YEREMIA 1 - Bibilia Kui Mdedie fo Kimochi

Mndumii asambuṟa Yeremia nawe mdedi oke

¹ Madedo ha Yeremia, Mana o Hilkia, Umu o Wakohanyi wawei Anatoti, Orukenyi lo Benyameni.

² Ichu idedo lya Mndumii lilemchea mkonu ya Yosia mana o Amoni, mangi ya Yuda maka fo ikumi na kaṟaṟu fo Wumangi woke;

³ Idedo li lilecha maheri ha Yehoyakimu mana o Yosia, Mangi ya Yuda, mṟasa Imarisionyi lya maka fo ikumi na limu fo Sedekia mana o Yosia, Mangi ya Yuda na kiheri mṟi fo Yerusalemu fuledao wufungo kiidi kya meri fo katanu.

Yeremia alaho nawe mwikimbi

⁴ Idedo lya Mndumii lilenjichea, lyechihamba,

⁵ Njilamekuumba wusunyi wo mayo njiwekuichi, na kulamefeo, njilekuilisha, njilekuwika nuwe Mwikimbi o wandu wa mkambo.

⁶ Nalyondo njilehamba, “Hoi, Mndumii-Ruwa! Ambuya, njechiidima ideda-pfo kipfa inyi njii mana mtutu.”

⁷ Kya indi Mndumii-Ruwa kanjiwia, “Ulahambe inyi njii mana mtutu. Kipfa nyi ochihenda ko orio mndu njechikuduma koke, na iyo nochihamba orio idedo njechikuwawasa.

⁸ Kulaowuo kipfa kyawo, kipfa inyi njikeri na iyo njikukiṟe, Mndumii ahamba.”

⁹ Nalyo kudi Mndumii kahoṟuo owoko loke kapaya dumbu lyako; Mndumii kanjiwia, “Ambuya, ngawika madedo hako dumbunyi lyapfo;

¹⁰ Ambuya, ngakuwika uwe huya mkambo ya wandu, na orio wumangi kundu nokuṟuo na iwunduo, na inyamaṟa na irumatsa; kundu nowike na iwaaya.”

Ndodo tsiwi

¹¹ Idedo lya Mndumii likanjichease lyehamba, “Yeremia, nkiki uwonyi?” Ngahamba, “Nyi olio lo iwale.”

¹² Nalyo Mndumii kanjiwia, “Nowewona necha, kipfa njechiambuya idedo lyako kundu njiliinutsie.”

¹³ Idedo lya Mndumii likanjichea lya kawi lyehamba, “Nkiki uwonyi?” “Ngahamba, njiwonyi Nungu liwode mṟinga fuidosia, na minga tsihalukie ora lo mtsudu.”

¹⁴ Nalyo Mndumii kanjiwia, “Wuka mtsudu mawicho hechicha na ikooya wandu wose wa oruka lu.

¹⁵ Kipfa njechilaha shishari sha wumangi wuka mtsudu.” Mndumii ahamba, “Wechicha na orio mndu nawike loṟika loke lo wuitoṟi oo kufui na Mongo foida na Yerusalemu, na iambuya sumuhana na mawanda hake njora tsose na iambuyana na mṟi yose ya Yuda.

¹⁶ Na inyi nyi njechihamba mwanduye foko huye yawo kya mbonyi tsa mawuto hawo mawicho hose; kipfa walenjida inyi wakaindia maruwa hengi, wakawehapfamiṟa, wakaindia maṟunda ha mawoko hawo wawenyi.

¹⁷ Wulalu iyo kure nokuṟeheṟe uhende iwawia madedo hose njilekuwawasa, ulaowuo kipfa kyawo, njilawone njechikuowesha ipfo oshangunyi lowo.

¹⁸ Kipfa, ambuya mnu nyi ngakuhaluo mṟi fuwode omombo na ngo tsa menya, Mawanda ha menya tsa aṟeṟa huye ya oruka lose, huya wamangi wa Yuda na huya wanene wa wandu na huya wakohanyi wake na huya wandu wa oruka lu.

¹⁹ Nawo wechikapana na iyo kyaindi wechikuidimapfo; kipfa inyi njii hamu na iyo. Kundu njikukiṟe, nyi Mndumii ahamba.”