YAKOBO 3 - Bibilia Kui Mdedie fo Kimochi

¹ Wanawawama wako, mulafo mudi mochiwa walosha, ili muichi ke mdumbuye lochidumbuyo so nyi yechiwa ya wutichi kawi.

² Kyamba so lose piu lokedeko kafoi. Kokoya kwipfo aladeko ili echideda ichu awei msoṟo msanze na kamu aidima yaapfinya na mbihu fose.

³ Kokoya lowika ngowa madumbunyi ha frasi kundu tsiluhoye, nyi mbihu fotso luifuduo fose.

⁴ Ambuya merikebu tsing'anyi tsidi tsikeri ihendesho-hendesho nyi njotanu tsa owira nyi tsekehaluyo nyi mlo mwangu ora lulya moichilia akunda kui wulami wo owoko.

⁵ Olimi na wudo lukeri kiwungo kitutu, na shilya luikusenda nasho sa shing'anyi. Ambuya kimodo kitutu nyi kyahenda ikoṟa ingeṟa chando ling'anyi.

⁶ Nalo olimi nyi modo, nyi lui wumangi wuichuo wumbafu. Olimi lukukerye kiidi kya shiwungo shadu kifanyitsa mbihu fose kiweatsa kidung'anyitso kya mbuka lui-waatse nyi Gehena.

⁷ Kyamba mbika ya mando ha nja yose na ya sherunduka huye na ya sheafuo wanda wanda na ya shikuṟembye ipalyipalyinyi yahooṟo wanda na ikamaa ihooṟo nyi mbika ya mndu o wandu.

⁸ Indi kwipfo ma umu o wandu aidima ihooṟa olimipfo. Lo kiwicho kilya kilatsia loichuo uṟoi loende opfu.

⁹ Na mweke folo lokeṟumisha mndumii na Wande, na mweke folo lokeruma wandu wai-wawike kui ofano lo Ruwa.

¹⁰ Nyi ipfo dumbunyi ili limu-ho kukuwukye-ho ona na oseso. Wanawawama wako, isho chi kisumhanyi shihendeke shidopfo.

¹¹ Alewo kuwode soka kuweṟukye mṟinga foloda na fopusa ipfo kiṟukyonyi kyayo ki kimu?

¹² Ma mkuyu foidima iwika ndunda tsa msinepfupfo, manya msabibu fowika tsi tsa mkuyupfo. Na wudo kundo ko mbalenyi koende mṟinga folodafo.

Wulaanyi wuwukye ruwehu

¹³ Nyi wu o konu ai mṟango amba mndu mṟeheṟi? O nawike-ho mawuto hechiwa na mbaye fusumhanyi kui wuṟango wo ipfudia.

¹⁴ Indi kokoya muwode wunyeng'i wuwawa na wulang'a wo ndeda ipfo ngoonyi tsanyu ma mulakuṟumishe mowongisha kilya kii-lohi.

¹⁵ Iwu wukeri wudi chi wuṟango wuwukye ipfo huyepfo, indi wukeri wo shi, wo ki-wandu, wo ki-waṟupfu.

¹⁶ Kyamba ipfo kwipfo wupirisi na wumbafu wose.

¹⁷ Indi wuṟango wu wowuka ipfo huye, wo wosonguo imanyika wui wukeha wukaengeṟa imanyisha ikunda ofoṟo na isehyana wanawawama wochikaa na wuindi wuwelukie welu masaṟia na mawiko mecha wulahenda iira mndu ma wulakulembetseṟye.

¹⁸ Indi mbeu yende ofoṟo yekeolyo kundo kuwode ofoṟonyi walya weitsa-ho ofoṟo.