YAKOBO 2 - Bibilia Kui Mdedie fo Kimochi

¹ Wanawawama wako, na mulasanze wuidiki woidikya Mndumii odu Yesu Kristo menyi wuitoṟi na ikundya wandu.

² Kyamba kokoya ipfo kisanzyonyi kyanu kukawecha napfo mndu msoṟo aṟee rachi tsa sahabu na nguo njiili pang'a, indi kuwecha napfo na mndu mkiwa aṟee nguo tsitere-fukye.

³ Nanyo muwechiringa ulya aṟee nguwo njiili pang'a muwembia, damya aa kundo kuu kucha; na ichu mkiwa muwembia, iyo hoṟoka ipfo, ang'u damya tsindenyi ya kitima kyako kyehekya-ho madende.

⁴ Mukawika mudo chi mowiluo ipfo kiidi kyanu mochiwa modumbuya mndu na mahio mawicho?

⁵ Wanawawama wako wakunde, kundenyi yadanya. Ruwa chi alesambuṟa iwa wai wakiwa na wa iya wuyana kawatana wasuṟi wenyi-wuidiki na waoṟi wa wumangi wu alewuteṟya walya wamkundi?

⁶ Indi nyo momleha iindya ichu mkiwa. Chi wasuṟi wekemwapfinya, chiwo wekemduo mengenyi?

⁷ Chi iwo wekeruma rina li icha mui-wasende nalyo?

⁸ E-wo kokoya moawutsia necha iwawaso lilya lya kiwumangi lii-iṟehye bibilienyi lyehamba, “Kunda odoo cha ili okukunda kumonyi,” nyihondo mowuta kya wusumhanyi.

⁹ Indi kokoya mokekundia wandu, nyi mowika-ho wunyamaṟi mohenda iwonyo owingo nyi wuwawaso ke mui watahachi.

¹⁰ Kyamba ili mndu akuwode na wuwawaso wose indi kafunja ili limu nyi mtahachi motahachya hose.

¹¹ Kyamba ichu ahambie, “Ma kulaṟuhuye,” nao nyio awehambie, “Ma kulawahe.” Indi kokoya odumbuya kya iṟuhuya, indi kohenda iwaha nyi hondo omba mtahachi motahachia wuwawaso.

¹² Ikyo muideda na wudo kiwe na ikyo muiwuta na wudo kiwewa mui wandu wakunda idumbuyo na meke fo wuwawaso wo ikuachia.

¹³ Kyamba mndu alekesaṟya, mdumbuye ii yechimhoya inletsane na isaṟia. Isaṟia lyashika iwikyo kiṟumi na ipfo mdumbuyenyi.

Wuidiki na mawuto

¹⁴ Wanawawama wako, kiira nyi kiki kechiwuka ipfo kundo mndu ahambye wai ke ai na wuidiki, indi mawuto alahawode? Alewo wuidiki wu wochiidima imletsa ko?

¹⁵ Kokoya mndu manowama ang'u mshiki waipfo wai kitaṟe wawuṟie na mlie fo inu.

¹⁶ Na umu o kiidi kyanu kawawia, Kuhendyenyi na ofoṟo muhende ioda modo muweihuda indi alawaenengya shelela mbihu iki nyi kiwataramie ki ngesa?

¹⁷ Na wudo wuidiki wukeri, kokoya wulai na mawuto nyi wukeri wupfu kowo wuwenyi.

¹⁸ Kulako kwipfo ehamba, Iyo ui na wuidiki na inyi njii na mawuto halya. Njiloṟa wuidiki wu wopfo wuta-ho mawuto halya na inyi njekuloṟa wuidiki wulya ipfo kundo mawuto hako hai.

¹⁹ Iyo uidikye ke Ruwa nyio umu. Kowika kudo kyachia. Na waṟufu waidikye iki wechidedema.

²⁰ A iyo mndu mohuukya, kokunda imanya ke wuidiki wulai na matendo nyi wukeri kitendo?

²¹ Abrahamu mku odu chi alesumhanzo kui mawuto kechiala mana chu oke Isaki ipfo rasionyi-hu?

²² Nyi owona wuidiki wuiṟunda ipfo kundo mawuto hake haiwuto, na wuidiki wuleshika yawukia ipfo mawutonyi halya.

²³ Kukashika iinutsyo-ho kilya ki-kiṟehye kehamba, Abrahamu aweidikye Ruwa nakyo kilemsendyo kya wusumhanyi kalaho mbuya ya Ruwa.

²⁴ Muwonyi ke mndu ahenda isumuhanzo kui mawuto chi kui wuidiki wuwenyi.

²⁵ Na wudo na Rahabu mka ulya o njia chi aleshika itano asumhanyi kui mawuto ili aleambya wasu walya na iwasama na njia ingi?

²⁶ Kyamba chando mbihu fulai na mumuyo fukeri mpfu na wudo wuidiki wuwuṟye mawuto nyi wui wupfu.