YAKOBO 4 - Bibilia Kui Mdedie fo Kimochi

¹ Ngapano na maanduyano shikeri ipfo konu nyi hanga shikuchee ngesa? Chi ipfo kundo lango tsanu tsikuwode tsechiamtsa shida ipfo shiwungonyi shanu?

² Mukeri ilalakia, indi moshika iwadapfo. Muiwahana na ilang'aa indi moidima ikoyapfo. Moira ngapano na ikumba-pfo moo. Indi mowona kindopfo kipfa muleketerewa.

³ Moterewa mulaambya nyi kipfa moketerewa owicho kundu mushifole-fole mochilisiṟa nasho lango tsanu.

⁴ Nyo wafunji wa wusangi, mulaichi ko, ke iwada mbuya na wuyana wu lyo liende kituwa na Ruwa? Kyasia ichu akunda iwa mbuya ya wuyana nyi akutana mkutuwa o Ruwa.

⁵ Ang'u mohamba biblia yadeda kya wulya kehamba, “Mumuyo alefusamiṟya konu nyi folalakya na iṟisaṟisa?

⁶ Indi aenenga wutonga wo mwengeṟia.” Nkyo kimaduma ihambie, “Ruwa alemana na walya wekutimbisha wawenyi, indi walya wakusotsa, awawonya wutonga.”

⁷ Nkyo kimitike muhoye Ruwa. Lemanenyi na Satana nao echimdicha.

⁸ Mutikirie Ruwa nao echimtikiria nanyo. Haramishenyi mawoko, nyo wanyamaṟi, ketanenyi-ng'u wo ngoo tsanu ngeha, nyo wenyi mrima iwi.

⁹ Hendenyi mukuwiṟishe, mukuinadye na ilia. Seko tsanu tsihaluke tsiwe shilio, na sia ihaluke iwe ṟenze.

¹⁰ Kunyiṟyenyi Mndumii nao echimwira.

Ulawonye manomayo owingo

¹¹ Muladedane, wanawawama. Ichu aideda manowama ang'u aidumbuo manomae nyi ekededa wuwawaso na idumbuo wuwawaso. Indi kokoya odumbuo wuwawaso nyi ukeri mtanyi motana wuwawasopfo indi nyi ui modumbuo.

¹² Ichu ai umu nyio mowika wuwawaso na mowudumbuo. Nao nyio menyi pfinya yekiṟa na yerumatsa. Indiiyo nyiwu itane odumbuo kya manomayo?

Ikushela

¹³ Akawo nyo mokehamba, Inu ang'u ngama lochihenda mṟinyi mliwe lutsinde ipfo maka lochiṟimiṟya-ho na ifeṟa mbucha.

¹⁴ Nanyo mui wandu mulamanya kilya kyewutika ngama. Moo fonu nyi fo kiki? Nyi mui mtsu fukeri iwono-ho oweṟe faa, ili lingi fulakiwono-se.

¹⁵ Nyi hondo hawemsumhanya ihamba, Mndumii kakunda nyi lochikaa-ho lushike iwuta kiwe na kiwe.

¹⁶ Na wulalu mokekushela na maseṟeṟi hanu. Orio ikushela lya mbaṟi ii lii liwicho.

¹⁷ Kyasia mndu kamanya kilya kii kicha kyewuta nao ada aleekiwuta, nakyo kyechimbiia wunyamaṟi.