YEREMIA 12 - Bibilia Kui Mdedie fo Kimochi

Yeremia awesana na Mndumii-Ruwa

¹ Mndumii-Ruwa iyo noi mwele, ma chando njideda na iyo. Na njikundi ideda na iyo kui mbonyi tsa wulohi. Nki kitewe wandu wawicho wawode sia, wandu wewuta sha mkika wakawada ofoṟo?

² Kowawaaya wakado, wakang'ana na iṟaa ndunda, wekekusenda kui madedo hawo, indi mrima yawo ikeri haleshe na iyo.

³ Kyaindi iyo nonjiichi Mndumii-Ruwa, nonjiwanzie kopfo ma chandu njichumia, nokuruo iwo wengi cha ichondi lyeshinjo, nowaletsane kipfa kya kiheri kewoho.

⁴ Mṟasa indii oruka lofuha kipfa kya oruka lowuṟa mvuo, maṟa hose ha mdemenyi hanaa. Mando hai ngeṟenyi na ndehe tsapfa, kipfa kya wuwicho wo wengi wahamba; “Ruwa echiwona mtsitsionyi fodu pfo.

⁵ Ruwa nahamba; ‘Kokoya nuwikia mteeṟa na iwo wechumia na madende kolehela, nyi uda ochiidima ikuṟinganyisha na Frasi, kokoya nochioloka kiidi kya oruka lulawode kiringa, nochiwika kuda kiidi kya ngeṟa ya Yordani.

⁶ Wanawamayo na wa mba yapfo kumonyi, wakuwutia kui mtambo, wakudedia na pata. Ulawaidikie manta, ma wakakuwia madedo mecha.’”

Ruwa ada wandu wake na mba yake

⁷ Mndumii-Ruwa nahamba adi, “Ngada mba yako, ngakumba kuleshe kyoṟa kyako, Israeli ai mkunde oko o mrima, ngamdambikia mawokonyi ha wakituwa wake.

⁸ Kyoṟa kyako kyahaluka mwiso, kiidi kya ngeṟa kikaringona nkyo kitewe ngamsuo.

⁹ Ngesa kyoṟa kyako kyawa cha ndehe iwode matoṟetoṟe. Ndehe njiwawo tsedamia njora tsose. Henda sanyienyi ndehe na mando hengi, hai na moo halya malanga'a hache halye.

¹⁰ Walisi wafoi wanyamaṟa dema lyako lya msabibu, wakachuma chuma oruka lui masaa hako: mdemi foko fucha wafuhaluo nuka ya msanga.

¹¹ Wakalihaluo mrapu, kui kipfa ikyo, linjifihiṟia oruka lose lowa mrapu, kipfa kuwode mndu alewika isho mrimenyi foke-pfo.

¹² Wewada wandu wapfungo wadoye huya, shitoṟomoso sha mafumvu patehu; kipfa oshu lo Mndumii luilya ora lumu lo oruka, itane ora lo kawi lo oruka, kuwode ma umu menyi mbihu echiwada ofoṟo pfo.

¹³ Walewaaya Ngano wechisambuo mbosha, walelisa wukiwa mbihu yawo indi walaiṟimiṟe. Wulalu tawukenyi kipfa kya mawuto hanu, kipfa kya nyashi njiwawo ya Mndumii.”

Mndumii-Ruwa na wamṟasa wa Israeli

¹⁴ Mndumii nahamba adi, “Kipfa kya wamṟasa wako wawicho walya wekepaya kyoṟa kyako, njileinenga wandu wako Israeli, ambuya njechiwawuta kiidi kya oruka lowo na njechiwuta mba ya Yuda kiidi kyawo ilakae kowo.

¹⁵ Kechiwa ngamewawutapfo njiwuye iwasaṟia, numa njiwaendese orio mndu naide na kyoṟenyi kyake na orio mndu naide na orukenyi loke.

¹⁶ Nahong'u kechiwa wokia wechikulosha njia tsa wandu wako, ilya nyamu kui rina lyako, ‘So Ruwa ai na moo,’ chando walewelosha wandu wako ilya nyamu kui rina lya Baali nyi wudo wechiwa kiidi kya wandu wako.

¹⁷ Kyaindi mkambo fose fo wandu fulakunda injiindia; njechiwakuṟuo na iwarumatsa kichi kichi. Nyi inyi Mndumii-Ruwa ngahamba.”