YEREMIA 10 - Bibilia Kui Mdedie fo Kimochi

Wuindi wo lohi na wuindi wo sanamu

¹ Adanyia idedo lya Mndumii akeri ideda nanyo wandu wa mba ya Israeli.

² Mndumii nahamba adi, “Mulakuloshe kiidi kya njia ya wandu wa mkambo, manya mulaṟihisho nyi shichano sha nginehu; deenyi wandu wa mkambo waṟihisho nyi sho.

³ Kipfa muichiwie na wuindi wo wandu wa nyiwo wongo. Mndu nekeduo soka kamanya ikidi ngeṟenyi, kalipacha kahaluo nyilyo ruwa.

⁴ Wandu wakalishia fesa na sahabu Kui mawoko hawo; kiidima wakalikapia handu na msumari, kundu lilateshuke.

⁵ Shindo sha mbaṟi i shifananyi na sheringa shilehe, kiidi kya mdemi fo mbeke, ang'u Ngano, shekededa pfo; na kikaki na shiiro kipfa sheidima ichumia-pfo. Mulaowesho nyi sanamu tso. Kipfa tsilechiidima iwuta kyose. Ma iṟunda kindo kicha kyose.

⁶ Kulawode ai cha iyo, Mndumii, ung'anyi na rina lyapfo ling'anyi, na imanyika kose.

⁷ Nyiu elechikuowuo, iyo mangi ya mkambo ya wandu? Iyo nowaṟi iindiyo. Kiidi kya wumangi wowo, kuwode ma umu ai cha iyopfo Mndumii.

⁸ Wose nyi masembo na matondo, mloshie ya maruwa ha wongo nyi ngafu.

⁹ Sanamu tso tsekechopo nyi fesa nsalaṟe iwukie Tarshishi, na sahabu iwukie Ofiri; iṟunda lya waaria wa nganya tsa sahabu. Sanamu tso tsinjiṟike nguwo tsa king'aring'ari na opuko, tsinjipfume nyi waaria wang'anyi wepfuma.

¹⁰ Kyaindi Mndumii nyi Ruwa o lohi, nyi Ruwa menyi moo o mlungana, nyashi yake yededemisha wuyana, wandu wa mkambo, wechiidima ikarishia nyashi yake pfo.”

¹¹ Kyasia nochiwawia kudi: “Maruwa halaleidima iwika ruwehu ma oruka hechisaramaya kunu wuyana na wanda ya ngina.”

Kiimbo kyeichika Ruwa

¹² Mndumii chu nalewumba wuyana kui pfinya, kawanza wuyana-wu kui wulaanyi woke. Kui wurango woke kaala ngina chando iwonyio.

¹³ Kadeda na ṟu, kukowada mṟinga fuidihina nginehu. Nekedosa mapuchi wuka kushingonyi kya oruka, kadika mbaṟuko kiidi kya mvuo, kawedika otanu kisenyi kyake.

¹⁴ Orio mndu nai cha indo lya ngeṟenyi lilawode wuṟango. Orio mnganya o sahabu nasonu kipfa kya sanamu yake aleisalaṟa; Kipfa sanamu yesalaṟa nyi wongo, kuwode moo kiidi kyayo-pfo.

¹⁵ Nyi wulya tupu, nyi iṟunda lyelemba kiheri kyawo kecheo wechideka.

¹⁶ O nyi ohawi lo Yakobo, chi cha Ruwa-pfo Nyio awikie shindo shose. Na Israeli nyi kishari kya kyoṟa kyake. Mndumii Menyi Matorito nlyo rina lyake.

Isamiṟo lyatikiria

¹⁷ Wulalu sanyienyi nzohoṟa tsanu nyo wandu mui waṟingichie.

¹⁸ Kipfa Mndumii nahamba adi, “Mandi ho njechikumba wandu wa oruka lu wakae haleshe, njechiwalisa wukiwa, echitsuhaa ho ma umu pfo.

¹⁹ Ochia loko inyi Yerusalemu kipfa kya shifaṟe shako shi shiwicho mnu. Kyaindi njilehamba lohi iha nyi matuuro, kinjiwaṟi ikarishia.

²⁰ Ihema lyako lilenyamaṟo shiwoho shalyo shiledumbuka; wana wako walenjida wakakuhendia kowo; kuwode ma umu monjitarama ihoṟotsa ihema lyako-pfo, ma iala nguwo yehawa kyamba-pfo.

²¹ Na inyi Yeremia ngahamba; “Walisi wawa masembo, waleterewa waloṟo mbonyi ko Mndumii-Ruwa-pfo nkyo kitewe walawone kiira, na machondi hawo hose hakaṟahanyika.

²² Ṟu lyaichio. Mbonyi tsaluchea. Kuwode mtiṟi fung'anyi fuwuka ora lo mtsudu. Wandu wa isanga wawuka mtsudu wakeri icha, ihaluo mṟi ya Yuda iwe nuka ya msanga, kuwade mbako ya mapaara.

²³ Njiweichi-daa Mndumii-Ruwa, mndu o wandu awode pfinya huya ohendo loke lo moo-pfo; ma kuwode mndu mosongoya ohendo loke-pfo.

²⁴ Hoi Mndumii unjikange, kyaindi chi kui nyashi-pfo, njilawone njechisaramaya.

²⁵ Nyashi yapfo ihoye mkambo fo wandu walakuindia, na huya wandu walakuichi. Kipfa walewaha luwa lya Yakobo, walewaha na iwarumatsa piu na oruka lowo lukadeo mrapu.”