YEREMIA 11 - Bibilia Kui Mdedie fo Kimochi

Yeremia na mkundana

¹ Idedo lilechea Yeremia, lyehamba.

² “Adanyia madedo hako ha mkundana fu; uhende iwia wandu wa Yuda na wose wakeri Yerusalemu.

³ Nochiwawia kudi, “Mndumii-Ruwa o Israeli nahamba adi: Naseso mndu awumbuya madedo ha wuwawaso wo mkundana foko.

⁴ Ifu nyi mma njilelya na wandu wako njiwawuta Misri, kiidi kya riko lya modo fo menya. Njilewawia wanjiindie na iṟunda lilya njilewawawasa ke wakawuta wado wechiwa wandu wako na inyi njiwe Ruwa owo.

⁵ Wakawuta wado inyi njechiinutsia shose shako njilewia waku wawo kya iwainenga oruka luwode maruwa na wuki chandu ki itane inu.” Na inyi ngahaluo “Kiwe kido Mndumii-Ruwa.”

⁶ Mndumii-Ruwa kanjiwia, “Onguo madedo ha hose kiidi kya mṟi yose ya Yuda na njia tsa Yerusalemu. Wawie waadanyie mbonyi tsa madedo ha na ihainutsia.

⁷ Kipfa njilewawasa waku wawo lilya njilewawuta orukenyi lo Misri, ngaweengeṟa iwawawasa wanjiindie mrasa mkonufu fo inu.

⁸ Kyaindi walekunda injiindia- ma injicho-pfo, wakawona kicha kyawo nyi ihenda chandu wakukundia ko orikiki lowo na mrima ikuiwitie iichuo wuwicho. Kyasia ngawahoṟuo kihianyi na wuwawaso njilewawia wawuwade indi wo wakaleha iwuwada.”

⁹ Nao Mndumii kanjiwia, “Wandu wa Yuda na wenyi mṟi fo Yerusalemu waṟiingia injileha.

¹⁰ Wawuya mawicho ha wandeawo walya waleleha iadanyia madedo hako. Waleosha maruwa hengi na ihandia; mba ya Israeli na mba na Yuda, waletehia mawawaso hako njilewikia waku wawo.”

¹¹ Kyasia Mndumii nahamba adi, “Njechiende mawicho huya wo, walechiidima ihadicha, wechinjililia kyaindi njechiwaichopfo.

¹² Nlyong'u wandu wa Yuda na wenyi wa Yerusalemu wechihenda ifihiria maruwa-ho wekehapfaamiṟia uvumba; kyaindi hechiidima iwakiṟa kiheri kya wukiwa wowopfo.

¹³ Kipfa itala lya maruwa hapfo iyo Yuda haṟinganyi na itala lya mṟi yapfo; chandu itala lya njia tsa Yerusalemu nyi wudo mulehoṟotsa rasio tsa kindo kilya kya wusutsu, shitaṟa shepfaamiṟa Baali uvumba.

¹⁴ Kyasia ulaterewie wandu-wa, ma kulaire ṟu lyapfo, na iterewa kipfa kyawo; kipfa njechiadanyia-pfo ma wakafuha kipfa kya wukiwa wowo-nyi ote.

¹⁵ Mkunde oko nyi kiki uiwuta kanyi koko, kokoya nalewuta wunyamaṟi kafana ngafu. Ngesa shaasa shapfo na nyama tsa shidaso shechikwiilisha? Kowuta mawicho nlyondo okechihio.

¹⁶ Mndumii nalekulaha rina lyapfo mkuyu fuwode maṟa mawishi mecha, fuwode ndunda njicha, kui kitohiyo kya mtiṟi fung'anyi waatsa modo huyafo, na maṟamba hafo hakafunjika.

¹⁷ Kipfa Mndumii menyi Matorito alekudonga, nadeda mawicho huyapfo kipfa kya mba ya Israeli na mba ya Yuda walewuta kipfa kyawo wawenyi wakanjipfulutsa nyashi, wechipfamiṟia Baali uvumba.”

Kyama kyewaha Yeremia

¹⁸ Ngoseṟa Mndumii kanjimanyishia ishi, na inyi ngaweshimanya; nlyondo alenjiloṟa mawuto hawo.

¹⁹ Kyaindi inyi njiwekeri cha kidahina kihoo, kidao kishinjionyi; manya njiweichi ke wawemewika chila kiṟika wehamba, “Wulalu lunyamaṟe ikidi na ndunda tsalyo, lumkumbe kuleshe nawuke orukenyi lo wenyi moo, kundu rina lyake lilawono na ikumbuyo-se.”

²⁰ Kyaindi, iyo Mndumii menyi Matorito okeanduo kya wusumhanyi, okehesha mrima na wuṟango wo wandu, unjitarame iwona kochiwataa kiṟache. Kipfa ngakudambikia mondu foko.

²¹ Nkyo kitewe Mndumii nahamba adi kya wandu wa Anathothi iwo wakundi moo fopfo wehamba, “Ochiidima ihamba wuikimbi kui Rina lya Mndumii-pfo, kipfa nochipfa kui mawoko hadu.”

²² Kui kipfa ikyo Mndumii Menyi Matorito nahamba adi, “Ambuya njechihoṟuo wandu wa, wanake wechipfa kui oshu, wana wawo wa kisoṟo na wa kika wechipfa kipfa kya njaa.

²³ Manya kochiwada mndu motsuhaa kowo-pfo, kipfa njechiende mawicho huya wandu wa Anathothi, kiidi kya maka focheo.”