambuye iwa waicha wawuka ora lo mtsudu; lyeku po lilya lyapfo ulelinengo, po lilya licha?

²¹ Iyo nkiki ochihamba, ili mandi ochiwika mbuya tsapfo tsiwe mdo huyapfo, kokoya iyo kumonyi nowaloshie ikaa huyapfo? Ngesa fowa yechikuwada cha mawawio, ha mndu mka ai kufui nafee?

²² Na iyo nohamba mrimenyi fopfo, nkiki mbonyi tsi tsanjikoya, inyi kipfa kya mfoeṟa fo wuwicho wopfo, ngurutanyi tsapfo tsameoṟowoka, na shishindo sha madende hapfo sharida .

²³ Ale, Mkushi naidima iilacha fana ya mbihu foke, ang'u rumu matoṟetoṟe halyo? Kokoya echiidima, manya nyo mochiidima iwuta mecha, nyo muichiwie iwuta mawicho.

²⁴ Kui kipfa kya ikyo njechimura -hanyitsa, cha muulu fokedao nyi otanu handu ko nuka.

²⁵ Ikyo nyikyo kuṟu kuhya yapfo, ohawi lopfo uleheshio, Nyi inyi Mndumii ngahamba: ‘Kipfa iyo nulenjihadima kokusiria wongo.

²⁶ Kui kipfa kya ikyo njechikuhutsia sonu, njechikushukuo na iatuo nguwo yapfo.

²⁷ Ngamewona wuwicho wopfo, wuṟuhui wopfo, na wulala wopfo, ngafu na wumeluki wopfo, wui huya mafumvu kiidi kya mdemi. Ochia lopfo, Iyo Yerusalemu! Noleha iheṟemtso; mbonyitso nochikaa natso noshike indii?’”