YAKOBO 5 - Bibilia Kui Mdedie fo Kimochi

Iwawaso lya wasuṟi

¹ Kendeng'u-wo wulalu nyo mui wasuṟi, muhende lia na ifuha kya marohyo hanu hechimhoya.

² Wusuṟi wu wonu womepuo na maṟaye hanu ha-malye nyi kase.

³ Sahabu na fesa yanu yamekapa ngama na ngama ii yechimbiia kiṟingishyo yahenda ilya nyama tsanu cha modo. Mukamaa ikuwumbya kisa kya masaa mfiri ifurumi.

⁴ Ambuya, wuṟundi wo waṟundi walya walemnyo nyiwo wuifuha, na shifuha sha wawehi walya shamaa ishika henda madunyi ha Mndumii menyi matorito.

⁵ Nyo momepfokya ipfo orukenyi na ikusetsa owicho na wusuṟi wose mukawelisiṟa ngoo tsanu mkonu fo kishinjo.

⁶ Nyi momewonya mti ichu asumhanyi mukawehenda imbaha alawehodana nanyo.

Itirisia na Iterewa

⁷ Tsindenyi mochikukarishya itane Mndumii echikuloṟa. Ambuya, mndu mdemi akeri iwedya kilimu kicha kya sanga echikukarishya kyakyo itane kyaambya mvuo yesonguo na mvuo yainutsya.

⁸ Nanyo kekukarishyenyi-ng'u mudo mochidamiṟa madima hanu, kyamba nyi kufui Mndumii echikuloṟa.

⁹ Wanawawama, mulanunuwiane muwenyi-na wenyi, kundu mulahende yanduyo. Ambuya, moanduo aakya ipfo shichuminyi.

¹⁰ Wanawawama, mukuwade na waikimbi walya walededa kui rina lya Mndumii, wawe mtaato fonu mpfunge, fo ihenda iwawiṟo owicho na fo ikukarishya-ho.

¹¹ Ambuya lokesendya nanga iwa walemkutirisia. Mukameicho ikutirisia lya Yobu na ipfo kundo Mndumii aleliinutysa mukamkuwona. Kipfa Mndumii ekesaṟya wandu saṟi ewaichio wukiwa.

¹² Indi kisongoe shingi shose, wanawawama wako, kikeri ki-le, ke mulalye nyamu, manya so ruwehu manya so sanga manya so ki. Indi mukahamba, e, iwe ee lohi mukahamba, ote, iwe ote lohi, kundu mulahendewonyo mti ipfo kyanduyonyi kilya.

¹³ Kokoya konu kuwode ai na sia, o nawe moimba.

¹⁴ Kokoya konu kwipfo aluo, o nalahe wameku wa siṟi, wahende imterewya-ho na imshia mafuda kui rina lya Mndumii.

¹⁵ Na kiterewo kilya kii-kiwike kui wuidiki kyechichiṟa moluo ulya, na Mndumii echimheluo. Kawuta wunyamaṟi nyi echihoṟyo.

¹⁶ Kyasia tochianenyi njonyamaṟo muwenyi-na wenyi mochiterewiana kundu muhende ichia. Iterewa lya mndu asumhanyi lyaidima kindo king'anyi liwe li-iwike na mrima msanze.

¹⁷ Elia awei mndu o wandu o mbika imu naso. Nao aleterewa kundu kulakapeho mvuo. Na mvuo ikada ilawekapa maka iṟaṟu na meri iṟandaṟu.

¹⁸ Kawuya katerewa-se na ngina ikawelekia mvuo na teri ii ikawealutsia-se maalutsio hayo.

¹⁹ Wanawawama wako, kokoya o konu umu-ho adekyo kilya kiilohi na ungi amhaluya-se naapfo.

²⁰ Kemanyenyi mowihiṟa mnyamaṟi njienyi ya odeko loke nyi echiletsa mrima foke opfu na ishikya mfeṟa fo manyamaṟo.